AMUDARYo TUMAN IIB YHXB XODIMLARI FAXRIY USTOZLARIGA HURMAT-EHTIROM KOʻRSATDILAR

Xalqimiz sevib nishonlaydigan bayramlar koʻp. Har bir bayram oʻz mazmun-mohiyati jihatidan koʻngillarga olam-olam zavq bagʻishlaydi. Lekin shunday bir goʻzal ayyom borki, unda milliy-maʼnaviy qadriyatlar, xalqimizga xos boʻlgan mehr-oqibat, hurmat va ehtirom tuygʻulari yanada ulugʻlanadi. Bu ayyomda insoniyatga oq-qorani tanitib, mustaqil hayotga yoʻllagan, mustaqil fikrlashga oʻrgatgan, orzu-umidlarning charogʻon manzillari sari intilishga chorlagan va kelajakka ishonch uygʻotgan buyuk zot — aziz Ustozlar sharaflanadi.

Mamlakatimizda 1-oktyabr — “Oʻqituvchi va murabbiylar kuni” umumxalq bayrami ana shunday ezgu fazilatlarni oʻzida mujassam etgani bilan har bir qalb uchun aziz va qadrli.

Bayram arafasida va bayram kunlari boʻlib oʻtgan tantanali tadbirlarda nafaqat oʻqituvchi va murabbiylar, balki barcha sohalar boʻyicha fidokorona mehnat qilgan, oʻz faoliyatlari davomida koʻplab yosh mutaxassislarga kasb sirlarini oʻrgatgan, ularning mustaqil ish yuritishlari uchun zarur maslahat va tavsiyalari bilan yaqindan yordam bergan insonlarga shogirdlari yuksak eʼtibor va ehtirom koʻrsatdilar, ustozlari koʻnglini obod etishib, bayram sovgʻalarini taqdim qildilar.

Amudaryo tumani Ichki ishlar boʻlimi Yoʻl harakati xavfsizligi boʻlinmasi xodimlari ham 1-oktyabr — “Oʻqituvchi va murabbiylar kuni” umumxalq bayramini har gal ustozlarini sharaflash ayyomi sifatida keng nishonlaydilar. Bu galgi bayram arafasida ham uzoq yillar mazkur sohada faoliyat olib borgan, koʻplab yosh mutaxassislarga nafaqat kasbiy mahorat sirlarini, balki sohaga xos boʻlgan halollik va adolat tamoyillariga mos ish yuritish, kasb madaniyati va axloqiy qoidalarini oʻrgatgan hamda bu borada oʻzlari ibrat boʻlgan faxriylar xonadonlariga tashrif buyurishib, ustozlarini bayram bilan tabrikladilar.

Tuman Ichki ishlar boʻlimi Yoʻl harakati xavfsizligi boʻlinmasi boshligʻi, safdor Bekzod Qozoqov rahbarligidagi bir guruh xodimlar Qipchoq shaharchasida istiqomat qiluvchi faxriy ustozlari Qadamboy Qorajonov xonadonida boʻldilar.

Oʻz mehnat faoliyati davomida yoʻllarda harakat xavfsizligini, fuqarolar osoyishtaligini taʼminlashdek mashaqqatli va masʼuliyatli vazifani bekamu koʻst ado etgan, shu bilan birga koʻplab yosh mutaxassislarga ustozlik qilgan Qadamboy ogʻa ayni paytda nafaqada, keksalik gashtini surmoqda.

U bayram munosabati bilan xonadoniga tashrif buyurgan shogirdlari bilan oʻzi ishlagan davrdagi qiyinchiliklar, yoʻllardagi nosozliklar haqida soʻz yuritib, bugun yurtimizda Yoʻl harakati xavfsizligi xizmati xodimlari uchun yaratilgan shart-sharoitlari xususida suhbatlashdi. Ayniqsa, yoʻllarning ravonligi, yoʻl belgilarining aniqligi, radarlar, kameralarning ahamiyatini alohida taʼkidladi.

Faxriy ustoz bilan uchrashuv davomida boʻlinma boshligʻi, safdor Bekzod Qozoqov shogirdlar hurmat va ehtiromining ramzi sifatida Qadamboy ogʻa Qorajonovga bayram sovgʻasini topshirdi.

Tuman Ichki ishlar boʻlimi Yoʻl harakati xavfsizligi boʻlinmasi xodimlari shu kuni Mangʻit shahrida istiqomat qiluvchi xizmat faxriysi Saidjon ogʻa Jumaboyev bilan ham uchrashib, ustozni bayram bilan tabrikladilar va bayram sovgʻasi topshirdilar. Oʻz navbatida Saidjon ogʻa Jumaboyev ham davlatimiz tomonidan koʻrsatilayotgan eʼtibor va ragʻbat uchun, qolaversa, shogirdlarining tashrifi, samimiy tilaklari uchun minnatdorlik bildirdi.

Ustozga hurmat va ehtirom koʻrsatish — azaliy qadriyat, qolaversa, bizning yoʻllarimizni oydin, hayotimizni nurafshon qilgan ustozlar hayoti va ularning fidokorona mehnati, yuksak insoniy sifatlari har birimiz uchun haqiqiy hikmatlar xazinasidir. Ulugʻ hazrat Mir Alisher Navoiy chuqur ehtirom bilan aytganlaridek:

"Haq yoʻlinda kim sanga bir harf oʻqutmish ranj ila,

Aylamak boʻlmas ado oning haqin ming ganj ila".

Zero, ustozga ehtirom — bu taqdir insonga ravo koʻrgan baxt-u saodatga, farovon hayotga, kelajakka ehtiromdir.

ROBIYa YOʻLDOShEVA.