Jayxun ilhomlari

Sen birla...

Sen birla soʻzlashsam,

Sogʻinch haddin oshar.

Sahar-la sirlashsam,

Koʻzdin uyqu qochar.

Daftar-la gaplashsam,

Dardlar sahfa ochar,

Jafokorlik nahot,

Senga yarashar?

 Gulzorda

Gulzorda kapalak oʻynaydi,

Gullarni tinchiga qoʻymaydi.

Koʻrgan koʻz uchqunlab, quvnaydi,

Tasvirga suqlanib toʻymaydi.

Bogʻimning bezagi bu holat –

Dilimga joyladi halovat.

Qalbimga yetishgan harorat,

Oz emas boʻlsa ham, toʻlmaydi.

Kapalak, jonimni beray man,

Nigohing izmida yuray man,

Senga sheʼr aytmoqqa yarayman –

Koʻnglingni ochmasang boʻlmaydi.

Bir insonni...

Bir insonni kuzatdik bugun,

Ketaverdi qarimasidan.

Zoʻr insonni kuzatdik beun,

Chalgʻitmadi qushlar sasi ham.

Qaygʻu chekkan xaloyiq mahzun,

Intihoni oʻylab turarlar.

Odam umri qushlardan uzun -

Emasligin dilga tuyarlar.

Sabr aylamoq bandalarga xos,

Bardosh bergay oilasiga.

Bizdan farzdir sadoqat, ixlos,

Odamiylik qoidasiga!

Doʻstlar qoldi hasratli, hayron,

Dosh bermoqlik zarbga osonmi.

Saf tortganning holati vayron,

Taʼsirida saqlar har yonni...

E voh! Eltib eng qadrdonni,

Va... Yoʻqotdik asl insonni!

Yashil barglar

Yashil barglar - yurak quvonchim,

Yaralishning rangidir ular.

Oshiradi odam ishonchin,

Yashaylik deb chaqirib turar.

Yoqimli hid urar dimoqqa,

Koʻtaradi koʻnglimning mulkin.

Havas qilib, boqib har yoqqa,

Kelaverar jilmaygim, kulgim.

Yaproqlarga yaqinroq borib,

Dil soʻzlarim aytgim keladi.

Xatarlardan qalbni qutqarib,

Hayot yoqqa qaytgim keladi.

Yashil barglar - yaxshi barglarim,

Yashamoqning sizlar timsoli.

Sizlar bilan oshno harflarim,

Ilhomimga doʻstsiz - vafoli!

TOʻRTLIKLAR

Mashhurlikka koʻp-da urinma, koʻnglim,

Koʻplar puch xayoldan xoli emaslar.

Sabrga doʻst tutinib, kamiga koʻnding,

Ne darkor ziyoda hoyu-havaslar.

* * *

Isming husning kabi maftunkor gʻuncha,

Aytgan sayin aytib yurgim keladi.

Qancha kerak boʻlsa, bardoshim shuncha,

Visolingga mahtal turgim keladi.

* * *

Egnimda tunimning salqin libosi -

Charchoqli kunimning taskin - shifosi.

Tangrimga tun uchun shukronam bisyor,

Ertanggi tongdan ham umidlarim bor.

* * *

Rangin xayollarim yorishgan holda,

Oltin damlarimni tutarman aziz.

Manzilim maroqli - maqsad bor oldda,

Horgʻin yoʻllar esa hordiqli, laziz!

Jumaboy Hidoyatov, "Jayxun ilhomlari” NNT aʼzosi.