ЁШЛАР МУҲТАРАМ ЮРТБОШИМИЗ БЕЛГИЛАБ БЕРГАН ЙЎЛДАН ДАДИЛ ОДИМЛАЙВЕРАДИЛАР
Муҳтарам Юртбошимиз мустақилликнинг илк йилларидаёқ "Ўзбекистон – келажаги буюк давлат”, дея таъриф берган эди мамлакатимизга. Собиқ иттифоққа қарамликдан, мутеликдан эзилган, 80 фоиз озиқ-овқат маҳсулотларини, ҳатто ўзимизда беҳисоб заҳиралари мавжуд бўлган ош тузини ҳам бировдан сотиб олиб, "боқиманда” деган миннатдан кўнгли яғир бўлган халқимизнинг бу шиордан кўзи очилгандай бўлди.
Ҳақиқатан ҳам муҳтарам Юртбошимиз раҳнамолигида халқимиз истиқлол йилларида ўз юртини буюк давлатга айлантирди.
Айниқса, ёш авлодни соғлом ва баркамол инсонлар этиб тарбиялаш масаласи давлат сиёсатининг энг устувор йўналиши даражасига кўтарилди. Шу мақсадда Болалар спортини ривожлантириш жамғармаси, уч босқичли спорт мусобақалари тизими яратилди. Жамғарма маблағлари ҳисобидан бизнинг туманимизда ҳам мактабларга спорт заллар, Болалар мусиқа ва санъат мактаби қурилди, мавжудлари капитал реконструкция қилиниб, замонавий қиёфа касб этди.
Кадрлар тайёрлаш Миллий дастури, Мактаб таълимини ривожлантириш умуммиллий дастурларининг ҳаётга татбиқ этилиши натижасида таълим муассасалари бугунги кунда интеллектуал салоҳиятли, соғлом ва бақувват, ўз юртига фидойи жасур ўғлонларни, қизларни камолга етказмоқда.
Бунингдек жаҳоншумул ўзгаришларнинг, юксалишларнинг замирида муҳтарам Юртбошимизнинг мустақилликнинг илк даврларидан бошлаб ёшларимизга кўрсатган беқиёс ғамхўрликлари мужассам. Отамиздай суюк инсоннинг мамлакатимизнинг ҳар бир боласини "менинг болам”, деб "Ватанимизнинг келажаги” деб ардоқлашлари, уларнинг етук инсонлар бўлиб вояга етишишларига ғамхўрлик қилишлари бугунги кунда ёшларимизнинг ҳеч кимдан кам эмаслигини намоён этишларига асос бўлмоқда. Ўзбекистон ёшларининг илм-фан, адабиёт, санъат ва спорт соҳасида эришаётган ютуқларини дунё тан олмоқда, ҳавас қилмоқда. Ёшларни ана шундай марраларга руҳлантириб, қўллаб-қувватлаб яшаган, мамлакатимизнинг Биринчи Президенти, муҳтарам Ислом Каримовнинг вафоти бутун мамлакатимиз аҳолиси қатори бизни ҳам чуқур қайғуга солди. Амударёлик ёшлар ушбу оғир жудолик дамларида бир-бири билан яна ҳам аҳил, дўст-биродар ва ҳамкор, эл дардига дармон бўлишга интилмоқдалар.
Юртбошимиз доим "Ўзбекистон ёшлари менинг болаларим – уларни ҳеч кимга бермайман” дея таъкидлардилар. Бугун биз ёшлар азиз Ислом Каримовнинг порлоқ хотираси олдида таъзим ила "Биз мустақилликни ҳеч кимга бермаймиз. Шу азиз Ватанимизни, худди сиз орзу қилганингиздай, кўз қорачиғимиздай асраб-авайлаймиз”, дея баралла айтамиз.
Бизга озод ва обод Ватанни мерос қилиб қолдирган муҳтарам Юртбошимизнинг: "Эй болам, сенинг Ватанинг битта – барчамизга азиз, бетакрор мана шу Ўзбекистон. Ота-боболарингнинг ҳоки шу ерда ётибди. Шу муқаддас замин сени дунёга келтирган, сен уни обод этишинг, ҳимоя қилишинг шарт. Нафақат сенинг ўз ҳаётинг, балки сенга умид кўзини тикиб турган ота-онанг, опа-сингилларинг, ёш гўдаклар, нуроний қарияларимизнинг ҳаёти ҳам ана шу бурчингни нечоғлик адо этишингга боғлиқ”, деган пурмаъно сўзлари доимо қалбларимизда акс-садо бериб туради ва шунга монанд яшашга ундайди.
Мансур ЎРОЗБОЕВ,
"Камолот” ЁИҲ туман Кенгаши раиси.
(Фото - http://fikr.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
