ULAR BIZNING FAXRIMIZ
Ikkinchi jahon urushi boshlangan davrlarda Toʻrtkoʻl shahridagi pedagogika bilim yurtini tugatib, Qipchoq ovulidagi maktablardan birida oʻqituvchilik qilayotgan Amin Ibragimov ham barcha yoshlar qatorida Vatan himoyasiga otlandi.
U 1943-yildan boshlab, Penza oblastidagi 98-oʻqchilar polkida, Orlovsk oblastidagi 396-oʻqchilar polkida, Bryansk frontidagi 369-oʻqchilar polkida, keyinchalik Kalinin frontida harakat qilgan 68-oʻqchilar polkida jang qilgan. A.Ibragimov bir necha bor boshidan, qoʻli va oyogʻidan yarador boʻlishiga qaramay, jang maydonini tark etmagan. U Ikkinchi jahon urushida koʻrsatgan jasoratlari uchun Vatanimizning bir qancha orden va medallari bilan mukofotlangan.
Amin Ibragimov urush tugaganidan keyin Toshkent Oliy partiya maktabini tamomlab, partiya ishlarida va rahbarlik lavozimlarida faoliyat koʻrsatgan.
Urushdan oldingi yillarda oʻqituvchi boʻlishni orzu qilgan Xitoy ovullik Aybarsha Karakulova ham Toʻrtkoʻl shahridagi pedagogika bilim yurtiga oʻqishga kirgan. Bu bilim yurtini tugatganidan keyin unda oʻqishni yana davom ettirish niyati paydo boʻlgan va Qozogʻiston Davlat Universitetining nemis tili fakultetiga oʻqishga kirgan.
Koʻpchilik talabalar qatori urushga safarbar etilgan Aybarsha jang maydonlarida aloqachi, keyinchalik tilmoch vazifalarini bajardi. Aybarsha Karakulova koʻplab ogʻir janglarda yigitlar qatori mardlik va jasorat namunalarini koʻrsatdi.
Jangchi qiz urush tugagandan keyin koʻksi toʻla orden va medallar bilan ota-onasi bagʻriga – Qipchoq ovuliga eson-omon qaytib keldi. Ikki sobiq jangchi bir-biriga koʻngil qoʻyishib, turmush qurishdi va umrlarining oxirlarigacha Mangʻit shahrida baxtli hayot kechirishdi.
Bular – bizning otamiz Amin Ibragimov va onamiz Aybarsha Karakulovalar edilar. Ular olamdan oʻtgan boʻlsalar ham hamon eldoshlari xotirasida mehribon inson va jonkuyar ustoz sifatida yashab kelishmoqda.
Biz – farzandlar ota-onalarimizning jasur va fidoyi insonlar boʻlganliklari bilan hamisha faxrlanamiz. Ular nafaqat bizning, balki barcha amudaryoliklarning faxridirlar. Biz farzandlar Ikkinchi jahon urushida qozonilgan gʻalaba kuni arafasida "Joylaringiz hamisha jannatda boʻlsin, otajon va onajon!” deya tilak bildiramiz.
Rajab, Umida, Alibek, Venera va Odilbek Ibragimovlar.
(Foto - http://pressnews.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
