Xotira – muqaddas, qadr – aziz: Amudaryoda general-mayor Xakimboy Xalimovning yorqin xotirasi yodga olindi

Inson qadri, uning ezgu amallari va qoldirgan maʼnaviy merosi yillar oʻtsa-da, avlodlar qalbida yashashda davom etadi. Ayniqsa, huquqni muhofaza qilish organlari, xususan, prokuratura tizimida koʻp yillar davomida qonun ustuvorligini taʼminlashga umrini bagʻishlagan, sohada oʻziga xos maktab yaratgan fidoyi insonlarni yod etish – bugungi kun xodimlari uchun ham maʼnaviy quvvat, ham kasbiy masʼuliyat manbaidir.

Amudaryo tumani prokurori, adliya maslahatchisi Bahrom Masharipov boshchiligidagi prokuratura jamoasi soha faxriysi Jumamurat Xaytboyev hamrohligida 3-darajali davlat adliya maslahatchisi, general-mayor Hakimboy Ashirovich Xalimovning mangu qoʻnim topgan maskanini ziyorat qildilar. Qabr boshida Qurʼon tilovat qilinib, marhumning ruhiga duolar qilindi. Ziyorat asnosida faxriylar va yosh prokurorlar Xakimboy Xalimovning serqirra faoliyati, uning murakkab vaziyatlarda qabul qilgan odilona qarorlari, insoniylik fazilatlarini yodga oldilar.

Xakimboy Xalimov shunchaki rahbar emas, balki haqiqiy maʼnoda "xalq prokurori" edi. 1954-yilda tavallud topgan Xakimboy Ashirovich oʻz mehnat faoliyatini oddiy tergovchilikdan boshlab, yuksak salohiyati va tinimsiz mehnati evaziga Oʻzbekiston Respublikasi Bosh prokurorining oʻrinbosari va Qoraqalpogʻiston Respublikasi prokurori darajasigacha koʻtarildi. U kishi qaysi lavozimda ishlamasin – xoh tuman prokurori boʻlsin, xoh Prezident Xalq qabulxonasi mudiri boʻlsin, doimo oddiy odamlarning dardini tinglashga, huquqlarini himoya qilishga intildi. Uning hayoti qonun himoyachisi boʻlishni maqsad qilgan har bir yosh uchun ibrat maktabidir.

Bugungi kunda Amudaryo tumani prokuraturasi xodimlari ham aynan Hakimboy Xalimov kabi ustozlar oʻgitlariga amal qilgan holda, tumanda qonuniylikni mustahkamlash yoʻlida xizmat qilmoqdalar. Prokuratura organlarining faoliyati faqatgina jinoyatchilikka qarshi kurashish yoki aybdorlarni jazolash bilan cheklanib qolmaydi. Zamon talabiga koʻra, prokuror – bu islohotchi, tadbirkorning koʻmakchisi va fuqarolar huquqining himoyachisiga aylangan.

Ayni paytda Bahrom Masharipov boshchiligidagi tuman prokuraturasi jamoasi tomonidan tumanda ijtimoiy-iqtisodiy dasturlarning ijrosi, tadbirkorlikni qoʻllab-quvvatlash, yer resurslaridan oqilona foydalanish va ekologik barqarorlikni taʼminlash ustidan qatʼiy nazorat oʻrnatilgan. Har kuni oʻtkazilayotgan fuqarolar qabuli, sayyor uchrashuvlar va murojaatlar bilan ishlash jarayonida prokuratura xodimlari "Inson qadri uchun" tamoyilini bosh mezon sifatida qadrlab, shunga mos ravishda namunali faoliyat yuritmoqdalar.

Bundan tashqari, yoshlarni vatanparvarlik ruhida tarbiyalash, ularni turli yot gʻoyalar va huquqbuzarliklardan asrash borasidagi profilaktik tadbirlarda ham prokuratura xodimlari faollik koʻrsatmoqda. Korruptsiyaga qarshi kurashish, byudjet mablagʻlarining maqsadli sarflanishini taʼminlash va "yashirin iqtisodiyot"ga barham berish kabi dolzarb yoʻnalishlarda olib borilayotgan ishlar ham aynan ustozlar qoldirgan "poklik va halollik" maktabining davomidir.

Ziyorat davomida prokuratura faxriysi Jumamurat Xaytboyev va boshqalar marhum generalni xotirlab, uning juda talabchan, ammo nihoyatda adolatli inson boʻlganini yodga oldilar. U kishi biror xodimni asossiz jazolamas, har bir ishning tagiga yetishni talab qilar edi. Eng muhimi, Hakimboy Xalimov prokuratura organi xodimi boʻlsada samimiy, mehrli inson qiyofasini aslo yoʻqotmadi. 2020-yilda, 66 yoshida bevaqt oramizdan ketgan boʻlsa-da, uning oʻgitlari shogirdlari uchun yoʻlchi yulduzdir.

Amudaryo tumani prokuraturasi tomonidan amalga oshirilgan ushbu tadbir shuni koʻrsatadiki, tizimda avlodlar almashinuvi yuz bergani bilan, maqsad va qadriyatlar oʻzgarmaydi. Hakimboy Xalimov kabi fidoyilarning xotirasiga koʻrsatilgan hurmat – bu aslida Vatanga, qonunga va adolatga boʻlgan sadoqatning ifodasidir.