ЖАЙХУН ИЛҲОМЛАРИ

Ифтихор

Бир маромда айлангани каби ер,

Бир маромда инсон кечирса ҳаёт.

Ватан равнақи деб ҳар ким тўкиб тер,

Юртнинг парвозига бўлолса қанот.

Отанинг умидин оқласа фарзанд,

Яйратса бобонинг кўнглин невара.

Ҳаётда ташвишлар бўлса-да гарчанд,

Инсоннинг бахтига борми чегара?!

Уйингда бўлганда тўй ё маърака,

Яқин қариндошдай турса қўшнилар.

Топган-тутганингда бўлар барака,

Еган-ичганингга маза қўшилар.

Эрталаб иш сари уйингдан чиқсанг,

Аҳли оилангдан бўлиб хотиржам.

Кечқурун ишингдан уйга ошиқсанг,

Меҳнатинг роҳатин кўрмоққа баҳам.

Кекса ота-онанг кўнглини хушлаб,

Ҳар тонг, ҳар оқшомда ҳол сўраб турсанг,

Юрсанг ўгитларин ёдингда ушлаб,

Ажабмас ҳаётда қоқилмай юрсанг.

"Бундай осуда юрт қайда?” – деб ногоҳ

Кимдир савол бериб қолса ўша тоб.

Бизни таниганлар "Бўлингиз огоҳ,

Ўзбекистон – бу!” – деб беришар жавоб!

Аҳмад НАФАСОВ.

Онам каби севимли

Таърифингга шеър битдим бугун,

Меҳрим асло топмагай якун.

Муҳаббатим ошади ҳар кун,

Онам каби севимли Ватан.

Сени бир кун кўрмасам  – армон,

Сенга меҳрим беради дармон.

Керак бўлса бўлайин қурбон,

Онам каби севимли Ватан.

Хизматингда турай эрта-кеч,

Ғанимларни йўлатмайин ҳеч.

Ғанимларнинг хаёллари пуч,

Онам каби севимли Ватан.

Мустақил юрт -Ўзбекистоним,

Сенга фидо бу ширин жоним.

Манглайимга сурайин ноним,

Онам каби севимли Ватан.

Нишонлаймиз йигитлик ёшинг,

Кам бўлмасдан тутиб тик бошинг.

Порлайверсин иқбол қуёшинг,

Онам каби севимли Ватан.

Фарҳод АВЕЗОВ, "Жайхун илҳомлари” ННТ аъзоси.

ЖАННАТИМ – ЎЗБЕКИСТОН

Тоғлари булутга тенг,

Бағри осмон каби кенг.

Кенг бағри жаннатга тенг

Қирлари бағридан кенг.

Жаннатим – Ўзбекистон,

Ҳар гўшаси гулистон.

Боғларингни яшнатган,

Чевар қўлли қизларинг.

Бедов отни кишнатган,

Довюракдир ўғлонинг.

Жаннатим – Ўзбекистон,

Ҳар гўшаси гулистон.

Зулфиядек қизинг бор,

Бахтингдан куйлаб келган.

Алишердек ўғлонинг

Номинг элга танитган.

Жаннатим – Ўзбекистон,

Ҳар гўшаси гулистон.

Динора КАРИМБОЕВА, Амударё академик лицейи ўқувчиси.

Хива

Меъморларнинг санъати ўзинг,

Суронларга беролдинг бардош.

Ҳар ғиштингда юртим тарихи,

Бугун менга бўлдинг елкадош.

Миноралар кўкка устундир,

Ер юзини ҳайратга солган.

Эртакдаги биллур қасрлар,

Тимсолингдан андоза олган.

Кўҳна тарих бағрингда яшар,

Номдор шаҳар, улуғвор шаҳар.

Жамила ЯНГИБОЕВА,

"Ёш мухбир” тўгараги аъзоси.

ВАТАН

Мен мустақил юртда дунёга келдим,

Мустақиллик менинг ҳаётим, тонгим.

Баралла мадҳингни куйлайман Ватан,

Йўқдир дунёда армоним ҳеч ҳам.

Ватаннинг эртаси - порлоқ келгуси,

Мендурман бағрида бахтли қизчаси,

Улғайиб, бўлолсам юртим суянчи,

Ватан, сенга умрим ҳадя этаман.

Номингни энг суюк қўшиқдай билиб,

Ўзингни онамдек азиз тутаман.

Қадрингни кўтариб, отамдай билиб,

Ватан, ҳаётимни ҳадя этаман!

Феруза ЙЎЛДОШЕВА,

Манғит иқтисодиёт коллежи ўқувчиси.

Ёз келди

Юртимга келмоқда тароватли ёз,

Ёзда ҳамма ишлар албат бўлар соз.

Хайр, кўришгунча азиз мактабим,

Кўришгунча хайр, қадрли устоз.

Ёз келса, шодланар қувноқ болалар,

Кўнгиллар ёришар, тўлар ҳисларга.

Қуёш кулиб боқар бутун оламга,

Меҳр нурларини сочар бизларга.

Дарахтлар шохини оҳиста силаб,

Биз томон бир илиқ шамоллар елар.

Қувончли туйғулар дилни аллалаб,

Юртимга файз бериб фасли ёз келар.

Жавоҳир ЙЎЛДОШЕВ,

38-сонли мактаб ўқувчиси.