BAYRAMOLDI TADBIRLARDA ISTIQLOL MADH ETILMOQDA

Oʻzbekiston Respublikasi Prezidentining 2016-yil 2-iyundagi "Oʻzbekiston Respublikasi davlat mustaqilligining yigirma besh yillik bayramiga tayyorgarlik koʻrish va uni oʻtkazish toʻgʻrisida”gi qarori ijrosini taʼminlash maqsadida "Goʻzal va betakrorimsan, muqaddas Vatanim, jonim senga fido, Oʻzbekistonim!” shiori ostida mamlakatimizning barcha hududlarida 20-iyundan 20-avgustgacha bayram tadbirlari oʻtkazilmoqda.

"Mahalla” xayriya jamoat fondi tuman boʻlinmasi tomonidan ishlab chiqilgan 5 xil yoʻnalishdagi kengaytirilgan tadbirlar rejasiga muvofiq bayram tadbirlarini oʻtkazishga masʼul boʻlgan targʻibot-tashviqot guruhi tuzilib, ushbu guruhga mahalla oqsoqoli raisligida aholining obroʻ-eʼtiborli kishilari jalb etildi.

Bayram tadbirining rejasiga muvofiq tumanimizning har bir ovul va mahallasida mamlakatimiz tarixida yangi sahifa ochgan mustaqilligimizning 25 yilligini munosib kutib olish, oʻtgan davr mobaynida Vatanimiz qiyofasi tubdan oʻzgarib borayotgani, millatlararo totuvlik va dinlararo bagʻrikenglik tamoyillari asosida tinch-totuv yashayotgan xalqimizning bugungi hayot tarziga shukronasi, ertangi kunga ishonchini, keng koʻlamli islohotlarning mohiyati va ahamiyatini tumanimiz jamoatchiligiga yetkazish, ularni yangi marralar sari ruhlantirish, har bir qishloqda, mahallada amalga oshirilayotgan bunyodkorlik ishlari misolida tahlil qilib berish koʻzda tutilgan. 20-iyundan 20-avgustgacha mustaqilligimizning 25 yilligiga bagʻishlangan "Mahallam qiyofasi 25-yil ichida”, yoshlar va bolalar oʻrtasida "Asfaltga rasmlar chizish” tanlovlari hamda fuqarolar yigʻini sovrini uchun qishloqlararo futbol, arqon tortish, kurash birinchiliklarini oʻtkazish, "Keksalar duosini olaylik” shiori ostida keksalar, nogironlar holidan xabar olish, kam taʼminlangan, boquvchisini yoʻqotgan oilalarga ijtimoiy yordam koʻrsatish, "Keksalar duosini olaylik!” tadbiri doirasida mamlakatimizning tarixiy shaharlariga sayohatlar tashkil etish kabi keng qamrovli tadbirlar uyushtiriladi.

Xulosa qilib aytganda, ovul va mahallalarda oʻtkazilishi rejalashtirilgan tadbirlar, kontsert dasturlari, sport musobaqalari, milliy oʻyinlar, keksa avlod vakillari, shoir-u yozuvchilar bilan maroqli uchrashuvlar, davra suhbatlari mahallalarimizga yanada bayramona tus berib, xalqimizga koʻtarinki kayfiyat, hayotimizga joʻshqinlik baxsh etadi. Zero, ozod va obod koʻngillarga joʻshqinlik xos, xalqi hur, kalbi joʻshqin Vatanga esa bayramlar yarashadi!

Bayram tadbirlarida faol ishtirok eting, aziz yurtdoshlar!