“Davlat xavfsizlik xizmati kubogi” sovrindorlari tantanali taqdirlandi

Amudaryo tumanida yoshlar oʻrtasida sogʻlom turmush tarzini keng targʻib etish, ularning boʻsh vaqtini mazmunli tashkil etish hamda sportga boʻlgan qiziqishini yanada oshirish maqsadida oʻtkazilgan “Besh tashabbus olimpiadasi” doirasidagi “Davlat xavfsizlik xizmati kubogi” musobaqalarining tuman bosqichi gʻolib va sovrindorlarini taqdirlash marosimi yuqori saviyada tashkil etildi.

Bayramona ruhda oʻtgan tadbirda tuman hokimi Sobir Xoʻjametov, hokim oʻrinbosarlari, boʻlimlar rahbarlari, yoshlar yetakchilari, sport sohasi vakillari, musobaqa ishtirokchilari, keng jamoatchilik hamda yoshlar ishtirok etdi. Tadbir davomida sport maydonlarida oʻz mahorati, matonati va jamoaviy hamjihatligini namoyon etgan yoshlarning yutuqlari munosib eʼtirof etildi.

Musobaqalar yakunlariga koʻra, oʻgʻil bolalar oʻrtasida futbol bahslarida Toʻlqin ovuli jamoasi barcha raqiblarini ortda qoldirib, faxrli birinchi oʻrinni qoʻlga kiritdi. Ikkinchi oʻrin Kuyuk koʻpir ovuli jamoasiga nasib etgan boʻlsa, Namuna mahallasi jamoasi uchinchi oʻrinni egalladi.

Oʻgʻil bolalar oʻrtasidagi mini futbol musobaqalarida esa Qilichboy ovuli jamoasi chempionlikni qoʻlga kiritdi. Oybek mahallasi jamoasi ikkinchi, Boʻston mahallasi yoshlari esa uchinchi oʻringa sazovor boʻldi.

Qiz bolalar oʻrtasidagi mini futbol bahslari ham murosasiz va qiziqarli kechdi. Yakuniy natijalarga koʻra, Xolimbeg ovuli jamoasi musobaqa gʻolibiga aylandi. Oq oltin ovuli jamoasi ikkinchi oʻrinni egallagan boʻlsa, Qipchoq shaharchasi jamoasi uchinchi oʻrin bilan taqdirlandi.

Taqdirlash marosimida soʻzga chiqqan tuman hokimi Sobir Xoʻjametov hamda tadbirda ishtirok etgan rahbarlar sportning yoshlar hayotidagi oʻrni va ahamiyatiga alohida toʻxtalib, musobaqa davomida yuksak natijalarni qayd etgan sportchilarni samimiy muborakbod etdilar. Shuningdek, ular yoshlarning sportga boʻlgan qiziqishi va intilishi yildan-yilga ortib borayotgani, bu esa kelgusida yurtimiz sharafini himoya qiladigan isteʼdodli sportchilar safining kengayishiga xizmat qilishini taʼkidladilar.

Tantanali marosim davomida sovrindor jamoalar ketma-ketlikda sahnaga taklif etildi. Ularga diplomlar, medallar, sport anjomlari hamda qimmatbaho sovgʻalar topshirildi. Ayniqsa, musobaqalarda faxrli birinchi oʻrinni qoʻlga kiritgan jamoalarga chempionlik kubogining topshirilishi tadbirning eng hayajonli va unutilmas lahzalaridan biriga aylandi. Tuman hokimi Sobir Xoʻjametov gʻolib jamoalarga kuboklarni tantanali ravishda topshirar ekan, ularning mehnati, intilishi va gʻalabaga boʻlgan ishonchini alohida eʼtirof etdi.

Tadbir davomida yosh sportchilarning yutuqlari keng jamoatchilik oldida eʼtirof etilib, ularga kelgusidagi musobaqalarda ham omad va muvaffaqiyatlar yor boʻlishiga tilak bildirildi. Shuningdek, sport orqali doʻstlik, hamjihatlik, vatanparvarlik va sogʻlom turmush tarzi gʻoyalari targʻib etilayotgani alohida qayd etildi.

Taqdirlash marosimi tuman Madaniyat boʻlimi tomonidan tayyorlangan kontsert dasturi bilan davom ettirildi. Respublika miqyosida tanilgan sanʼatkorlar hamda tumanimizning isteʼdodli va umidli xonandalari ijrosidagi shoʻx-shodon kuy-qoʻshiqlar tadbir ishtirokchilariga koʻtarinki kayfiyat ulashdi. Musiqiy chiqishlar, joʻshqin taronalar va bayramona muhit sportchilar hamda mehmonlarda unutilmas taassurot qoldirdi.

Sport va sanʼat uygʻunligida oʻtgan ushbu tantanali tadbir nafaqat musobaqa gʻoliblarini eʼtirof etish, balki yoshlarni yangi marralar sari ruhlantirish, ularni sogʻlom va faol hayot tarziga chorlaydigan muhim maʼnaviy-maʼrifiy tadbir sifatida ham katta ahamiyat kasb etdi. “Davlat xavfsizlik xizmati kubogi” musobaqalari yoshlar oʻrtasida sportni ommalashtirish, isteʼdodlarni kashf etish va ularni qoʻllab-quvvatlash yoʻlidagi muhim loyihalardan biri boʻlib qolishi, shubhasiz.

Charos Arslonova, tuman hokimligining Axborot xizmati rahbari.