ТАДБИРЛАРИМИЗ ЁШЛАР САЛОҲИЯТИНИ ЮКСАЛТИРИШГА ХИЗМАТ ҚИЛМОҚДА
Глобаллашув жараёни тезкорлик билан кечаётган бугунги кунда ёшларда умуминсоний қадриятларга ҳурмат, Ватанга муҳаббат, аждодларимизнинг маънавий меросига эгалик ҳиссини шакллантириш, уларни баркамол қилиб тарбиялаш, ҳуқуқий саводхонлигини ошириш, ўз ҳақ-ҳуқуқларини тўла англаб олишларига эришиш, тезкор тараққиёт асрида ҳаётда ўз ўринларини топишига кўмаклашиш, "Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида”ги Ўзбекистон Республикаси Президентининг Қарорида таъкидланганидек, мамлакатимизда амалга оширилаётган кенг кўламли ислоҳотларда ёшларнинг фаол иштирокини таъминлаш, юксак маънавиятли, мустақил ва эркин фикрлайдиган, замонавий илм-фан ютуқларини пухта ўзлаштирган ҳар томонлама соғлом ва баркамол авлодни вояга етказиш – бугунги кунимизнинг устувор вазифаларидандир.
Шу мақсадда "Камолот” ёшлар ижтимоий ҳаракати туман Кенгаши ёшлар учун бир қанча лойиҳаларни амалга оширмоқда, ҳамкор ташкилотлар билан бирга мактаблар, ўрта махсус, касб-ҳунар таълими муассасалари ўқувчи-ёшлари орасида турли кўрик-танловлар, давра суҳбатлари, учрашувлар ўтказмоқда.
29 март куни туман ҳокимлиги биносида "Ҳоким ва ёшлар” деб номланган учрашув ўтказилди.
Учрашувда туман ҳокими биринчи ўринбосари Б.Эрназаров, ҳоким ўринбосари, Хотин-қизлар қўмитаси раиси М.Аҳмедова ва туманда фаолият кўрсатаётган корхона, ташкилотлар раҳбарлари иштирок этдилар.
Учрашувда ёшларда тадбиркорлик кўникмаларини шакллантиришга кўмаклашиш ва уларни мазкур соҳа имкониятлари билан таништириш, ёшларни тадбиркорлик соҳасига жалб этиш борасида қизиқарли маърузалар тингланди, ўрта махсус, касб-ҳунар таълими муассасалари битирувчиларининг тадбиркорлик фаолиятини бошлашлари учун яратилаётган имкониятлар ҳақида батафсил тушунча берилди.
Шу йилнинг 27 март куни "Камолот” ЁИҲ туман Кенгаши ҳамкор ташкилотлар билан бирга мудофаага кўмаклашувчи "Ватанпарвар” ташкилоти майдончасида "Шунқорлар” ҳарбий спорт мусобақасининг туман босқичини ўтказди.
Мусобақада тумандаги 7 та ўрта махсус, касб-ҳунар таълими муассасалари ўқувчилари жамоалари сафда юриш, сафда қўшиқ айтиш, ижтимоий-сиёсий ва ҳуқуқий, жисмоний тайёргарлиги бўйича синовдан ўтказилди.
Мусобақанинг барча шартларини аъло даражада бажарган 3-сонли Амударё академик лицейининг "Амир Темур издошлари” жамоаси туман босқичи ғолиби, дея эътироф этилди ва мазкур мусобақанинг Қорақалпоғистон Республикаси ҳудудий босқичига йўлланмани қўлга киритди.
31 март куни туман Маданият ва спорт ишлари бўлимида туманимиздаги ўрта махсус, касб-ҳунар таълими муассасалари ўқувчилари орасида ўқувчиларнинг ҳуқуқий билимларини янада мустаҳкамлаш ва амалий кўникмаларини ривожлантириш, уларни Ўзбекистон Республикаси Конституцияси ва бошқа қонун ҳужжатларига ҳурмат руҳида тарбиялаш, мамлакатимиз суд-ҳуқуқ, ижтимоий-иқтисодий тизимида амалга оширилаётган ислоҳотларнинг мазмун-моҳияти билан яқиндан таништириш, иқтидорли ёшларни аниқлаш, ижтимоий фаоллигини ошириш ҳамда уларнинг ўз иқтидорларини намойиш этишларига имконият яратиш мақсадида "Сиз қонунни биласизми?” деб номланган кўрик-танловнинг туман босқичи ўтказилди.
Кўрик-танлов ёшларимизнинг барчаси ҳам сиёсий саводхон, жамиятимиз ҳаётида фаол ва интеллектуал салоҳиятли эканлигини кўрсатди.
Ўтказаётган тадбирларимиз ёшлар билими, фаоллигини оширишга хизмат қилаётгани билан ҳам жуда аҳамиятлидир.
М.ЎРОЗБОЕВ,
"Камолот” ЁИҲ туман Кенгаши раиси.
(Фото - https://www.gazeta.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
