ЮРТИМИЗ ФАЙЗИ

Бу дунёда умргузаронлик қилаётган ҳар бир одамнинг ўз ҳаётий фалсафаси бор: кимдир ўтган кунининг қадрини қандай еб-ичганига, фаровон яшаганига қараб, кимдир тўпланган бойлигига қараб, яна кимдир эл манфаати йўлида қилган меҳнатига қараб ўлчайди.

1935 йилда Хитой қишлоғида туғилган, умрининг 40 йилида бригада бошлиғи бўлиб ишлаб, куч-ғайратини деҳқончилик маданиятини юксалтиришга, бригада аъзоларининг манфаатларини ҳимоя қилишга бағишлаган, 82 ёшида ҳам невара-чевараларга бош бўлиб, уларга ҳаётда тўғри йўлни кўрсатишдан, йўл-йўриқ беришдан чарчамайдиган Олломберган Мамутов биз юқорида санаган тоифаларнинг сўнггисига мансуб кишилардан.

Отахоннинг ёшлиги элнинг турмуш оғир, қаҳатчилик йилларига тўғри келди. Қийинчиликларга қарамай, у 2-сонли мактабда ўқиди, зеҳни ўткир, интилувчанлиги боис, 14 ёшидан пахтачилик бригадасига табелчи қилиб қўйишди. 10 йил шу касбда ишлаб, тилсиз замин бағридан қишлоқ хўжалик экинларидан мўл ҳосил олиш йўлларини ўрганди, тажриба тўплади. Деҳқончиликнинг захматли ишларида колхозчиларга қайишиб, машаққатларини тенг елкалашиб ишлади. Шунинг учунми, уни ўзи ишлаётган бригадага етакчи қилиб тайинлашди. 40 йил бригада бошқариш мобайнида 14 та раис билан ишлашишига тўғри келди.

– У пайтлардаги деҳқончилик ишлари билан бугунги деҳқончиликнинг ер билан осмонча фарқи бор, – дейди хаёлга толиб отахон. – Бригада аъзолари тонг отгандан шомгача тинимсиз далада ишлашарди. Кўп ишлар фақат қўл меҳнати билан бажариларди. Колхозчига фақат ишчи кучи сифатида қаралар, ҳатто касал бўлса-да, ишни ташлаб кетишга ҳаққи йўқ эди. Акс ҳолда "пахта душмани”га чиқарилиб, қўйиларди. Ҳа, ҳа, у пайтлар пахта қадри одамнинг қадридан юксак турар эди.

Ўша пахта далалари ўрнида ҳозир гуркираган боғларни, халқимиз дастурхонини тўкин қилаётган полиз, сабзавот экинларини, муҳташам ҳовли-жойларни кўрганимда юрагим қувончдан гупиллаб кетади.

ОлломберганМамутовнинг хотираларини тинглаганкиши собиқ иттифоқ ҳукмронлиги даври билан бугунги кунимизнинг тафовутинияққолроқ англайди, озод ва обод юртимизга, инсон манфаатларини устувор вазифа қилиб қўйган давлатимизга меҳри ортади.

Отахон ҳозир турмушўртоғи Холжон Мамутова билан бу дунёда орттирган улкан бойлиги – 2 ўғил, 3 қизи, невара-чеваралари қуршовида, кексалик гаштини суриб яшамоқда. Кексайган чоғида бугунгидай дориломон кунларга етганига тинмай шукрона айтади, барчани бу кунларнинг қадрига етишга чақиради.

Ҳаёти ҳам, сўзлари ҳам барчамизга улкан сабоқ бўладиган отахонни янги йил билан қутлаб, соғлик-саломатлик, узоқ умр тиладик. Юртимизнинг файзи, фариштаси бўлган кексаларимизнинг дуоси бизга ҳамиша мададкордир.

Ойгул РАЖАБОВА,

газетанинг махсус мухбири.

Суратда: Олломберган Мамутов турмуш ўртоғи Холжон Мамутова билан.