“Давлат хавфсизлик хизмати кубоги” совриндорлари тантанали тақдирланди

Амударё туманида ёшлар ўртасида соғлом турмуш тарзини кенг тарғиб этиш, уларнинг бўш вақтини мазмунли ташкил этиш ҳамда спортга бўлган қизиқишини янада ошириш мақсадида ўтказилган “Беш ташаббус олимпиадаси” доирасидаги “Давлат хавфсизлик хизмати кубоги” мусобақаларининг туман босқичи ғолиб ва совриндорларини тақдирлаш маросими юқори савияда ташкил этилди.

Байрамона руҳда ўтган тадбирда туман ҳокими Собир Хўжаметов, ҳоким ўринбосарлари, бўлимлар раҳбарлари, ёшлар етакчилари, спорт соҳаси вакиллари, мусобақа иштирокчилари, кенг жамоатчилик ҳамда ёшлар иштирок этди. Тадбир давомида спорт майдонларида ўз маҳорати, матонати ва жамоавий ҳамжиҳатлигини намоён этган ёшларнинг ютуқлари муносиб эътироф этилди.

Мусобақалар якунларига кўра, ўғил болалар ўртасида футбол баҳсларида Тўлқин овули жамоаси барча рақибларини ортда қолдириб, фахрли биринчи ўринни қўлга киритди. Иккинчи ўрин Куюк кўпир овули жамоасига насиб этган бўлса, Намуна маҳалласи жамоаси учинчи ўринни эгаллади.

Ўғил болалар ўртасидаги мини футбол мусобақаларида эса Қиличбой овули жамоаси чемпионликни қўлга киритди. Ойбек маҳалласи жамоаси иккинчи, Бўстон маҳалласи ёшлари эса учинчи ўринга сазовор бўлди.

Қиз болалар ўртасидаги мини футбол баҳслари ҳам муросасиз ва қизиқарли кечди. Якуний натижаларга кўра, Холимбег овули жамоаси мусобақа ғолибига айланди. Оқ олтин овули жамоаси иккинчи ўринни эгаллаган бўлса, Қипчоқ шаҳарчаси жамоаси учинчи ўрин билан тақдирланди.

Тақдирлаш маросимида сўзга чиққан туман ҳокими Собир Хўжаметов ҳамда тадбирда иштирок этган раҳбарлар спортнинг ёшлар ҳаётидаги ўрни ва аҳамиятига алоҳида тўхталиб, мусобақа давомида юксак натижаларни қайд этган спортчиларни самимий муборакбод этдилар. Шунингдек, улар ёшларнинг спортга бўлган қизиқиши ва интилиши йилдан-йилга ортиб бораётгани, бу эса келгусида юртимиз шарафини ҳимоя қиладиган истеъдодли спортчилар сафининг кенгайишига хизмат қилишини таъкидладилар.

Тантанали маросим давомида совриндор жамоалар кетма-кетликда саҳнага таклиф этилди. Уларга дипломлар, медаллар, спорт анжомлари ҳамда қимматбаҳо совғалар топширилди. Айниқса, мусобақаларда фахрли биринчи ўринни қўлга киритган жамоаларга чемпионлик кубогининг топширилиши тадбирнинг энг ҳаяжонли ва унутилмас лаҳзаларидан бирига айланди. Туман ҳокими Собир Хўжаметов ғолиб жамоаларга кубокларни тантанали равишда топширар экан, уларнинг меҳнати, интилиши ва ғалабага бўлган ишончини алоҳида эътироф этди.

Тадбир давомида ёш спортчиларнинг ютуқлари кенг жамоатчилик олдида эътироф этилиб, уларга келгусидаги мусобақаларда ҳам омад ва муваффақиятлар ёр бўлишига тилак билдирилди. Шунингдек, спорт орқали дўстлик, ҳамжиҳатлик, ватанпарварлик ва соғлом турмуш тарзи ғоялари тарғиб этилаётгани алоҳида қайд этилди.

Тақдирлаш маросими туман Маданият бўлими томонидан тайёрланган концерт дастури билан давом эттирилди. Республика миқёсида танилган санъаткорлар ҳамда туманимизнинг истеъдодли ва умидли хонандалари ижросидаги шўх-шодон куй-қўшиқлар тадбир иштирокчиларига кўтаринки кайфият улашди. Мусиқий чиқишлар, жўшқин тароналар ва байрамона муҳит спортчилар ҳамда меҳмонларда унутилмас таассурот қолдирди.

Спорт ва санъат уйғунлигида ўтган ушбу тантанали тадбир нафақат мусобақа ғолибларини эътироф этиш, балки ёшларни янги марралар сари руҳлантириш, уларни соғлом ва фаол ҳаёт тарзига чорлайдиган муҳим маънавий-маърифий тадбир сифатида ҳам катта аҳамият касб этди. “Давлат хавфсизлик хизмати кубоги” мусобақалари ёшлар ўртасида спортни оммалаштириш, истеъдодларни кашф этиш ва уларни қўллаб-қувватлаш йўлидаги муҳим лойиҳалардан бири бўлиб қолиши, шубҳасиз.

Чарос Арслонова, туман ҳокимлигининг Ахборот хизмати раҳбари.