УЛАР БИЗНИНГ ФАХРИМИЗ
Иккинчи жаҳон уруши бошланган даврларда Тўрткўл шаҳридаги педагогика билим юртини тугатиб, Қипчоқ овулидаги мактаблардан бирида ўқитувчилик қилаётган Амин Ибрагимов ҳам барча ёшлар қаторида Ватан ҳимоясига отланди.
У 1943 йилдан бошлаб, Пенза областидаги 98-ўқчилар полкида, Орловск областидаги 396-ўқчилар полкида, Брянск фронтидаги 369-ўқчилар полкида, кейинчалик Калинин фронтида ҳаракат қилган 68-ўқчилар полкида жанг қилган. А.Ибрагимов бир неча бор бошидан, қўли ва оёғидан ярадор бўлишига қарамай, жанг майдонини тарк этмаган. У Иккинчи жаҳон урушида кўрсатган жасоратлари учун Ватанимизнинг бир қанча орден ва медаллари билан мукофотланган.
Амин Ибрагимов уруш тугаганидан кейин Тошкент Олий партия мактабини тамомлаб, партия ишларида ва раҳбарлик лавозимларида фаолият кўрсатган.
Урушдан олдинги йилларда ўқитувчи бўлишни орзу қилган Хитой овуллик Айбарша Каракулова ҳам Тўрткўл шаҳридаги педагогика билим юртига ўқишга кирган. Бу билим юртини тугатганидан кейин унда ўқишни яна давом эттириш нияти пайдо бўлган ва Қозоғистон Давлат Университетининг немис тили факультетига ўқишга кирган.
Кўпчилик талабалар қатори урушга сафарбар этилган Айбарша жанг майдонларида алоқачи, кейинчалик тилмоч вазифаларини бажарди. Айбарша Каракулова кўплаб оғир жангларда йигитлар қатори мардлик ва жасорат намуналарини кўрсатди.
Жангчи қиз уруш тугагандан кейин кўкси тўла орден ва медаллар билан ота-онаси бағрига – Қипчоқ овулига эсон-омон қайтиб келди. Икки собиқ жангчи бир-бирига кўнгил қўйишиб, турмуш қуришди ва умрларининг охирларигача Манғит шаҳрида бахтли ҳаёт кечиришди.
Булар – бизнинг отамиз Амин Ибрагимов ва онамиз Айбарша Каракуловалар эдилар. Улар оламдан ўтган бўлсалар ҳам ҳамон элдошлари хотирасида меҳрибон инсон ва жонкуяр устоз сифатида яшаб келишмоқда.
Биз – фарзандлар ота-оналаримизнинг жасур ва фидойи инсонлар бўлганликлари билан ҳамиша фахрланамиз. Улар нафақат бизнинг, балки барча амударёликларнинг фахридирлар. Биз фарзандлар Иккинчи жаҳон урушида қозонилган ғалаба куни арафасида "Жойларингиз ҳамиша жаннатда бўлсин, отажон ва онажон!” дея тилак билдирамиз.
Ражаб, Умида, Алибек, Венера ва Одилбек Ибрагимовлар.
(Фото - http://pressnews.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
