HALOL MEHNATDAN ZIYNATLANGAN XONADON

Mamlakatimizda inson omiliga, uning baxtiyor va farovon yashashiga qaratilayotgan eʼtibor va gʻamxoʻrliklar har bir oilada, har bir inson hayotida oʻz ifodasini topmoqda. Yurtimizning qaysi bir xonadoniga bormang, obod va shinam hovli-joy, koʻkalamzor bogʻlarni koʻrib koʻzing quvnaydi odam.

- Istiqlol bizga oʻz oʻtirish-turishimiz, oilamiz, farzandlarimiz haqida qaygʻurish, turmush tarzimizni oqilona tashkil etish imkonini berdi. Hozir deyarli har hafta  xonadonlarimizga tibbiyot xodimlari, MFY xodimlari, oʻqituvchilar kelib, obodonligi, ozodaligi va hatto maktab yoshidagi nevaralarimizning nima mashgʻulotlar bilan bandligini ham soʻrab-surishtirib, maslahatlar berib ketishadi. Ilgari esa mehnat kishisidan faqat ish... ish unumi talab etilar, odamlarning qanday  yashashiga hech kim qiziqmasdi. Bugungi dorilomon kunlarga shukur qilib, bardavom boʻlmogʻi uchun kurashishimiz kerak, - deydi Mangʻit shahrining Oybek nomli mahallasida istiqomat qiluvchi 75 yoshli otaxon Kenjaboy Qurboniyozov.

Otaxonning bolalik davri Ikkinchi jahon urushi, urushdan keyingi ogʻir tiklanish yillariga, elning qahatchilik kunlariga toʻgʻri keldi. Ota-onasi shunday boʻlsa-da uning oʻqib, ilm olishiga sharoit yaratdi. Maktabni tugatgach, oliygohda oʻqib, oliy maʼlumotli agronom boʻldi. 1965-67-yillarda Armiya safida xizmat qildi. 1968-yildan 2001-yilgacha qishloq xoʻjaligi sohasida turli lavozimlarda mehnat qildi. Turmush oʻrtogʻi – bir umr gʻisht zavodida ishlab, ayni kunda nafaqadagi mehnat faxriysi Rahima Yendirboyeva bilan 7 nafar farzandni odob-ikromli, maʼnaviyatli, el koriga yaraydigan insonlar qilib voyaga yetkazishdi. Hozir ular turli sohalarda mehnat qilishmoqda.

Oʻgʻil-qizni oʻqitib, uyli-joyli qilib, koʻngillari xotirjam boʻlgan otaxon va onaxon endilikda nevaralar tarbiyasi bilan mashgʻul, atrofi doim kichkintoylari, mahalladoshlari va qoʻni-qoʻshnilari bilan gavjum boʻladi. Halol mehnatdan obod, bir-biriga mehr-oqibatdan oʻzgacha bir tarovat va fayz kasb etgan bu xonadondagi baxtiyorlikka, osoyishtalikka koʻpchilik havas bilan qaraydi. Yuzlaridan nur yogʻilib turgan Kenjaboy ota, ayoli – oddiy gapga ham hazil-mutoyibadan toʻn kiydirib, kulguli qilib aytib, dilingizdagi gʻuborni aritib yuboradigan Rahima momolarning xonadoni shu boisdan ham doim gavjum boʻladi.

Otaxon ham, onaxon ham hech kimdan maslahatini, yoʻl-yoʻrigʻini ayamaydi. Sahar turib hovlisi atrofidagi, polizidagi mevali, manzarali daraxtlarni parvarishlab, ekinlariga qarab, barchaga shaxsiy oʻrnak boʻlishadi.

 Ularning hayotiga teranroq razm solgan kishi oiladagi tinchlik, osoyishtalik va ahillikning kishi hayotini naqadar totli qila olishini anglashi qiyin emas.

Butun hayotini el-yurt maʼmurligi  yoʻlidagi mehnatga bagʻishlagan Kenjaboy ota Qurboniyozov va Rahima ona Yendirboyevalarga mehnatlaringiz rohatini koʻrib, uzoq yashang, deya tilak bildiramiz.