“Sarhad” jamoasi aʼzolari va ularning ota-onalari ragʻbatlantirildi

Yosh avlod tarbiyasi, ularning qalbida Vatanga boʻlgan muhabbat va sadoqat tuygʻularini yuksaltirish har bir jamiyatning eng muhim vazifalaridan biri hisoblanadi. Mamlakatimizning ertangi kuni, sarhadlarimiz daxlsizligi va osoyishtaligimiz aynan bugungi kunda kamol topayotgan yoshlarimizning qanday taʼlim-tarbiya olishiga bevosita bogʻliqdir. Shu maʼnoda, Qoraqalpogʻiston Respublikasining turli hududlarida yoshlarni vatanparvarlik ruhida tarbiyalash, ularning jismoniy va jangovar tayyorgarligini oshirish maqsadida tizimli ishlar amalga oshirilmoqda. Ana shunday ezgu saʼy-harakatlarning yorqin namunasini Amudaryo tumanidagi 17-sonli umumiy oʻrta taʼlim maktabi faoliyati misolida yaqqol koʻrishimiz mumkin. Ushbu taʼlim dargohi jamoasi yosh avlodga munosib taʼlim-tarbiya berish, ularni bilimli, salohiyatli va eng asosiysi, oʻz yurtiga sadoqatli insonlar etib voyaga yetkazish yoʻnalishida salmoqli natijalarni qoʻlga kiritib kelmoqda.

Bugungi kunda mazkur taʼlim muassasasida jami 366 nafar oʻquvchi tahsil olmoqda. Ularga oʻz kasbining fidoyilari boʻlgan 40 nafar malakali pedagog xodimlar tomonidan zamonaviy talablar va ilgʻor yondashuvlar asosida taʼlim-tarbiya berilmoqda. Taʼkidlash joizki, maktabda faoliyat yuritayotgan oʻqituvchilarning 22,5 foizi nufuzli xalqaro va milliy sertifikatlarga ega boʻlib, bu koʻrsatkich taʼlim sifatining tobora yuksalib borayotganidan dalolat beradi. Ustozlarning tinimsiz mehnati va izlanishlari oʻz natijasini koʻrsatmoqda. Xususan, oʻtgan oʻquv yilida maktab bitiruvchilarining 30 foizi oliy taʼlim muassasalariga oʻqishga qabul qilinib, talabalik baxtiga muyassar boʻldilar va oʻz ustozlari hamda ota-onalarining umid va ishonchini toʻlaqonli oqladilar.

Aynan mana shunday zahmatkash pedagoglar mehnat qilayotgan va iqtidorli oʻquvchilar jamoasiga ega boʻlgan maktab hayotida yaqinda yana bir ulkan quvonchli voqea roʻy berdi. Joriy yilning 29-aprel kuni Qoraqalpogʻiston Respublikasi boʻyicha oʻquvchi yoshlar oʻrtasida oʻtkazilgan “Yosh chegarachilar” harbiy sport musobaqasining respublika bosqichida mazkur maktabning “Sarhad” jamoasi oʻzining yuksak salohiyatini namoyish qilib, munosib ishtirok etdi. Ushbu nufuzli va murosasiz bellashuvda tuman shaʼnini himoya qilgan yoshlarimiz faxrli 2-oʻrinni egallashga muvaffaq boʻldilar.

Ushbu ulkan muvaffaqiyatni keng nishonlash va gʻoliblarni munosib taqdirlash maqsadida maktabda katta tantanali tadbir tashkil etildi. Tadbirga hududdagi harbiy qism masʼullari, maktab maʼmuriyati, ustoz-oʻqituvchilar, oʻquvchilar, “Sarhad” jamoasining aʼzolari hamda ularni doimo qoʻllab-quvvatlab kelayotgan ota-onalari taklif etildi. Maktabning keng hovlisi va sahnasi bayramona bezatilib, milliy kuy-qoʻshiqlarning joʻshqin sadolari ostida tadbir ishtirokchilari katta hurmat va ehtirom bilan kutib olindi.

