Амударё туманида СЕО ва ЖС бўлимининг янги биноси фойдаланишга топширилди

Озиқ-овқат маҳсулотлари сифати, мактаб ва боғчалардаги гигиена талаблари, юқумли касалликларнинг ўз вақтида аниқланиши — буларнинг барчаси кундалик ҳаётда кўзга унчалик ташланмайдиган, аммо жамият саломатлигини белгилаб берадиган омиллардир. Айнан шу соҳадаги назорат ва профилактика ишлари санитария-эпидемиология хизмат зиммасига юклатилган бўлиб, унинг самарадорлиги кўп жиҳатдан мутахассисларнинг малакаси ва ихтиёридаги техник имкониятларга боғлиқ.

Сўнгги йилларда мамлакатимизда санитария-эпидемиологик осойишталикни таъминлаш тизими тубдан ислоҳ қилиниб, соҳа муассасаларининг моддий-техника базасини янгилаш давлат сиёсатининг муҳим йўналишларидан бирига айланди. Ҳудудларда замонавий лабораториялар ташкил этилаётгани, эскирган бинолар ўрнида янгилари қад ростлаётгани ҳам шу саъй-ҳаракатларнинг амалий ифодасидир. Бундай ўзгаришлар Амударё туманини ҳам четлаб ўтмади.

11 ноябрь куни Амударё тумани Санитария-эпидемиологик осойишталик ва жамоат саломатлиги бўлимининг янги маъмурий биноси тантанали равишда фойдаланишга топширилди. Мазкур иншоот бўлимнинг моддий-техника базасини мустаҳкамлаш, ходимлар учун муносиб меҳнат шароитларини яратиш ҳамда аҳолига кўрсатилаётган санитария-эпидемиология хизматлари сифатини янада ошириш мақсадида барпо этилди.

Қурилиш ишлари учун туман маҳаллий бюджети ҳисобидан жами 6 миллиард 800 миллион сўмга яқин маблағ ажратилган эди. Лойиҳа «Манғит Инвест қурилиш» масъулияти чекланган жамияти томонидан амалга оширилди: пудратчи ташкилот жорий йилнинг апрель ойида ишга киришиб, октябрь ойида барча ишларни тўлиқ якунлади.

Очилиш маросимида туман ҳокими Собир Хўжаметов ҳамда Қорақалпоғистон Республикаси Санитария-эпидемиологик осойишталик ва жамоат саломатлиги бошқармаси бошлиғи Баҳодир Қутлимуродов иштирок этиб, янги бинога ташриф буюрдилар. Тадбирда бўлим жамоаси ва фахрий меҳмонлар ҳам иштирок этди.

Маросимда сўз олган туман ҳокими ва бошқарма бошлиғи бўлим ходимларини янги, замонавий бино билан самимий табриклаб, уларга келгусида туман аҳолиси орасида юқумли касалликларнинг олдини олиш борасидаги масъулиятли ишларида омад тилашди.

Рамзий тасма қирқилиб, меҳмонлар хоналарни бирма-бир кўздан кечиришди ва бўлимнинг моддий-техник базаси ҳамда ходимлар учун яратилган шароитлар билан яқиндан танишдилар.

Айтиш жоизки, янги бино 100 нафар ходимга мўлжаллаб қурилган бўлиб, ҳозирги кунда бу ерда жами 94 нафар мутахассис фаолият олиб бормоқда. Бинода Эпидемиология ҳамда Санитария-гигиена бўлимлари жойлашган. Шу билан бирга, бу ерда санитария-гигиена, бактериология ва паразитология йўналишларидаги 3 та лаборатория фаолият юритади. Ушбу лабораториялар озиқ-овқат маҳсулотлари, ичимлик суви ва атроф-муҳит объектларидан олинган намуналарни текширишда, юқумли ва паразитар касалликлар қўзғатувчиларини аниқлашда муҳим ўрин тутади.

Таъкидлаш керакки, илгари ушбу лабораториялар бўлимнинг асосий биносидан 700 метр узоқликда жойлашган эди. Намуналарни бир манзилдан иккинчисига ташиш, ҳужжатларни мувофиқлаштириш ва мутахассисларнинг доимий қатнови вақт ҳамда куч сарфини ошириб, таҳлил натижаларини олиш муддатига ҳам таъсир кўрсатмай қолмас эди. Энди барча бўғинлар бир бино остида жамлангани ишни анча тезлаштиради. Юқумли касалликларга қарши курашда вақт омили ҳал қилувчи ўрин тутишини инобатга олган ҳолда, бу ўзгаришнинг аҳамияти янада ортади.

Маълумки, санитария-эпидемиологик хизматда лаборатория таҳлилининг аниқлиги ва тезкорлиги кўп ҳолларда хулосаларнинг тўғрилигини белгилайди. Шу боис янги бинода яратилган моддий-техник база ҳамда қулай иш хоналари мутахассисларга ўз вазифаларини юқори савияда бажариш имконини яратади.

Умуман олганда, янги бинонинг фойдаланишга топширилиши туманда санитария-эпидемиологик назоратни кучайтириш, аҳоли ўртасида юқумли касалликлар тарқалишининг олдини олиш ва профилактика ишларини тизимли ташкил этиш йўлидаги муҳим қадам бўлди. Ходимлар учун яратилган қулайликлар эса уларнинг меҳнат унумдорлигига, пировардида аҳолига кўрсатилаётган хизматлар сифатига бевосита ижобий таъсир кўрсатади.

Замонавий шароитда фаолият бошлаган жамоа зиммасидаги вазифа — жамиятдаги санитария-эпидемиологик осойишталикни, ҳар бир оиланинг саломатлигини асрашдир. Янги бино эса бу масъулиятли ишнинг мустаҳкам таянчига айланиб, туман аҳолисининг санитария хизматига бўлган ишончини янада оширишга хизмат қилади.