УСТОЗЛАР ИЗИДАН БОРИБ...
Мен 1995 йилда, 32-сонли мактабни тугатган вақтимда отажоним ва акам, опаларим сингари ўқитувчи бўламан, деб қатъий аҳд қилган эдим. Чунки, улар орқали бу касбнинг шарафи ва масъулиятини ҳам чуқур ҳис қиламан, деб ўйлагандим. Бироқ Нукус Давлат педагогика институтининг тарих-география факультетини битириб келиб, 38-сонли мактабда ўз соҳам бўйича дарс бера бошлаганимда устоз-мураббийлик мен ўйлаганимдан ҳам машаққатлироқ эканини ҳис қилдим. Чунки, синфхонани тўлдириб ўтирадиган 25-30 нафар атрофидаги, ҳар бири ҳар хил оила муҳитида тарбияланган, ҳар бири ўзига хос хулқ-атворли болаларнинг барчасининг кўнглига йўл топиб, муомала қилиш, ўз фанингга қизиқишини ошириш осон эмас.
Мен аввало ўз меҳнат фаолиятимни бошлаган бу таълим маскани туманимиздаги энг нуфузли, болаларга таълим-тарбия бериш борасида ўзига хос мактаб яратган моҳир педагоглар жамланган маскан эканлигини айтиб ўтишни истар эдим. Мен шу даргоҳда ўз касбининг моҳир эгалари бўлган касбдош устозларим Тўлибой ака, Норгул опа, Имсиной опа, Махсуда опалардан дарс ўтиш маҳорати, болаларнинг диққатини ўтилаётган дарс сабоқларига тўла жалб қилиш сир-асрорларини ўргандим. Шарофат опа Чоршамова, Сайёра опа Худойберганова, Соатбой ака Бегимов, Инобат опа Отажонова каби кўплаб устоз ўқитувчилар менга эринмай беминнат маслаҳатлар беришди.
Бугунги кунда ҳам ёш авлодни баркамол инсонлар қилиб тарбиялашдек машаққатли касбда ҳалол меҳнат қилаётган мактабимиз ўқитувчилари жамоаси бир-биримиздан ўрганиб, ўргатиб, касбимизга доир янгиликлардан, илғор педтехнологиялардан унумли фойдаланиб, дарсларимиз юқори самарали бўлишига интилаяпмиз. Натижада ўқувчиларимиз турли кўрик-танловларда, билимлар беллашуви ва фан олимпиадаларида, спорт мусобақаларида юқори ўринларни эгаллаб келишмоқда. Бутун дунёда глобаллашув жараёни шиддат билан кечаётган тезкор давр бизнинг зиммамизга дунёқараши кенг, миллий урф-одатларимиз, қадриятларимизга, маданиятимизга юксак ҳурмат билан қарайдиган, уларни чуқур ўрганиб, керакли сабоқларни ола биладиган юксак маънавиятли ўғил-қизларни тарбиялаш вазифасини қўймоқда. Мен мактабимиз ўқитувчилар жамоаси бу вазифани сидқидилдан адо этадилар, деб ишонаман.
Холбика ДУРДИЕВА,
38-сонли мактаб ўқитувчиси.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
