Хотира – муқаддас, қадр – азиз: Амударёда генерал-майор Хакимбой Халимовнинг ёрқин хотираси ёдга олинди

Инсон қадри, унинг эзгу амаллари ва қолдирган маънавий мероси йиллар ўтса-да, авлодлар қалбида яшашда давом этади. Айниқса, ҳуқуқни муҳофаза қилиш органлари, хусусан, прокуратура тизимида кўп йиллар давомида қонун устуворлигини таъминлашга умрини бағишлаган, соҳада ўзига хос мактаб яратган фидойи инсонларни ёд этиш – бугунги кун ходимлари учун ҳам маънавий қувват, ҳам касбий масъулият манбаидир.

Амударё тумани прокурори, адлия маслаҳатчиси Баҳром Машарипов бошчилигидаги прокуратура жамоаси соҳа фахрийси Жумамурат Хайтбоев ҳамроҳлигида 3-даражали давлат адлия маслаҳатчиси, генерал-майор Ҳакимбой Аширович Халимовнинг мангу қўним топган масканини зиёрат қилдилар. Қабр бошида Қуръон тиловат қилиниб, марҳумнинг руҳига дуолар қилинди. Зиёрат асносида фахрийлар ва ёш прокурорлар Хакимбой Халимовнинг серқирра фаолияти, унинг мураккаб вазиятларда қабул қилган одилона қарорлари, инсонийлик фазилатларини ёдга олдилар.

Хакимбой Халимов шунчаки раҳбар эмас, балки ҳақиқий маънода "халқ прокурори" эди. 1954 йилда таваллуд топган Хакимбой Аширович ўз меҳнат фаолиятини оддий терговчиликдан бошлаб, юксак салоҳияти ва тинимсиз меҳнати эвазига Ўзбекистон Республикаси Бош прокурорининг ўринбосари ва Қорақалпоғистон Республикаси прокурори даражасигача кўтарилди. У киши қайси лавозимда ишламасин – хоҳ туман прокурори бўлсин, хоҳ Президент Халқ қабулхонаси мудири бўлсин, доимо оддий одамларнинг дардини тинглашга, ҳуқуқларини ҳимоя қилишга интилди. Унинг ҳаёти қонун ҳимоячиси бўлишни мақсад қилган ҳар бир ёш учун ибрат мактабидир.

Бугунги кунда Амударё тумани прокуратураси ходимлари ҳам айнан Ҳакимбой Халимов каби устозлар ўгитларига амал қилган ҳолда, туманда қонунийликни мустаҳкамлаш йўлида хизмат қилмоқдалар. Прокуратура органларининг фаолияти фақатгина жиноятчиликка қарши курашиш ёки айбдорларни жазолаш билан чекланиб қолмайди. Замон талабига кўра, прокурор – бу ислоҳотчи, тадбиркорнинг кўмакчиси ва фуқаролар ҳуқуқининг ҳимоячисига айланган.

Айни пайтда Баҳром Машарипов бошчилигидаги туман прокуратураси жамоаси томонидан туманда ижтимоий-иқтисодий дастурларнинг ижроси, тадбиркорликни қўллаб-қувватлаш, ер ресурсларидан оқилона фойдаланиш ва экологик барқарорликни таъминлаш устидан қатъий назорат ўрнатилган. Ҳар куни ўтказилаётган фуқаролар қабули, сайёр учрашувлар ва мурожаатлар билан ишлаш жараёнида прокуратура ходимлари "Инсон қадри учун" тамойилини бош мезон сифатида қадрлаб, шунга мос равишда намунали фаолият юритмоқдалар.

Бундан ташқари, ёшларни ватанпарварлик руҳида тарбиялаш, уларни турли ёт ғоялар ва ҳуқуқбузарликлардан асраш борасидаги профилактик тадбирларда ҳам прокуратура ходимлари фаоллик кўрсатмоқда. Коррупцияга қарши курашиш, бюджет маблағларининг мақсадли сарфланишини таъминлаш ва "яширин иқтисодиёт"га барҳам бериш каби долзарб йўналишларда олиб борилаётган ишлар ҳам айнан устозлар қолдирган "поклик ва ҳалоллик" мактабининг давомидир.

Зиёрат давомида прокуратура фахрийси Жумамурат Хайтбоев ва бошқалар марҳум генерални хотирлаб, унинг жуда талабчан, аммо ниҳоятда адолатли инсон бўлганини ёдга олдилар. У киши бирор ходимни асоссиз жазоламас, ҳар бир ишнинг тагига етишни талаб қилар эди. Энг муҳими, Ҳакимбой Халимов прокуратура органи ходими бўлсада самимий, меҳрли инсон қиёфасини асло йўқотмади. 2020 йилда, 66 ёшида бевақт орамиздан кетган бўлса-да, унинг ўгитлари шогирдлари учун йўлчи юлдуздир.

Амударё тумани прокуратураси томонидан амалга оширилган ушбу тадбир шуни кўрсатадики, тизимда авлодлар алмашинуви юз бергани билан, мақсад ва қадриятлар ўзгармайди. Ҳакимбой Халимов каби фидойиларнинг хотирасига кўрсатилган ҳурмат – бу аслида Ватанга, қонунга ва адолатга бўлган садоқатнинг ифодасидир.