Ichimlik suvi tarmoqlariga noqonuniy ulanish holatlari aniqlanib, bartaraf etilmoqda

Suv – bu nafaqat hayot manbai, balki jamiyat farovonligi va inson salomatligining eng muhim kafolatidir. Yurtdoshlarimizning yashash sharoitlarini yaxshilash, turmush farovonligini oshirish va eng asosiysi, ularning salomatligini muhofaza qilish bevosita sifatli ichimlik suvi taʼminotiga chambarchas bogʻliqdir. Biroq, yaratilayotgan sharoitlar va imkoniyatlarga qaramasdan, ayrim holatlarda bu bebaho neʼmatdan xoʻjasizlarcha foydalanish, tarmoqlarga noqonuniy ulanish kabi salbiy holatlar ham uchrab turgani soha masʼullaridan yanada hushyorlikni va qatʼiy nazoratni talab etmoqda.

Shu maqsadda Qoraqalpogʻiston Respublikasi hududiy qurilish va uy-joy kommunal xoʻjaligi sohasida nazorat inspektsiyasi hamda "Qoraqalpoq suv taʼminoti" aktsiyadorlik jamiyatining mutaxassislari hamkorligida joylarda keng koʻlamli oʻrganish ishlari olib borilmoqda. Xususan, Xoʻjayli tumanining "Tinchlik" mahallasida ham shu kabi nazorat-reyd tadbirlari oʻtkazilib, bu jarayonda ayrim kamchiliklar va qonunbuzarlik holatlari aniqlandi.

Soʻnggi yillarda xalqaro moliya institutlarining grantlari hamda kredit mablagʻlari, shuningdek, keng koʻlamli davlat investitsiya dasturlari doirasida ichimlik suv taʼminotini yaxshilash maqsadida koʻplab hududlarda yangi tarmoqlar tortilgan edi. Inspektsiyaning Ichimlik suvi hamda oqova suv sohasi boʻyicha masʼullari tomonidan 2026-yilning 1-choragi davomida yangidan tarmoqlar tortilgan 16 ta mahallada shartnomaviy munosabatlarni qonuniy asosda yoʻlga qoʻyish maqsadida oʻrganishlar olib borildi. Oʻrganishlar yakuniga koʻra, 42 ta isteʼmolchi bilan belgilangan tartibda rasmiy shartnomalar tuzishga erishildi va buning natijasida 183 nafar aholi toʻgʻridan-toʻgʻri, qonuniy va barqaror ichimlik suv taʼminoti bilan qamrab olindi.

Bundan tashqari, sohada texnik talablarga qatʼiy rioya etilishini taʼminlash masalasi ham mutaxassislarning doimiy diqqat markazida turibdi. Ichimlik suvi taʼminoti va oqova suvlarni chiqarib yuborish tarmoqlariga ulanish yuzasidan "Qoraqalpoq suv taʼminoti" aktsiyadorlik jamiyati tomonidan taqdim etilgan texnik shartlarning amalda qanday bajarilayotgani boʻyicha 52ta holatda oʻrganishlar oʻtkazildi. Oʻtkazilgan nazorat tadbirlari davomida 5 ta holatda qator kamchiliklar aniqlandi. Ulardan 2 ta holat boʻyicha masʼullarga kamchiliklarni zudlik bilan bartaraf etish boʻyicha qatʼiy koʻrsatmalar kiritilgan boʻlsa, qolgan 3 ta holatda qonunbuzarliklarga yoʻl qoʻygan shaxslarga nisbatan belgilangan tartibda Maʼmuriy javobgarlik toʻgʻrisidagi kodeksga asosan jami 12 million soʻmdan ziyod miqdorida jarimalar rasmiylashtirildi.

Inspektsiya hamda Oʻzbekiston mahallalar uyushmasi oʻrtasida maxsus Memorandum tasdiqlangan boʻlib, ushbu hujjat ijrosi doirasida 57 ta ovul va mahallalarda kompleks oʻrganishlar oʻtkazildi. Bu jarayonda 16 ta mahalla hududida ichimlik suv taʼminoti hamda oqova suv xizmatlari boʻyicha aholining haqli eʼtirozlariga sabab boʻlayotgan turli kamchiliklar yuzaga chiqdi. Aniqlangan ushbu muammolar yuzasidan "Qoraqalpoq suv taʼminoti" aktsiyadorlik jamiyatiga tegishli koʻrsatmalar kiritildi va eng muhimi, bu kamchiliklarning aksariyati shu joyning oʻzida, tezkorlik bilan bartaraf etilishiga erishildi.

2026-yilning 1-choragi davomida Qoraqalpogʻiston Respublikasi boʻylab oʻtkazilgan reydlar va monitoringlar natijasida ichimlik suvidan foydalanish qoidalarining qoʻpol ravishda buzilishi bilan bogʻliq 104 ta holat aniqlandi. Huquqbuzarlarga nisbatan qonun ustuvorligi taʼminlanib, Maʼmuriy javobgarlik toʻgʻrisidagi kodeksga asosan jami 421 million soʻm miqdoridagi jarimalar rasmiylashtirildi.

Bu jarayonda nafaqat aholi xonadonlari, balki davlat tasarrufidagi muassasalar ham chetda qolmadi. Jami 91 ta byudjet tashkilotida oʻtkazilgan oʻrganishlar natijasida ularning 18 tasida suvdan foydalanish boʻyicha turli xildagi kamchiliklar, ichki quvurlardagi nosozliklar yoki hisob-kitoblardagi noaniqliklar aniqlandi. Ushbu holatlar yuzasidan 8 ta tashkilot rahbariyatiga kamchiliklarni qisqa muddatlarda bartaraf etish boʻyicha majburiy koʻrsatmalar kiritilgan boʻlsa, qolgan 10 ta tashkilotga nisbatan jami 52 million soʻmdan ortiq maʼmuriy jarimalar qoʻllanildi.

Xulosa oʻrnida shuni taʼkidlash joizki, toza ichimlik suvi – bu shunchaki kommunal xizmat turi emas, balki millat genofondi, kelajak avlod salomatligi va yurtimiz obodligining asosiy poydevoridir. Shunday ekan, suvni asrash – hayotni asrash demakdir. Bu boradagi nazorat tadbirlari, aholi va tashkilotlar oʻrtasidagi tushuntirish ishlari uzluksiz ravishda davom ettiriladi.