МЕҲНАТ ФИДОЙИЛАРИ РАҒБАТЛАНТИРИЛДИ
Янги йил байрами арафасида туман ҳокимлигида 2015 йилда туманда давлатга пахта топшириш шартномавий режаси муваффақиятли адо этилиши муносабати билан бир гуруҳ меҳнат илғорлари ва фидойиларини рағбатлантириш маросими ўтказилди.
Туман ҳокимининг биринчи ўринбосари Б.Эрназаров тантанали маросимни кириш нутқи сўзлаб очар экан, у муҳтарам Президентимиз ва ҳукуматимиз томонидан қишлоқ хўжалиги соҳасида янги тизим жорий қилиниши, пахта етиштиришни янада такомиллаштириш борасида олиб борилаётган кенг кўламли ислоҳотлар, жумладан қишлоқ хўжалигида фермерлик ҳаракатининг янги босқичга кўтарилаётганлиги, махсус дастурлар асосида ерларнинг мелиоратив ҳолати яхшиланганлиги, селекционер олимларимиз томонидан эртапишар ва серҳосил ғўза навларининг яратилаётганлиги пахтадан мўл ҳосил олишга замин яратаётгани, шулар натижасида туманимиз пахтакорлари Ўзбекистон Республикасида биринчи бўлиб шартномавий режаларини қисқа вақт ичида муваффақиятли бажаргани ва 2015 йилда пахтачиликдан олинган даромаднинг 38 млрд. сўмдан ошиб кетганлигини фахр билан тилга олди.
Шундан сўнг меҳнат илғорларига Қорақалпоғистон Республикаси Жўқорғи Кенгеси ва Вазирлар Кенгаши, туман ҳокимлиги ҳамда ҳомийлар томонидан тайёрланган қимматбаҳо совғалар топширилди.
ММТПлар бўйича биринчи ўринни олган Қипчоқ ММТП раиси Ж.Жумабоевга "Lifan” русумли мотоцикл, Қиличбой ММТП раҳбари О.Қурбониёзовга "Lifan” UF50QT – 2 A русумли мотоцикл ва "Тошёп” ММТП раиси Ж.Асқаровга компьютер жамланмаси топширилди.
Шундан кейин 3 нафар илғор фермер хўжаликлари раҳбарларига, пахта териш мавсумида аҳоли ўртасида тарғибот ва ташвиқот ишларини яхши олиб борган ва аҳолини пахта йиғим-теримига жалб қилишда фидойилик кўрсатган саккиз нафар фуқаролар йиғинлари раисларига, фермер хўжаликларига биркитилган уч нафар отряд бошлиқларига, пахта йиғим-терими мавсумида фаол ҳаракат қилган уч нафар "мингбоши”ларга, уч нафар корхона-ташкилот раҳбарларига, уч нафар ўрта махсус, касб-ҳунар таълими муассасалари раҳбарларига, уч нафар энг кўп пахта терган корхона-ташкилот ходимларига, уч нафар энг кўп пахта терган ўрта махсус, касб-ҳунар таълими муассасалари ўқувчиларига қимматбаҳо совғалар топширилди.
Шунингдек, туманда пахта теримида фаол иштирок этган Нукус давлат педагогика институтининг 21 нафар талабасига тўлов контрактлари учун 1 млн. сўмдан пул ўтказиб берилганлиги маълум қилинди.
Меҳнат фидойиларини рағбатлантириш маросимида Қорақалпоғистон Республикаси Вазирлар Кенгаши раиси Баҳодир Янгибоев иштирок этди.
(Ўз мухбиримиздан).
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
