АМУДАРЁ ТУМАН ИИБ ЙҲХБ ХОДИМЛАРИ ФАХРИЙ УСТОЗЛАРИГА ҲУРМАТ-ЭҲТИРОМ КЎРСАТДИЛАР

Халқимиз севиб нишонлайдиган байрамлар кўп. Ҳар бир байрам ўз мазмун-моҳияти жиҳатидан кўнгилларга олам-олам завқ бағишлайди. Лекин шундай бир гўзал айём борки, унда миллий-маънавий қадриятлар, халқимизга хос бўлган меҳр-оқибат, ҳурмат ва эҳтиром туйғулари янада улуғланади. Бу айёмда инсониятга оқ-қорани танитиб, мустақил ҳаётга йўллаган, мустақил фикрлашга ўргатган, орзу-умидларнинг чароғон манзиллари сари интилишга чорлаган ва келажакка ишонч уйғотган буюк зот — азиз Устозлар шарафланади.

Мамлакатимизда 1 октябрь — “Ўқитувчи ва мураббийлар куни” умумхалқ байрами ана шундай эзгу фазилатларни ўзида мужассам этгани билан ҳар бир қалб учун азиз ва қадрли.

Байрам арафасида ва байрам кунлари бўлиб ўтган тантанали тадбирларда нафақат ўқитувчи ва мураббийлар, балки барча соҳалар бўйича фидокорона меҳнат қилган, ўз фаолиятлари давомида кўплаб ёш мутахассисларга касб сирларини ўргатган, уларнинг мустақил иш юритишлари учун зарур маслаҳат ва тавсиялари билан яқиндан ёрдам берган инсонларга шогирдлари юксак эътибор ва эҳтиром кўрсатдилар, устозлари кўнглини обод этишиб, байрам совғаларини тақдим қилдилар.

Амударё тумани Ички ишлар бўлими Йўл ҳаракати хавфсизлиги бўлинмаси ходимлари ҳам 1 октябрь — “Ўқитувчи ва мураббийлар куни” умумхалқ байрамини ҳар гал устозларини шарафлаш айёми сифатида кенг нишонлайдилар. Бу галги байрам арафасида ҳам узоқ йиллар мазкур соҳада фаолият олиб борган, кўплаб ёш мутахассисларга нафақат касбий маҳорат сирларини, балки соҳага хос бўлган ҳалоллик ва адолат тамойилларига мос иш юритиш, касб маданияти ва ахлоқий қоидаларини ўргатган ҳамда бу борада ўзлари ибрат бўлган фахрийлар хонадонларига ташриф буюришиб, устозларини байрам билан табрикладилар.

Туман Ички ишлар бўлими Йўл ҳаракати хавфсизлиги бўлинмаси бошлиғи, сафдор Бекзод Қозоқов раҳбарлигидаги бир гуруҳ ходимлар Қипчоқ шаҳарчасида истиқомат қилувчи фахрий устозлари Қадамбой Қоражонов хонадонида бўлдилар.

Ўз меҳнат фаолияти давомида йўлларда ҳаракат хавфсизлигини, фуқаролар осойишталигини таъминлашдек машаққатли ва масъулиятли вазифани бекаму кўст адо этган, шу билан бирга кўплаб ёш мутахассисларга устозлик қилган Қадамбой оға айни пайтда нафақада, кексалик гаштини сурмоқда.

У байрам муносабати билан хонадонига ташриф буюрган шогирдлари билан ўзи ишлаган даврдаги қийинчиликлар, йўллардаги носозликлар ҳақида сўз юритиб, бугун юртимизда Йўл ҳаракати хавфсизлиги хизмати ходимлари учун яратилган шарт-шароитлари хусусида суҳбатлашди. Айниқса, йўлларнинг равонлиги, йўл белгиларининг аниқлиги, радарлар, камераларнинг аҳамиятини алоҳида таъкидлади.

Фахрий устоз билан учрашув давомида бўлинма бошлиғи, сафдор Бекзод Қозоқов шогирдлар ҳурмат ва эҳтиромининг рамзи сифатида Қадамбой оға Қоражоновга байрам совғасини топширди.

Туман Ички ишлар бўлими Йўл ҳаракати хавфсизлиги бўлинмаси ходимлари шу куни Манғит шаҳрида истиқомат қилувчи хизмат фахрийси Саиджон оға Жумабоев билан ҳам учрашиб, устозни байрам билан табрикладилар ва байрам совғаси топширдилар. Ўз навбатида Саиджон оға Жумабоев ҳам давлатимиз томонидан кўрсатилаётган эътибор ва рағбат учун, қолаверса, шогирдларининг ташрифи, самимий тилаклари учун миннатдорлик билдирди.

Устозга ҳурмат ва эҳтиром кўрсатиш — азалий қадрият, қолаверса, бизнинг йўлларимизни ойдин, ҳаётимизни нурафшон қилган устозлар ҳаёти ва уларнинг фидокорона меҳнати, юксак инсоний сифатлари ҳар биримиз учун ҳақиқий ҳикматлар хазинасидир. Улуғ ҳазрат Мир Алишер Навоий чуқур эҳтиром билан айтганларидек:

"Ҳақ йўлинда ким санга бир ҳарф ўқутмиш ранж ила,

Айламак бўлмас адо онинг ҳақин минг ганж ила".

Зеро, устозга эҳтиром — бу тақдир инсонга раво кўрган бахт-у саодатга, фаровон ҳаётга, келажакка эҳтиромдир.

РОБИЯ ЙЎЛДОШЕВА.