Жайхун илҳомлари

Сен бирла...

Сен бирла сўзлашсам,

Соғинч ҳаддин ошар.

Саҳар-ла сирлашсам,

Кўздин уйқу қочар.

Дафтар-ла гаплашсам,

Дардлар саҳфа очар,

Жафокорлик наҳот,

Сенга ярашар?

 Гулзорда

Гулзорда капалак ўйнайди,

Гулларни тинчига қўймайди.

Кўрган кўз учқунлаб, қувнайди,

Тасвирга суқланиб тўймайди.

Боғимнинг безаги бу ҳолат –

Дилимга жойлади ҳаловат.

Қалбимга етишган ҳарорат,

Оз эмас бўлса ҳам, тўлмайди.

Капалак, жонимни берай ман,

Нигоҳинг измида юрай ман,

Сенга шеър айтмоққа ярайман –

Кўнглингни очмасанг бўлмайди.

Бир инсонни...

Бир инсонни кузатдик бугун,

Кетаверди қаримасидан.

Зўр инсонни кузатдик беун,

Чалғитмади қушлар саси ҳам.

Қайғу чеккан халойиқ маҳзун,

Интиҳони ўйлаб турарлар.

Одам умри қушлардан узун -

Эмаслигин дилга туярлар.

Сабр айламоқ бандаларга хос,

Бардош бергай оиласига.

Биздан фарздир садоқат, ихлос,

Одамийлик қоидасига!

Дўстлар қолди ҳасратли, ҳайрон,

Дош бермоқлик зарбга осонми.

Саф тортганнинг ҳолати вайрон,

Таъсирида сақлар ҳар ённи...

Э воҳ! Элтиб энг қадрдонни,

Ва... Йўқотдик асл инсонни!

Яшил барглар

Яшил барглар - юрак қувончим,

Яралишнинг рангидир улар.

Оширади одам ишончин,

Яшайлик деб чақириб турар.

Ёқимли ҳид урар димоққа,

Кўтаради кўнглимнинг мулкин.

Ҳавас қилиб, боқиб ҳар ёққа,

Келаверар жилмайгим, кулгим.

Япроқларга яқинроқ бориб,

Дил сўзларим айтгим келади.

Хатарлардан қалбни қутқариб,

Ҳаёт ёққа қайтгим келади.

Яшил барглар - яхши баргларим,

Яшамоқнинг сизлар тимсоли.

Сизлар билан ошно ҳарфларим,

Илҳомимга дўстсиз - вафоли!

ТЎРТЛИКЛАР

Машҳурликка кўп-да уринма, кўнглим,

Кўплар пуч хаёлдан холи эмаслар.

Сабрга дўст тутиниб, камига кўндинг,

Не даркор зиёда ҳою-ҳаваслар.

* * *

Исминг ҳуснинг каби мафтункор ғунча,

Айтган сайин айтиб юргим келади.

Қанча керак бўлса, бардошим шунча,

Висолингга маҳтал тургим келади.

* * *

Эгнимда тунимнинг салқин либоси -

Чарчоқли кунимнинг таскин - шифоси.

Тангримга тун учун шукронам бисёр,

Эртангги тонгдан ҳам умидларим бор.

* * *

Рангин хаёлларим ёришган ҳолда,

Олтин дамларимни тутарман азиз.

Манзилим мароқли - мақсад бор олдда,

Ҳорғин йўллар эса ҳордиқли, лазиз!

Жумабой Ҳидоятов, "Жайхун илҳомлари” ННТ аъзоси.