БИТИРУВЧИЛАР ДОИМО ДИҚҚАТ-ЭЪТИБОРИМИЗДА

Туман ХТМФМТТЭБ га қарашли 82 та умумий ўрта таълим мактаблари мавжуд бўлиб,  2015-2016 ўқув йилида жами 9-синфни битирувчи ўқувчилар 3189 нафарни ташкил қилди. Шундан 3016 нафари таълим ўзбек,  37 нафари рус,  47 нафари қорақалпоқ,  76 нафари қозоқ, 13 нафари туркман тилида олиб бориладиган мактабларнинг 9-синфларини тугатдилар.

Уйда якка тартибда ўқитилган 9-синф битирувчилари эса 7 нафарни ташкил этди.

9-синф ўқувчиларини таълимнинг кейинги босқичига жалб қилиш ҳамда эҳтиёжини аниқлаш мақсадида 2015 йилнинг декабрь, 2016 йилнинг февраль, апрель ойларида 3 марта сўровнома ўтказилди. Ушбу сўровномаларни ўтказиш жараёнида 9-синфни битирувчилари, уларнинг ота-оналари, синф раҳбарлари, мактаб амалиётчи-психологи ҳамда мактаб раҳбарлари иштирок қилишди.

Умумтаълим мактабларида таълим олаётган ўқувчи-қизларни ҳаётга тайёрлаш, уларнинг касб-ҳунар танлашларига имкониятлар яратиш, касб-ҳунар ҳақида тушунчаларни етказиш  ва ўз севган касбини танлашда ҳамда келажакда танлаган касбида фидойи меҳнат қилса, оиласига бахт ва фаровонлик келтиришини англатишга кўмаклашиш мақсадида ҳамда "2015-2016 ўқув йилида умумтаълим мактабларининг 9-синф битирувчилари академик лицей ва касб-ҳунар коллежларига тўлиқ қамраб олинишини таъминлаш бўйича комплекс чора-тадбирлар режаси”га асосан 7-9-синф ўқувчи-қизлари учун "Қиз боланинг касби – унинг бахти”, "Илм ол, ҳунар танла, Ватанинг кутар сени”, "Касб-ҳунар – қизлар келажаги”, "Ҳунарли қиз – юрт келажаги”, "Билимли қиз – фаришта, ҳунарли қиз – саришта” каби мавзуларда 1-15 февраль кунлари давра суҳбатлари ўтказилди. Давра суҳбатларида 4100 нафардан ортиқ 7-9-синф ўқувчи-қизлари иштирок қилишди.

Ўзбекистон Республикаси Вазирлар Маҳкамасининг 2010 йил 7 июлдаги "Умумтаълим мактабларининг 9-синф битирувчиларини академик лицей ва касб-ҳунар коллежларида ўқиш билан қамраб олишни таъминлаш бўйича норматив ҳуқуқий базани янада такомиллаштириш тўғрисида”ги 109-сонли қарори ва бошқа меъёрий ҳужжатлар асосида 2015-2016 ўқув йилида умумтаълим мактаблари ва ўрта-махсус, касб-ҳунар таълими муассасалари билан ҳамкорликда жорий йилнинг февраль-май ойларида "Касблар фестивали” тадбири ўтказилди. Режа асосида умумтаълим мактабларининг 9-синф битирувчилари билан касб-ҳунар коллежлари ва академик лицейларга саёҳатлар ташкил этилди.

Умумтаълим мактабларида таълим олаётган ўқувчиларнинг етук касб эгаси бўлиб етишишлари учун касблар ҳақида кўпроқ маълумотга эга бўлишлари, касбий билимларини ошириш, қизиқтириш ва онгли равишда касб танлашларига амалий ёрдам бериш мақсадида битирувчи ўқувчилар ўртасида "Мен танлаган касбнинг келажак ҳаётимдаги ўрни” мавзусида иншолар танлови ўтказилди. Танловнинг мактаб босқичида 9-синф ўқувчиларининг 3100 нафардан ортиғи иштирок қилишиб, мактаб босқичида ғолиб бўлган 75 нафари танловнинг туман босқичига йўлланмани қўлга киритишди. Туман босқичида 75 нафар 9-синф битирувчиларининг ижодий ишлари ҳакамлар ҳайъати томонидан ўрганилиб, 3 нафар ўқувчининг ижодий ишлари Қорақалпоғистон Республикаси босқичида иштирок қилиш учун тақдим қилинди.

Жорий йилнинг 20 июнь санасидан ўрта-махсус, касб-ҳунар таълими  муассасаларига қабул бошланиб, 30 июнь санасигача 3189 нафар битирувчиларнинг ҳужжатлари тўлиқ топширилди.

Уларнинг 2794 нафари туманимизда фаолият юритаётган академик лицей ва касб-ҳунар коллежларига, 374 нафари Қорақалпоғистон Республикасидаги турли касб-ҳунар коллежлари ва академик лицейларга, шунингдек, 7 нафари Тошкент шаҳри, 7 нафари Хоразм вилоятидаги касб-ҳунар коллежларига ўқишга жойлашдилар.

Кейинги йилларда умумтаълим мактаблари битирувчиларининг касб танлашларига эътибор кучайтирилаётганлиги бежиз эмас. Чунки инсон танлаган касби, эгаллаган ихтисослигида бир умр меҳнат қилади. Шунинг учун бу ҳақдаги қарорни шошма-шошарлик билан шунчаки қабул қилиб бўлмайди. Инсон ўзи севган касбида меҳнат қилиши унга завқ-шавқ бағишлайди, муваффақиятлар сари интилишига асос бўлади. Буларнинг ҳаммаси инсонга ўз фаолиятидан мамнунлик ҳиссини беради.

Шунинг учун ҳам мактаб таълимини тугатаётган ҳар бир ўғил-қизнинг касб-ҳунарни ўз иқтидорига яраша, онгли тарзда танлашига эришмоғимиз лозим.

И.РАЖАБОВ, туман ХТМФМТТЭБ ўқувчиларни касб-ҳунарга йўналтириш ва руҳий-педагогик ташхисини услубий таъминлаш кичик гуруҳи раҳбари.

(Фото - http://navoiy.uz)