BUYuKLAR XOTIRASI MANGUDIR
Shu yil 26-yanvar kuni Oʻzbekiston Respublikasi Prezidentining "Oʻzbekiston Respublikasining Birinchi Prezidenti Islom Abdugʻaniyevich Karimovning xotirasini abadiylashtirish toʻgʻrisida”gi qarori qabul qilindi. Men qaror matni bilan tanisharkanman, elu-yurti uchun fidoyilik qilib yashagan insonlarning xotirasi nafaqat yaqinlari, balki butun xalqi, ona Vatani uchun ham naqadar aziz ekanligini yurak-yuragimdan his etdim.
Shunday insonlar bor: oʻz ezgu aʼmollari bilan tarix sahifalarini nurafshon aylab, mangulik sari yuz tutadilar.
Yurtboshimiz – Islom Abdugʻaniyevich Karimov ana shunday sohirtabiat buyuk inson edilar. Besh oydirki, biz ana shu buyuk insonning buyuk xotiralarini eslab, Oʻzbekiston deb atalmish qudratli davlat qurgan xalq otasi boshlab bergan ulugʻvor ishlar silsilasida yashab, mehnat qilmoqdamiz.
Yuragimda chuqur ehtirom bilan mamlakatimizda yuz berayotgan buyuk oʻzgarishlarni kuzatarkanman, Yurtboshimizning mustaqillikning birinchi yillaridayoq Oliy Kengash minbaridan turib aytgan soʻzlari yodimga tushadi.
- "... afsuski, dengizimiz yoʻq. Dengizimiz boʻlganida, dunyoga chiqishimiz tez va oson boʻlardi...”
Ha, azizlar, Oʻzbekistonni dunyo okeanlari orqali dunyo bilan bogʻlovchi ochiq dengizimiz yoʻq. Buni jugʻrofiy jihatdan izohlab oʻtirishning ham aslo hojati yoʻq. Lekin men bir haqiqat qarshisida doimo bosh egaman va baralla aytgim keladi:
– Oʻzbekiston mamlakati uchun ochiq dengiz aslo shart boʻlmadi. Mustaqil Oʻzbekiston uchun Islom Karimovning oʻzi Dengiz boʻldi, azizlar!
U bir zilol irmoq edi, daryoga aylandi. Erk va Ozodlik uchun kurash maydoniga jasorat bilan, shiddat bilan oqdi. Toʻlqinlarga koʻksini qalqon qilib, Istiqlol atalgan yoʻlga chiqdi. Aziz xalqini oʻzidan aziz tutib, bu ulugʻ yoʻl zahmatlariga matonat bilan bardosh bergan sarbonga - xalq ozodligini, hurligini himoya qilmoqqa qodir qudratli kuchga aylandi. Toshqin yurakli ana shu buyuk insonning oʻzi Oʻzbekiston bilan dunyoni bogʻlab turguvchi shovullagan Dengiz boʻldi!
Mustaqillikning birinchi yillari esingizdami, azizlar? Agar esingizda boʻlsa, Oʻzbekistonning birinchi Prezidenti oʻrtaga tashlagan ilk shiorni bir yodga oling-a! "Oʻzbekiston – kelajagi buyuk davlat!” degan shior edi bu! Sobiq shoʻro davlatining buyruqlarini bajarishga oʻrganib qolgan, hamon boshini egib, mutelikni oʻz taqdiri deb bilguvchi fikri, bilimi sayoz ayrim kimsalar bu shiorga eʼtiborsizlik bilan qarab, qoʻl siltab qoʻyganlari-chi? Iqtisodiy tizim izdan chiqib, nochor kun kechirayotgan xalqimizni chalgʻitish uchun ayrim nokas kimsalar tomonidan turli nayranglar oʻylab topilmadimi, oʻsha kezlarda? Shulardan faqat Toshkent viloyatining Boʻka tumanida yuz bergan millatlararo mojaroni, 1991 yildagi Namangan voqealarini eslang. Prezident Islom Karimov yakka oʻzi goʻyo "iqtisodiy nochorlikdan aziyat chekayotgan” olomon orasiga dadil kirib bordi. Har bir fuqaro bilan yuragi toʻlib gaplashdi. Johillik botqogʻi tomon qadam qoʻyayotgan olomonni tinchitdi. Oʻshanda, butun Markaziy Osiyo xalqlarini oʻz domiga tortib ketishi rejalashtirilgan birodarkushlikning dahshatli olovini oʻchirdi u! Ana shunday birodarkushlik urushi olovini toʻxtatish uchun insonda nafaqat kuch-qudrat, balki oʻtkir fikr, aql-zakovat, metin iroda, jasorat, xalqparvarlik tuygʻusi kerak edi. Prezident Islom Karimovda bu sifatlarning barchasi bor edi va oʻsha daqiqalardayoq ana shu sifatlari bilan aziz xalqi uchun chinakam Dengiz, Oʻzbekiston mamlakati oldida qudratli qoyaga aylana oldi.
Ulugʻ inson – Birinchi Prezidentimizning daʼvatkor, yoqimli ovozlari bugun ona Vatan kengliklari boʻylab jaranglaydi:
– Avlodlarimizga ozod va obod Vatan qoldiraylik!
Har bir ishi, har bitta soʻzi bilan oʻz xalqiga ibrat koʻrsatib yashagan Islom Karimov oʻzi hayotligida ilgari surgan ulugʻvor gʻoyalariga, shiorlariga sodiq yashadilar. Atrofga bir boqing, azizlar! Xalqimizning aziz va fidoyi rahnamosi Islom Abdugʻaniyevich Karimovdan oʻzi yaxshi koʻradigan Oʻzbekiston farzandlariga, nabiralariga ozod va obod Vatan qoldi! Yangi-yangi qishloqlar, ravnaq topayotgan shaharlar, bir-birlariga jondosh va qon-qardosh, qarindosh xalq qoldi!
Prezidentimiz Sh.Mirziyoyevning bu qarori Birinchi Prezidentimizning xotirasiga xalqimizning cheksiz hurmat va ehtiromi ifodasidir.
Yillar oʻtadi, asrlar aylanadi, necha-necha baxtiyor avlodlar keladi dunyoga. Lekin oʻzbek xalqining buyuk va jasoratli farzandi, mustaqil yurt tuzgan fidoyi, barchamiz uchun otamizday mehribon va aziz inson – Islom Karimovning nomi millat, Vatan nomi bilan birga yashayveradi.
Robiya YOʻLDOShEVA, jurnalist.
(Foto - http://uz24.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
