БАЙРАМОЛДИ ТАДБИРЛАРДА ИСТИҚЛОЛ МАДҲ ЭТИЛМОҚДА

Ўзбекистон Республикаси Президентининг 2016 йил 2 июндаги "Ўзбекистон Республикаси давлат мустақиллигининг йигирма беш йиллик байрамига тайёргарлик кўриш ва уни ўтказиш тўғрисида”ги қарори ижросини таъминлаш мақсадида "Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида мамлакатимизнинг барча ҳудудларида 20 июндан 20 августгача байрам тадбирлари ўтказилмоқда.

"Маҳалла” хайрия жамоат фонди туман бўлинмаси томонидан ишлаб чиқилган 5 хил йўналишдаги кенгайтирилган тадбирлар режасига мувофиқ байрам тадбирларини ўтказишга масъул бўлган тарғибот-ташвиқот гуруҳи тузилиб, ушбу гуруҳга маҳалла оқсоқоли раислигида аҳолининг обрў-эътиборли кишилари жалб этилди.

Байрам тадбирининг режасига мувофиқ туманимизнинг ҳар бир овул ва маҳалласида мамлакатимиз тарихида янги саҳифа очган мустақиллигимизнинг 25 йиллигини муносиб кутиб олиш, ўтган давр мобайнида Ватанимиз қиёфаси тубдан ўзгариб бораётгани, миллатлараро тотувлик ва динлараро бағрикенглик тамойиллари асосида тинч-тотув яшаётган халқимизнинг бугунги ҳаёт тарзига шукронаси, эртанги кунга ишончини, кенг кўламли ислоҳотларнинг моҳияти ва аҳамиятини туманимиз жамоатчилигига етказиш, уларни янги марралар сари руҳлантириш, ҳар бир қишлоқда, маҳаллада амалга оширилаётган бунёдкорлик ишлари мисолида таҳлил қилиб бериш кўзда тутилган. 20 июндан 20 августгача мустақиллигимизнинг 25 йиллигига бағишланган "Маҳаллам қиёфаси 25 йил ичида”, ёшлар ва болалар ўртасида "Асфальтга расмлар чизиш” танловлари ҳамда фуқаролар йиғини соврини учун қишлоқлараро футбол, арқон тортиш, кураш биринчиликларини ўтказиш, "Кексалар дуосини олайлик” шиори остида кексалар, ногиронлар ҳолидан хабар олиш, кам таъминланган, боқувчисини йўқотган оилаларга ижтимоий ёрдам кўрсатиш, "Кексалар дуосини олайлик!” тадбири доирасида мамлакатимизнинг тарихий шаҳарларига саёҳатлар ташкил этиш каби кенг қамровли тадбирлар уюштирилади.

Хулоса қилиб айтганда, овул ва маҳаллаларда ўтказилиши режалаштирилган тадбирлар, концерт дастурлари, спорт мусобақалари, миллий ўйинлар, кекса авлод вакиллари, шоир-у ёзувчилар билан мароқли учрашувлар, давра суҳбатлари маҳаллаларимизга янада байрамона тус бериб, халқимизга кўтаринки кайфият, ҳаётимизга жўшқинлик бахш этади. Зеро, озод ва обод кўнгилларга жўшқинлик хос, халқи ҳур, калби жўшқин Ватанга эса байрамлар ярашади!

Байрам тадбирларида фаол иштирок этинг, азиз юртдошлар!