Amudaryoda “Yangi Oʻzbekiston bunyodkorlari” kasbiy mahorat milliy tanlovining tuman bosqichi yuqori saviyada oʻtkazildi

Bugun, payshanba kuni, Yoshlar kuni munosabati bilan Amudaryo tumanida “Yangi Oʻzbekiston bunyodkorlari” kasbiy mahorat milliy tanlovining tuman bosqichi koʻtarinki ruhda va yuqori saviyada tashkil etildi. Yoshlarning kasbiy bilim va koʻnikmalarini namoyon etish, ularning mehnat bozorida raqobatbardosh mutaxassis boʻlib shakllanishini qoʻllab-quvvatlashga qaratilgan mazkur tanlov tuman yoshlari hayotidagi muhim tadbirlardan biriga aylandi.

Tadbirda tuman hokimi Sobir Xoʻjametov boshchiligidagi rahbarlar, mutasaddi tashkilotlar vakillari, mahallalar yoshlar yetakchilari hamda faol yoshlar ishtirok etdi. Soʻzga chiqqanlar mamlakatimizda yoshlar siyosatini izchil amalga oshirish, ularga zamonaviy kasb-hunarlarni egallash uchun keng imkoniyatlar yaratish hamda tashabbuskor va intiluvchan yoshlarni har tomonlama qoʻllab-quvvatlash borasida olib borilayotgan ishlar haqida alohida toʻxtalib oʻtdilar.

Taʼkidlanganidek, bugungi kunda Yangi Oʻzbekiston taraqqiyotining muhim omillaridan biri – bu malakali, bilimli va zamon talablariga mos kadrlarni tayyorlashdir. Shu maʼnoda, “Yangi Oʻzbekiston bunyodkorlari” kasbiy mahorat milliy tanlovi yoshlarning kasbga boʻlgan qiziqishini oshirish, ularning amaliy koʻnikmalarini sinovdan oʻtkazish va eng iqtidorli yoshlarni aniqlashda muhim ahamiyat kasb etmoqda.

Mazkur tanlov Oʻzbekiston Respublikasi Vazirlar Mahkamasining 2026- yil 8-apreldagi 152-sonli qarori ijrosini taʼminlash maqsadida tashkil etilib, bir necha yoʻnalishlarda oʻtkazildi. Har bir yoʻnalishda ishtirokchilar oʻz bilim va mahoratini amaliy topshiriqlar orqali namoyish etib, hakamlar hayʼati tomonidan baholab borildi.

Grafik dizayn yoʻnalishi boʻyicha bellashuv tumanidagi IT markazda tashkil etildi. Ushbu yoʻnalishda qatnashgan yoshlar zamonaviy grafik dasturlar yordamida kreativ loyihalar yaratib, oʻzlarining ijodiy fikrlashi, dizaynerlik yondashuvi va raqamli texnologiyalar boʻyicha bilimlarini namoyon etdilar. Tayyorlangan ishlar innovatsion gʻoyalar va milliy qadriyatlarni zamonaviy uslubda aks ettirgani bilan ahamiyat kasb etdi.

Tibbiy va ijtimoiy parvarish yoʻnalishi boʻyicha tanlov tuman tibbiyot boʻlimida oʻtkazildi. Bu yerda ishtirokchilar bemorlarga xizmat koʻrsatish madaniyati, birinchi tibbiy yordam koʻrsatish, parvarish jarayonlarini toʻgʻri tashkil etish hamda kasbiy etikaga oid bilim va koʻnikmalarini amalda namoyish etdilar.

Sartaroshlik kasbi boʻyicha musobaqa esa Beruniy mahallasida joylashgan “Dilxushoy” oilaviy korxonasiga qarashli sartaroshxonada tashkil etildi. Ishtirokchilar zamonaviy va milliy uslubdagi soch turmaklarini yaratish, mijozlar bilan ishlash madaniyati hamda xizmat koʻrsatish sifati borasidagi mahoratlarini namoyish etdilar. Hakamlar hayʼati tomonidan ishlarning sifati, estetik koʻrinishi va ijodkorlik darajasiga alohida eʼtibor qaratildi.

Tanlov davomida yoshlar oʻrtasida sogʻlom raqobat muhiti shakllanib, ular oʻzaro tajriba almashish, yangi bilim va koʻnikmalarni egallash imkoniyatiga ega boʻldilar. Ayniqsa, kasbiy mahoratning amaliy jihatlariga katta eʼtibor qaratilgani ishtirokchilarning kelgusidagi faoliyatida muhim tajriba vazifasini oʻtashi bilan ahamiyatlidir.

Shubhasiz, “Yangi Oʻzbekiston bunyodkorlari” kasbiy mahorat milliy tanlovi nafaqat yoshlarning kasbiy salohiyatini yuzaga chiqarish, balki mamlakatimiz taraqqiyotiga munosib hissa qoʻshadigan malakali mutaxassislarni tarbiyalash yoʻlidagi muhim qadamlardan biri boʻlib xizmat qilmoqda.

Charos Arslonova, tuman hokimligining Axborot xizmati rahbari.