ОНА ҚУВОНЧИ
Адолат ая катта ўғли, келини ва неваралари билан шаҳардаги ҳовлисида туришади...
Бугун келини онасидан хабар олгани кетган, ўғли ишда, катта невараси мактабда, кичик невараси эса боғчада...
Адолат ая жуда китобсевар инсон, ҳозир ҳам ўқиётган китобини секин ёпди-ю, ҳовлига чиқди. Томорқалари кичкина эмас. Ўрик, олма, беҳи, шафтоли, олча каби мевали дарахтлардан яхшигина ҳосил олишади. Томорқага полиз экинлари ҳам экишади, бу ишларда Адолат ая болаларига бош-қош.
Мана, қишдан омон-эсон ўтиб кўкламга ҳам етдик. Инсон табиати жуда қизиқ-да, қиш бўлса, баҳорни соғинади, баҳор келса, ёзнинг пишиқчилигини қўмсайди, ёзда куз шамолини истайди, кузда қишнинг қорини кўнгли тусайди, қишда эса яна баҳорни соғиниб қолади. Ширин хаёллар оғушида боғини кезиб юрган Адолат аянинг хаёлини "Ойижон яхши ўтирибсизми?”, - деган келинининг ширали овози бўлди.
- Уйдагилар, қудаларингиз сизга салом айтишди. Ойижонингни олиб келмабсан, дея урушиб ҳам қўйишди, - деди келини.
- Қудаларим бор бўлишсин. Қудаларимдан айланай. Келаси сафар бирга борармиз. Эсон-омон ўтирсинлар, ишқилиб, - деди Адолат ая келинига мамнун боқиб. Унинг юзидан қудаларидан, келинидан кўнгли тўқлигини сезиш қийин эмасди.
Адолат ая телевизор кўриб ўтирар экан, бошловчи қизнинг
"Март – азиз аёлларимиз ойи, Наврўзи олам, баҳор байрамлари ойи”, деган сўзлари эътиборини тортди. Дарҳақиқат, Наврўз айёми яқин қолди, дея ўйлади. Шу пайт:
- Бувижон, бизга қаранг! - деган олти яшар неварасининг овозини эшитиб, орқасига ўгирилди.
Рўпарасида ўғли қўлида оппоқ ҳарир рўмол, келини торт, катта невараси бир қучоқ гул, кичик невараси эса "Бувижоним, ойижоним, дадажоним, акажоним”, деган сўзлар ёзилган ўзи чизган суратни тутганча кулиб туришарди.
- Наврўзи олам қутлуғ бўлсин! - дея юзидан ўпиб қутлашганларида фарзандларининг меҳрибонлигидан бахтиёр онанинг юраги қувончдан тошиб кетди.
- Болаларим, - ўзларингизга ҳам байрам қутлуғ бўлсин. Тинч элимизга байрамлар ярашади, байрам-байрамларга улансин. Ҳар кунингиз Наврўз бўлсин. Етказганига шукур! - дея Адолат ая фарзандларини бағрига босди.
Гулнора ЮСУПОВА.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
