БУЮКЛАР ХОТИРАСИ МАНГУДИР
Шу йил 26 январь куни Ўзбекистон Республикаси Президентининг "Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида”ги қарори қабул қилинди. Мен қарор матни билан танишарканман, элу-юрти учун фидойилик қилиб яшаган инсонларнинг хотираси нафақат яқинлари, балки бутун халқи, она Ватани учун ҳам нақадар азиз эканлигини юрак-юрагимдан ҳис этдим.
Шундай инсонлар бор: ўз эзгу аъмоллари билан тарих саҳифаларини нурафшон айлаб, мангулик сари юз тутадилар.
Юртбошимиз – Ислом Абдуғаниевич Каримов ана шундай соҳиртабиат буюк инсон эдилар. Беш ойдирки, биз ана шу буюк инсоннинг буюк хотираларини эслаб, Ўзбекистон деб аталмиш қудратли давлат қурган халқ отаси бошлаб берган улуғвор ишлар силсиласида яшаб, меҳнат қилмоқдамиз.
Юрагимда чуқур эҳтиром билан мамлакатимизда юз бераётган буюк ўзгаришларни кузатарканман, Юртбошимизнинг мустақилликнинг биринчи йилларидаёқ Олий Кенгаш минбаридан туриб айтган сўзлари ёдимга тушади.
- "... афсуски, денгизимиз йўқ. Денгизимиз бўлганида, дунёга чиқишимиз тез ва осон бўларди...”
Ҳа, азизлар, Ўзбекистонни дунё океанлари орқали дунё билан боғловчи очиқ денгизимиз йўқ. Буни жуғрофий жиҳатдан изоҳлаб ўтиришнинг ҳам асло ҳожати йўқ. Лекин мен бир ҳақиқат қаршисида доимо бош эгаман ва баралла айтгим келади:
– Ўзбекистон мамлакати учун очиқ денгиз асло шарт бўлмади. Мустақил Ўзбекистон учун Ислом Каримовнинг ўзи Денгиз бўлди, азизлар!
У бир зилол ирмоқ эди, дарёга айланди. Эрк ва Озодлик учун кураш майдонига жасорат билан, шиддат билан оқди. Тўлқинларга кўксини қалқон қилиб, Истиқлол аталган йўлга чиқди. Азиз халқини ўзидан азиз тутиб, бу улуғ йўл заҳматларига матонат билан бардош берган сарбонга - халқ озодлигини, ҳурлигини ҳимоя қилмоққа қодир қудратли кучга айланди. Тошқин юракли ана шу буюк инсоннинг ўзи Ўзбекистон билан дунёни боғлаб тургувчи шовуллаган Денгиз бўлди!
Мустақилликнинг биринчи йиллари эсингиздами, азизлар? Агар эсингизда бўлса, Ўзбекистоннинг биринчи Президенти ўртага ташлаган илк шиорни бир ёдга олинг-а! "Ўзбекистон – келажаги буюк давлат!” деган шиор эди бу! Собиқ шўро давлатининг буйруқларини бажаришга ўрганиб қолган, ҳамон бошини эгиб, мутеликни ўз тақдири деб билгувчи фикри, билими саёз айрим кимсалар бу шиорга эътиборсизлик билан қараб, қўл силтаб қўйганлари-чи? Иқтисодий тизим издан чиқиб, ночор кун кечираётган халқимизни чалғитиш учун айрим нокас кимсалар томонидан турли найранглар ўйлаб топилмадими, ўша кезларда? Шулардан фақат Тошкент вилоятининг Бўка туманида юз берган миллатлараро можарони, 1991 йилдаги Наманган воқеаларини эсланг. Президент Ислом Каримов якка ўзи гўё "иқтисодий ночорликдан азият чекаётган” оломон орасига дадил кириб борди. Ҳар бир фуқаро билан юраги тўлиб гаплашди. Жоҳиллик ботқоғи томон қадам қўяётган оломонни тинчитди. Ўшанда, бутун Марказий Осиё халқларини ўз домига тортиб кетиши режалаштирилган биродаркушликнинг даҳшатли оловини ўчирди у! Ана шундай биродаркушлик уруши оловини тўхтатиш учун инсонда нафақат куч-қудрат, балки ўткир фикр, ақл-заковат, метин ирода, жасорат, халқпарварлик туйғуси керак эди. Президент Ислом Каримовда бу сифатларнинг барчаси бор эди ва ўша дақиқалардаёқ ана шу сифатлари билан азиз халқи учун чинакам Денгиз, Ўзбекистон мамлакати олдида қудратли қояга айлана олди.
Улуғ инсон – Биринчи Президентимизнинг даъваткор, ёқимли овозлари бугун она Ватан кенгликлари бўйлаб жаранглайди:
– Авлодларимизга озод ва обод Ватан қолдирайлик!
Ҳар бир иши, ҳар битта сўзи билан ўз халқига ибрат кўрсатиб яшаган Ислом Каримов ўзи ҳаётлигида илгари сурган улуғвор ғояларига, шиорларига содиқ яшадилар. Атрофга бир боқинг, азизлар! Халқимизнинг азиз ва фидойи раҳнамоси Ислом Абдуғаниевич Каримовдан ўзи яхши кўрадиган Ўзбекистон фарзандларига, набираларига озод ва обод Ватан қолди! Янги-янги қишлоқлар, равнақ топаётган шаҳарлар, бир-бирларига жондош ва қон-қардош, қариндош халқ қолди!
Президентимиз Ш.Мирзиёевнинг бу қарори Биринчи Президентимизнинг хотирасига халқимизнинг чексиз ҳурмат ва эҳтироми ифодасидир.
Йиллар ўтади, асрлар айланади, неча-неча бахтиёр авлодлар келади дунёга. Лекин ўзбек халқининг буюк ва жасоратли фарзанди, мустақил юрт тузган фидойи, барчамиз учун отамиздай меҳрибон ва азиз инсон – Ислом Каримовнинг номи миллат, Ватан номи билан бирга яшайверади.
Робия ЙЎЛДОШЕВА, журналист.
(Фото - http://uz24.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
