“Халқ қабулхоналари” халқ хизматида

Инсон – ҳаёт гултожи! Унинг ҳуқуқ ва эркинлиги, манфаатларини ишончли ҳимоя қилиш мустақиллик йилларида давлатимиз сиёсатининг энг устувор вазифаларидан бўлиб келмоқда, амалга оширилаётган жамики эзгу саъй-ҳаракатлар ҳар бир фуқаронинг эмин-эркин, бахтиёр ва фаровон турмуш кечириши, муносиб шароитларда меҳнат қилиши ва кексайганда меҳнатларининг роҳатини кўриб, фароғатда яшашини таъминлашга қаратилган.

Жорий йилимизнинг 7 декабрида Ўзбекистон Республикаси Конституцияси қабул қилинганлигининг 24 йиллигига бағишланган тантанали маросимда Президентимиз Ш.Мирзиёев кириб келаётган янги йилимизни "Халқ билан мулоқот ва инсон манфаатлари йили” дея эълон қилди. Бундан кўзланган мақсад ва вазифаларга тўхталиб, "...давлаторганларининг фуқаролар билан ўзаро муносабатлари юзасидан ёндашувни тубдан қайта кўриб чиқиш зарур. Бу борада аҳоли билан доимий мулоқот қилиш, уларни қийнаётган муаммоларни ҳал этишнинг янги механизмлари ва самарали усулларини жорий этишимиз даркор”, дея таъкидладилар. Шунингдек, ҳар бир туман ва шаҳарда "Халқ қабулхоналари”ни ташкил этиш ва уларнинг тўлақонли фаолият кўрсатишини таъминлаш вазифасини қўйдилар. Халқ билан мулоқотдан кўзланган мақсад халқ ичига кириш, уларнинг муаммоларини тинглаш, манфаатларини ишончли ҳимоя қилишдир. Мулоқот ва манфаат тушунчаси халқ давлат идораларига эмас, давлат идоралари халқимизга хизмат қилиши керак, деган тамойилга асосланади.

Шунингдек, бу қабулхоналар ҳар бир ҳудуддаги вазиятни, аввало, қонун, фармон ва қарорлар ижросини аҳолининг кенг қатламига етказиш, уларнинг самарадорлигини янада оширишда муҳим қадам бўлишига шубҳа йўқ. Бу саъй-ҳаракатлар инсон манфаатларини таъминлашга, дунёдаги ривожланган давлатлар қаторига кириш, халқимизнинг ҳаёт сифати ва даражасини ошириш йўлида хизмат қилиши билан аҳамиятлидир.

Шу мақсадда тадбиркорлар ва ишбилармонлар ҳаракати Ўзбекистон Либерал демократик партияси туман Кенгаши қошида "Халқ қабулхонаси” ташкил этилди ва фаолиятини бошлади.

Айни кунда қабулхонага кунига 10 нафар атрофида фуқаролар мурожаат қилишмоқда. Мулоқотлар натижасида уларни қийнаётган муаммоларнинг айримлари шу вақтнинг ўзида ечимини топиб, ҳал этилмоқда, айримлари кўриб чиқилмоқда.

Бу ўз навбатида туманимиз аҳолисининг давлатимизга ишончи ортишига хизмат қилаётир. Чунки ҳар бир мурожаат орқасида инсон манфаати, унинг тақдири бор.

Мадамин КАЗАКОВ,

ЎзЛиДеП туман Кенгаши раиси.