ҚОРАҚАЛПОҒИСТОНДАГИ 27 ФОИЗ ОАВНИНГ ВЕБ-САЙТЛАРИ МАВЖУД

Бугунги кунда ҳаётимизни интернетсиз тасаввур қилиш қийин бўлиб қолмоқда. Ўзбекистонда ҳам интернет жадал суръатларда ривожланиб бормоқда. Бунга мисол тариқасида .UZ доменидаги сайтларнинг сони 28 мингдан ортиб кетганлигини келтиришимиз мумкин.

Мониторинг натижаларига кўра Қорақалпоғистон Республикасида 100 дан ортиқ веб-сайтлар борлиги аниқланди. Шулар орасида 15 таси ОАВ веб-сайтларидир. Булар 12 та газета,  биттадан журнал, телевидение ва Қорақалпоғистон Республикаси ахборот агентлиги сайтларидир.

Республикамизда 54 та оммавий ахборот воситалари рўйхатдан ўтганлигини инобатга оладиган бўлсак, веб-сайти бор ОАВлар 27 фоизни ташкил этади. Мониторинг натижаларига кўра 15 та сайтнинг 2 таси айрим сабабларга кўра ишламаётганлиги аниқланди.

Ушбу сайтлар асосан ўзбек ва қорақалпоқ тилларида фаолият юритмоқда. "Тараққиёт кўзгуси” газетасининг веб-сайти Қорақалпоғистонда электрон ОАВ сифатида рўйхатдан ўтган ягона сайт ҳисобланади. Ушбу сайтларга кунлик ташрифлар 20-100 тани ташкил этади. Бу борада Амударё тумани газетаси веб-сайти бошқаларга нисбатан мақтана олади. Amunews.uz га кунига 100 тадан ортиқ ташрифлар кузатилади.

Афсуски, кўпчилик газеталарнинг веб сайтлари тез-тез янгиланиб турилмайди, ижтимоий тармоқларда ҳеч бир газетанинг расмий саҳифаси йўқ, кўп сайтларда кунига қанча ташриф бўлаётганлиги кўрсатилмаган, фойдаланувчилар учун яхши шароит яратилмаган.

Агарда "Қарақалпақстан” телеканалидаги "Хабар” информацион дастури ва радиода эфирга узатилган энг яхши материаллар веб-сайтларга жойлаштириб борилса, мақсадга мувофиқ бўлган бўларди. Шунингдек, ҳар бир газета ижтимоий тармоқларда расмий саҳифаларини очиб, ижтимоий сўровномалар ўтказиб турса, бу газета ва ўқувчиларни бир-бирига янада яқинлаштирган бўлар эди.

Фурқат Юсупов,

Фуқаролик жамияти шаклланишини мониторинг қилиш мустақил институти Қорақалпоғистон Республикаси ҳудудий бўлинмаси мутахассиси.

(Фото-http://myday.uz)