Коррупцияга қарши курашда ОАВнинг ўрни ортиб бормоқда
Коррупцияга қарши курашишда оммавий ахборот воситаларининг ўрни алоҳида. Оммавий ахборот воситалари жамиятда коррупцияга нисбатан муросасиз муҳитни шакллантириш, аҳолининг ҳуқуқий онги ва маданиятини ошириш, коррупцион ҳолатларни фош этиш ва бу борада жамоатчилик назоратини кучайтиришда муҳим восита ҳисобланади. Улар орқали аҳоли коррупциянинг зарарли оқибатлари ҳақида хабардор бўлади, ушбу иллатнинг олдини олиш ва унга қарши курашиш йўлларини ўрганади. “Тараққиёт кўзгуси” газетаси таҳририятининг Ўзбекистон Республикаси Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Биз коррупцияга қаршимиз!” номли грант лойиҳаси ҳам ушбу мақсадларга қаратилгани билан аҳамиятлидир.
Лойиҳа доирасида газетада аҳолини ушбу иллатдан хабардор қилиш мақсадида таҳлилий мақолалар эълон қилиш, жамоатчилик фаолларининг чиқишларини ташкил қилиш орқали тарғибот ишларини олиб бориш, жойларда учрашувлар ташкил этиш, иштирокчиларга миллий қонунчиликдан кўчирмалар ва ҳуқуқий маълумот тарқатиш орқали аҳолининг хабардорлигини ошириш кўзда тутилган.
Бундан ташқари, лойиҳа доирасида давлат хизматчиларининг хабардорлигини оширишга ҳисса қўшиш мақсадида уларга коррупцияга қарши курашиш бўйича амалдаги қонунчиликдан кўчирмалар тарқатиш ҳам кўзда тутилган. Бунинг аҳамияти шундаки, давлат хизматчилари коррупцияга қарши курашишда олдинги сафда турадиган шахслардир. Уларнинг коррупцияга оид қонунчиликни чуқур билиши, ўз вазифаларини бажаришда шаффофлик ва ҳалоллик тамойилларига амал қилиши ушбу иллатга барҳам беришда ҳал қилувчи аҳамиятга эга. Агар давлат хизматчилари ўз ҳуқуқ ва мажбуриятларини, шунингдек, коррупцион ҳаракатлар учун белгиланган жазоларни аниқ билсалар, бу уларни коррупцияга аралашишдан сақлайди ва жамиятда адолатли бошқарув тизимини шакллантиришга ёрдам беради.
Лойиҳа координаторлари Амударё тумани Санитария-эпидемиологик осойишталик ва жамоат саломатлиги бўлими ҳамда туман Маданият бўлимида бўлиб, давлат хизматчилари билан учрашув ўтказди ва уларга коррупциянинг ижтимоий оқибатлари, жамият ва давлат ривожига салбий таъсири ҳақида батафсил маълумотлар бериб, тарқатма материаллар тарқатдилар.
Давлат хизматчиларининг коррупцияга аралашиши давлатнинг иқтисодий салоҳиятига жиддий путур етказади. Бюджет маблағларининг талон-торож қилиниши, инвестиция муҳитининг ёмонлашиши, иқтисодий ўсишнинг секинлашиши каби оқибатлар юзага келади. Ижтимоий жиҳатдан эса аҳолининг давлатга бўлган ишончи йўқолади, ижтимоий тенгсизлик кучаяди, адолатсизлик кайфияти авж олади. Сиёсий оқибатлар эса давлат бошқарувининг самарадорлигини пасайтиради, халқаро майдонда мамлакат обрўсига салбий таъсир кўрсатади ва демократик қадриятларга путур етказади.
Шу сабабли лойиҳа доирасида жамиятда коррупцияга нисбатан муросасиз муҳитни шакллантириш, аҳолининг, давлат хизматчиларининг ҳуқуқий онги ва маданиятини ошириш, коррупцион хавф-хатарларни камайтириш ва давлат бошқарувида шаффофликни таъминлашга ҳисса қўшиш кўзда тутилган.
“Тараққиёт кўзгуси” газетаси таҳририятининг бу каби ташаббуслари коррупцияга қарши курашда жамоатчиликнинг фаол иштирокини таъминлашда муҳим аҳамият касб этади. Оммавий ахборот воситалари, давлат органлари ва фуқаролик жамияти институтларининг ҳамкорлиги эса коррупциясиз жамият қуриш йўлидаги энг самарали йўлдир. Бундай лойиҳалар аҳолининг ҳуқуқий саводхонлигини ошириб, коррупцияга қарши курашда ҳар бир фуқаронинг масъулиятини кучайтиради ва Ўзбекистонда адолатли ва шаффоф жамият қуришга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