Tadbirni maktab direktori kirish soʻzi bilan ochib berar ekan, “Yosh chegarachilar” musobaqasida erishilgan bu yuksak muvaffaqiyat nafaqat bir jamoaning, balki butun maktabning, ovul ahlining, qolaversa, butun tumanning chinakam sharafi ekanligini alohida taʼkidlab oʻtdi.

Aytish joizki, mazkur musobaqa juda keskin kurashlarga boy boʻldi. Respublika bosqichida Qoʻngʻirot, Taxtakoʻpir, Shoʻmanay, Xoʻjayli, Amudaryo va Taxiyatosh tumanlarining eng sara va kuchli jamoalari oʻzaro bellashdilar. Ishtirokchilar oʻzlarining jismoniy, maʼnaviy va harbiy tayyorgarliklarini 11 ta murakkab shart boʻyicha sinovdan oʻtkazdilar. Xususan, saf maydonida shaxdam qadamlar bilan yurish, vatanparvarlik ruhidagi harbiy qoʻshiq aytish, avtomatni qismlarga ajratish va yigʻish, uzoq masofaga granata uloqtirish, turnikda tortilish, belgilangan masofaga tezkor yugurish, yaradorlarga birinchi tibbiy yordam koʻrsatish hamda nazariy bilimlar sinovi kabi mashqlarda yoshlar oʻz mahoratlarini namoyish etishdi. Quvonarlisi shundaki, “Sarhad” jamoasi aʼzolari barcha bosqichlarda oʻzlarining beqiyos chidamliligi, irodasi, jasorati va jamoaviy jipsligi bilan hakamlar hayʼati va koʻpchilik tomoshabinlarning qizgʻin olqishiga sazovor boʻldilar.

Tantanali tadbir davomida “Sarhad” jamoasining har bir aʼzosiga esdalik sovgʻalari topshirildi. Yoshlar oʻz mehnati, tirishqoqligi va jasoratiga munosib tarzda taqdirlandi. Shu bilan birga, oʻz farzandlarini Vatanga cheksiz muhabbat ruhida tarbiyalab kelayotgan, ularning qalbida vatanparvarlik tuygʻularini shakllantirishda katta hissa qoʻshgan ota-onalarga 17-sonli maktab maʼmuriyati va pedagogik jamoasi nomidan samimiy minnatdorlik bildirilib, maxsus tashakkurnomalar taqdim etildi.

Tadbir soʻngida soʻzga chiqqan jamoa murabbiysi hamda ota-onalar vakillari farzandlarining bunday ulkan muvaffaqiyati uchun taʼlim muassasasi maʼmuriyatiga, zahmatkash ustozlarga va yaqindan yordam koʻrsatgan harbiy qism xodimlariga oʻzlarining cheksiz minnatdorchiliklarini izhor etdilar. Oʻz navbatida, “Sarhad” jamoasi aʼzolari kelgusida boʻlib oʻtadigan musobaqalarda bundanda yuqori natijalarni qayd etib, mutlaq gʻoliblikni qoʻlga kiritish maqsadida astoydil tayyorgarlik koʻrishlarini qatʼiyat bilan maʼlum qildilar.

Darhaqiqat, bugungi kunda shiddat bilan rivojlanib borayotgan jamiyatimizda yosh avlodni har tomonlama barkamol, jismonan baquvvat, maʼnan yetuk va chinakam vatanparvar insonlar qilib tarbiyalashda bu kabi tadbirlarning, harbiy-vatanparvarlik yoʻnalishidagi sport musobaqalarining oʻrni va ahamiyati beqiyosdir. Amudaryo tumanidagi 17-sonli maktabda oʻtkazilgan mazkur tadbir ham aynan shu olijanob maqsadga, yaʼni Vatanga sadoqatli, uning sarhadlarini himoya qilishga doimo tayyor boʻlgan sogʻlom avlodni kamolga yetkazishdek buyuk vazifaga xizmat qilishi bilan ahamiyatlidir.