300 ga yaqin xonadon ilk bor toza ichimlik suvi bilan taʼminlandi

Inson hayotini, uning kundalik turmushi va salomatligini toza ichimlik suvisiz tasavvur etib boʻlmaydi. Soʻnggi yillarda mamlakatimizning eng chekka hududlarida ham aholini toza va xavfsiz ichimlik suvi bilan taʼminlash borasida keng koʻlamli islohotlar jadal surʼatlarda amalga oshirilmoqda. Bu boradagi davlat siyosatining ustuvor yoʻnalishlaridan biri sifatida, chekka qishloq va ovullar infratuzilmasini tubdan yaxshilash maqsadida tizimli loyihalar hayotga tatbiq etilib, ularning amaliy natijasi olis manzillarda ham yaqqol namoyon boʻlmoqda.

Xususan, Oʻzbekiston Respublikasi Prezidentining 2023-yil 25-dekabrdagi “2024-2026-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qarori ijrosini taʼminlash maqsadida joylarda keng koʻlamli bunyodkorlik ishlari olib borildi. Ushbu muhim hujjat asosida Amudaryo tumanida joylashgan Boʻz solma ovuli hududidagi “Yoʻldosh Oʻrazbaev” suv olish inshooti ham toʻliq va zamonaviy talablar asosida rekonstruktsiya qilindi. Loyiha doirasida mazkur hududda umumiy uzunligi 26,3 kilometrni tashkil etuvchi yangi ichimlik suv tarmoqlari tortilib, foydalanishga topshirildi.

Ushbu ulkan saʼy-harakatlarning quvonchli natijasi oʻlaroq, 300 ga yaqin xonadonlar oʻz tarixida ilk bor markazlashgan, toza ichimlik suvi bilan taʼminlandi. Bu nafaqat infratuzilmaning yangilanishi, balki yuzlab odamlarning kundalik turmush tarzi yengillashib, ijtimoiy-iqtisodiy rivojlanish sari tashlangan juda muhim qadam boʻldi.

Albatta, ichimlik suvi infratuzilmasini barpo etish bilan ish bitmaydi, uning barqaror va uzluksiz ishlashini taʼminlash, isteʼmol madaniyatini shakllantirish ham gʻoyat dolzarb vazifadir. Shu maqsadda, Qoraqalpogʻiston Respublikasi Qurilish va uy-joy kommunal xoʻjaligi sohasida hududiy nazorat qilish inspektsiyasi hamda “Qoraqalpoq suv taʼminoti” aktsiyadorlik jamiyati tomonidan hamkorlikda tizimli nazorat va oʻrganish ishlari olib borilmoqda.

Yangidan suv tarmoqlari tortilgan hududlarda aholi va taʼminotchi oʻrtasidagi shartnomaviy munosabatlarni qonuniy tartibga solish, fuqarolarni rasmiy xizmatlar bilan toʻliq qamrab olish hamda toʻlov intizomini mustahkamlash ishlariga alohida eʼtibor qaratilmoqda.

Jumladan, 2026-yilning birinchi choragida inspektsiya mutaxassislari tomonidan Qoraqalpogʻiston boʻylab jami 16 ta mahallada uyma-uy yurib, xonadonma-xonadon keng qamrovli oʻrganish ishlari amalga oshirildi. Jarayon davomida aholiga ichimlik suvidan oqilona va tejab foydalanish, koʻrsatilayotgan xizmatlardan qonuniy asosda foydalanishning ahamiyati, shartnoma tuzish tartib-qoidalari, shuningdek, davlat tomonidan berilayotgan mavjud imtiyoz va qulayliklar haqida batafsil tushuntirishlar berildi.

Oʻrganishlar natijasida 42 ta isteʼmolchi bilan ichimlik suvi taʼminoti boʻyicha rasmiy shartnomalar imzolanishiga erishildi. Eng eʼtiborli jihati shundaki, amalga oshirilgan majmuaviy ishlar natijasida 183 nafar aholi markazlashgan ichimlik suvi taʼminoti xizmati bilan rasman qamrab olindi. Ushbu raqamlar ortida inson omili, uning salomatligi va farovon turmushi mujassamdir.

Toza ichimlik suvining xonadonlarga kirib borishi fuqarolarning kundalik turmush sharoitini tubdan yaxshilab, sanitariya-gigiena holatini talab darajasida ushlab turish, aholi salomatligini muhofaza qilish hamda hududda ekologik barqarorlikni taʼminlash borasida qoʻyilgan eng mustahkam poydevor sanaladi. Zero, kelgusida ham bu kabi amaliy ishlar izchil davom ettirilib, yangi loyihalar asosida yanada koʻproq aholi punktlarini markazlashgan ichimlik suvi tarmoqlariga ulash maqsad qilingan.

Xalqni rozi qilish, ularning yashash sharoitlarini yaxshilash yoʻlida tashlanayotgan har bir qadam, eng avvalo, yurtimiz taraqqiyoti va kelajak avlodlarning sogʻlom ulgʻayishi uchun xizmat qiladi.