Ajdodlar xotirasiga ehtirom — milliy qadriyatlarimizning yuksak namunasi

Xalqimiz azal-azaldan ota-bobolar xotirasini ulugʻlashni, muqaddas qadamjolar va qabristonlarni obod saqlashni eng ezgu va savobli amallardan biri deb bilib keladi. Ayniqsa, muborak Qurbon Hayiti arafasida amalga oshiriladigan xayriya va obodonlashtirish ishlari inson qalbidagi mehr-oqibat, hamjihatlik va bagʻrikenglik fazilatlarini yanada mustahkamlaydi.

Ana shunday ezgu anʼanalarning mantiqiy davomi sifatida 17-may kuni Amudaryo tumanining Toʻlqin ovuli hududida joylashgan “Qoʻlbergan bobo” qabristonida keng koʻlamli hashar ishlari tashkil etildi. Tadbirda mahalla faollari, nuroniylar, yoshlar hamda keng jamoatchilik vakillari faol ishtirok etib, muqaddas maskanni obod etish yoʻlida bir yoqadan bosh chiqarib mehnat qildilar.

Hashar davomida qabriston hududi begona oʻt-oʻlanlardan tozalanib, yoʻlaklar tartibga keltirildi, daraxtlar oqlanib, tevarak-atrof obodonlashtirildi. Ishtirokchilarning fidokorona mehnati natijasida maskan yanada fayzli va saranjom holatga keltirildi. Ayniqsa, nuroniylarning yoshlar bilan yelkama-yelka mehnat qilgani tadbirga oʻzgacha maʼnaviy ruh bagʻishladi.

Darhaqiqat, qabristonlarni obod saqlash — bu shunchaki hashar yoki tozalash ishlari emas. Bu avvalo ajdodlar ruhiga boʻlgan hurmat va ehtiromning yorqin ifodasidir. Inson oʻz oʻtmishini, ildizlarini va ota-bobolari merosini qadrlagan holdagina maʼnaviy barkamollikka erishadi.

Tadbir davomida nuroniylar tomonidan yosh avlodga milliy qadriyatlar, mahalla birdamligi, kattalarga hurmat va muqaddas maskanlarni asrab-avaylash borasida samimiy nasihatlar qilindi. Bu esa yoshlarning qalbida tarixiy xotira va ajdodlar merosiga nisbatan yanada chuqur hurmat tuygʻusini shakllantirishga xizmat qildi.

Bugungi kunda yurtimizda mahallalarni obod qilish, muqaddas qadamjolar va qabristonlarni tartibli saqlash, aholi oʻrtasida hamjihatlik muhitini mustahkamlashga alohida eʼtibor qaratilmoqda. Chunki obod maskan — xalqning yuksak maʼnaviyati, madaniyati va tafakkuridan darak beradi. Ayniqsa, bunday ezgu tadbirlarda yoshlarning faol qatnashayotgani milliy qadriyatlarimizning bardavomligini koʻrsatadi.

Hashar davomida hukm surgan samimiy muhit, oʻzaro ahillik va birdamlik barchaga koʻtarinki kayfiyat ulashdi. Mahalla ahli birgalikda qilgan savobli ishlari orqali nafaqat muqaddas maskanni obod etdilar, balki insoniylik, mehr-oqibat kabi yuksak fazilatlarni yana bir bor namoyon etdilar.

Qurbon Hayiti arafasida tashkil etilgan ushbu xayrli tadbir barchaga bir haqiqatni yana bir bor eslatdi: ajdodlar xotirasiga hurmat — bu millatning maʼnaviy kuchi va qadriyatlariga sadoqatining ramzidir. Muqaddas qadamjolarni obod saqlash, ularga ehtirom koʻrsatish esa har bir insonning maʼnaviy burchidir.

Charos Arslonova, tuman hokimligining Axborot xizmati rahbari.