ONA QUVONChI
Adolat aya katta oʻgʻli, kelini va nevaralari bilan shahardagi hovlisida turishadi...
Bugun kelini onasidan xabar olgani ketgan, oʻgʻli ishda, katta nevarasi maktabda, kichik nevarasi esa bogʻchada...
Adolat aya juda kitobsevar inson, hozir ham oʻqiyotgan kitobini sekin yopdi-yu, hovliga chiqdi. Tomorqalari kichkina emas. Oʻrik, olma, behi, shaftoli, olcha kabi mevali daraxtlardan yaxshigina hosil olishadi. Tomorqaga poliz ekinlari ham ekishadi, bu ishlarda Adolat aya bolalariga bosh-qosh.
Mana, qishdan omon-eson oʻtib koʻklamga ham yetdik. Inson tabiati juda qiziq-da, qish boʻlsa, bahorni sogʻinadi, bahor kelsa, yozning pishiqchiligini qoʻmsaydi, yozda kuz shamolini istaydi, kuzda qishning qorini koʻngli tusaydi, qishda esa yana bahorni sogʻinib qoladi. Shirin xayollar ogʻushida bogʻini kezib yurgan Adolat ayaning xayolini "Oyijon yaxshi oʻtiribsizmi?”, - degan kelinining shirali ovozi boʻldi.
- Uydagilar, qudalaringiz sizga salom aytishdi. Oyijoningni olib kelmabsan, deya urushib ham qoʻyishdi, - dedi kelini.
- Qudalarim bor boʻlishsin. Qudalarimdan aylanay. Kelasi safar birga borarmiz. Eson-omon oʻtirsinlar, ishqilib, - dedi Adolat aya keliniga mamnun boqib. Uning yuzidan qudalaridan, kelinidan koʻngli toʻqligini sezish qiyin emasdi.
Adolat aya televizor koʻrib oʻtirar ekan, boshlovchi qizning
"Mart – aziz ayollarimiz oyi, Navroʻzi olam, bahor bayramlari oyi”, degan soʻzlari eʼtiborini tortdi. Darhaqiqat, Navroʻz ayyomi yaqin qoldi, deya oʻyladi. Shu payt:
- Buvijon, bizga qarang! - degan olti yashar nevarasining ovozini eshitib, orqasiga oʻgirildi.
Roʻparasida oʻgʻli qoʻlida oppoq harir roʻmol, kelini tort, katta nevarasi bir quchoq gul, kichik nevarasi esa "Buvijonim, oyijonim, dadajonim, akajonim”, degan soʻzlar yozilgan oʻzi chizgan suratni tutgancha kulib turishardi.
- Navroʻzi olam qutlugʻ boʻlsin! - deya yuzidan oʻpib qutlashganlarida farzandlarining mehribonligidan baxtiyor onaning yuragi quvonchdan toshib ketdi.
- Bolalarim, - oʻzlaringizga ham bayram qutlugʻ boʻlsin. Tinch elimizga bayramlar yarashadi, bayram-bayramlarga ulansin. Har kuningiz Navroʻz boʻlsin. Yetkazganiga shukur! - deya Adolat aya farzandlarini bagʻriga bosdi.
Gulnora YuSUPOVA.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
