Туман Прокуратураси масъуллари соҳа фахрийларининг хонадонларига бориб, уларни байрам билан табриклади

Ҳар бир жамиятда устозларга бўлган ҳурмат ва эҳтиром юксак қадрият ҳисобланади. Улар бизга нафақат билим ва ҳунар ўргатади, балки ҳаётда тўғри йўлни топишга, комил инсон бўлиб камолга етишимизга ёрдам беради. Бу муҳим анъана прокуратура тизимида ҳам изчил давом эттириб келинмоқда. Мустақиллик байрами арафасида Амударё тумани прокуратураси ходимлари тизим фахрийларини байрам билан муборакбод этиш мақсадида уларнинг хонадонларига ташриф буюришди.

Туман прокурори Баҳром Машарипов бошчилигида масъуллар дастлаб прокуратура тизимида турли лавозимларда ишлаган фахрий Гулчеҳра Сапарбаеванинг хонадонига ташриф буюриб, унинг ҳолидан хабар олишди.

Нафақадаги фахрий ўз шогирдлари ва издошларининг ташрифидан мамнун бўлиб, бугунги кунда ҳуқуқни муҳофаза қилиш органлари, хусусан, прокуратура тизимида амалга оширилаётган ислоҳотлардан фахрланишини билдирди. У ўз касбий фаолияти давомида тўплаган бой тажрибаси билан ўртоқлашар экан, издошларига қонун устуворлигини таъминлашда доимо адолат ва ҳалолликни биринчи ўринга қўйиш зарурлигини таъкидлади. Самимий суҳбат давомида фахрий ўзининг узоқ йиллик меҳнатлари эътибордан четда қолмаганидан мамнунлигини, бундай ташрифлар унга куч-ғайрат бағишлашини айтиб, ёшларга ўз маслаҳатларини берди.

Шундан сўнг, умр бўйи прокуратура соҳасида фидоий меҳнат қилган, кўп йиллар давомида туман прокурори лавозимида ишлаган Гулора Бобожонованинг хонадонига ҳам ташриф буюрилди.

Учрашув давомида Гулора Бобожонова прокуратура тизимидаги кўп йиллик фаолиятини, ўша даврдаги қийинчиликлар ва эришилган ютуқларни эслаб, бугунги кунда соҳада эришилаётган ютуқлар, яратилган шароитлардан мамнунлигини изҳор қилди. У ёш ҳамкасбларига мурожаат қилиб, халқнинг ишончини оқлаш, ҳар бир мурожаат ортида инсон тақдири турганини унутмаслик кераклигини алоҳида таъкидлади. Унинг фидойилиги ва касбига содиқлиги ташриф буюрганлар учун чинакам ибрат намунаси бўлди.

Ундан кейин эса масъуллар прокуратура тизимининг яна бир фахрийси Жумамурат Хайтбаевнинг хонадонига бордилар. Жумамурат Хайтбаев ҳам ўз навбатида прокуратура ходимларининг ташрифидан ғоятда хурсанд бўлганини яширмади. У ўзининг сермазмун ҳаёт йўли, прокуратура тизимида адолатни қарор топтириш йўлидаги машаққатли меҳнатлари ҳақида сўзлаб берди. Фахрийнинг ҳар бир сўзида ўз касбига бўлган чексиз муҳаббат ва масъулият ҳисси мужассам эди. У ёшларга оқ фотиҳа бериб, уларнинг келгуси ишларига муваффақиятлар тилади. Бундай самимий ва дилдан қилинган суҳбатлар ёш ходимлар қалбида унутилмас из қолдирди.

Ташриф давомида барча фахрийларга Ўзбекистон Республикаси прокуратура органлари фахрийларини ижтимоий қўллаб-қувватлаш жамоатчилик марказининг байрам табриклари ўқиб эшиттирилиб, қимматбаҳо совғалар топширилди.

Бундай эътибор ва эътироф фидойи ва камтарин инсонлар, ўз соҳасининг етук билимдонлари, прокуратура органларида узоқ йиллар самарали ишлаган фахрийларнинг меҳнати қадрланаётганини кўрсатади. Бу ташаббус мамлакатимизда инсон омилига берилаётган эътиборнинг ёрқин намунасидир.

Ушбу ташриф прокуратура органларида ҳам устоз-шогирд анъаналари давом этаётганининг амалий исботи бўлди. Бу ерда тажрибали кадрлар ёш мутахассисларга билим ва тажриба улашиб, фахрийларнинг ҳаёт йўли ёшлар учун ибрат мактаби сифатида қадрланмоқда. Бу каби эзгу амаллар жамиятда ўзаро ҳурмат ва ҳамжиҳатликни мустаҳкамлашда, адолатни қарор топтиришда ва инсон ҳуқуқларини изчил ҳимоя қилишда муҳим восита бўлиши шубҳасиз.