ҲАЛОЛ МЕҲНАТДАН ЗИЙНАТЛАНГАН ХОНАДОН

Мамлакатимизда инсон омилига, унинг бахтиёр ва фаровон яшашига қаратилаётган эътибор ва ғамхўрликлар ҳар бир оилада, ҳар бир инсон ҳаётида ўз ифодасини топмоқда. Юртимизнинг қайси бир хонадонига борманг, обод ва шинам ҳовли-жой, кўкаламзор боғларни кўриб кўзинг қувнайди одам.

- Истиқлол бизга ўз ўтириш-туришимиз, оиламиз, фарзандларимиз ҳақида қайғуриш, турмуш тарзимизни оқилона ташкил этиш имконини берди. Ҳозир деярли ҳар ҳафта  хонадонларимизга тиббиёт ходимлари, МФЙ ходимлари, ўқитувчилар келиб, ободонлиги, озодалиги ва ҳатто мактаб ёшидаги невараларимизнинг нима машғулотлар билан бандлигини ҳам сўраб-суриштириб, маслаҳатлар бериб кетишади. Илгари эса меҳнат кишисидан фақат иш... иш унуми талаб этилар, одамларнинг қандай  яшашига ҳеч ким қизиқмасди. Бугунги дориломон кунларга шукур қилиб, бардавом бўлмоғи учун курашишимиз керак, - дейди Манғит шаҳрининг Ойбек номли маҳалласида истиқомат қилувчи 75 ёшли отахон Кенжабой Қурбониёзов.

Отахоннинг болалик даври Иккинчи жаҳон уруши, урушдан кейинги оғир тикланиш йилларига, элнинг қаҳатчилик кунларига тўғри келди. Ота-онаси шундай бўлса-да унинг ўқиб, илм олишига шароит яратди. Мактабни тугатгач, олийгоҳда ўқиб, олий маълумотли агроном бўлди. 1965-67 йилларда Армия сафида хизмат қилди. 1968 йилдан 2001 йилгача қишлоқ хўжалиги соҳасида турли лавозимларда меҳнат қилди. Турмуш ўртоғи – бир умр ғишт заводида ишлаб, айни кунда нафақадаги меҳнат фахрийси Раҳима Ендирбоева билан 7 нафар фарзандни одоб-икромли, маънавиятли, эл корига ярайдиган инсонлар қилиб вояга етказишди. Ҳозир улар турли соҳаларда меҳнат қилишмоқда.

Ўғил-қизни ўқитиб, уйли-жойли қилиб, кўнгиллари хотиржам бўлган отахон ва онахон эндиликда неваралар тарбияси билан машғул, атрофи доим кичкинтойлари, маҳалладошлари ва қўни-қўшнилари билан гавжум бўлади. Ҳалол меҳнатдан обод, бир-бирига меҳр-оқибатдан ўзгача бир тароват ва файз касб этган бу хонадондаги бахтиёрликка, осойишталикка кўпчилик ҳавас билан қарайди. Юзларидан нур ёғилиб турган Кенжабой ота, аёли – оддий гапга ҳам ҳазил-мутойибадан тўн кийдириб, кулгули қилиб айтиб, дилингиздаги ғуборни аритиб юборадиган Раҳима момоларнинг хонадони шу боисдан ҳам доим гавжум бўлади.

Отахон ҳам, онахон ҳам ҳеч кимдан маслаҳатини, йўл-йўриғини аямайди. Саҳар туриб ҳовлиси атрофидаги, полизидаги мевали, манзарали дарахтларни парваришлаб, экинларига қараб, барчага шахсий ўрнак бўлишади.

 Уларнинг ҳаётига теранроқ разм солган киши оиладаги тинчлик, осойишталик ва аҳилликнинг киши ҳаётини нақадар тотли қила олишини англаши қийин эмас.

Бутун ҳаётини эл-юрт маъмурлиги  йўлидаги меҳнатга бағишлаган Кенжабой ота Қурбониёзов ва Раҳима она Ендирбоеваларга меҳнатларингиз роҳатини кўриб, узоқ яшанг, дея тилак билдирамиз.