ОРЗУЛАР САРИ

Ижод – машаққатли меҳнат, тинимсиз изланишни талаб этадиган мураккаб жараёндир. Унинг маҳсули нечоғлик халққа манзур бўлмоғи ижодкорнинг айтмоқчи бўлган фикрини қай даражада ифода эта олишига, бой ва жозибали она тилимиз имкониятларидан фойдалана олишига боғлиқ.

Айни кунда Амударё академик лицейининг 2-босқичида таълим олаётган Динора Каримбоева ҳам ана шу масъулиятни ҳис қилган ҳолда адабий жараёнга дадил кириб келаётган ёшлардан.

У шеър ёзишга жуда эрта қизиқди. "Орзуларим бир олам”, "Истиқлолим – истиқболим” шеърлар тўпламлари кўпчиликнинг севимли китобига айланди. Тумандаги ёш ижодкорларнинг сара ижод намуналаридан тузилган "Жайхун жилғалари” номли тўпламдан унинг ҳам шеърлари жой олган.

Диноранинг қизиқишлари кўлами кенг. Шу боисдан ҳам ўқувчилик давридаёқ, "Яшил чироқ” телеўйинининг, ўтган йили эса "Маҳалланинг энг ораста қизи” кўрик-танловининг мамлакат босқичи ғолиби бўлди.

Вафо ва садоқат тимсоли бўлмиш шоира Зулфиянинг ижодини Динора ўзгача меҳр, ташналик билан ўқийди, айрилиқ дардида, Ҳамид Олимжондек ҳассос шоирнинг севгисига садоқат билан яшашни ҳам бахт деб билган, йиллар армони қалбини ўртаса-да, қаддини буколмаган фидойи аёлнинг дил қатидан тўкилган сатрларга ҳамдард бўлиб ўқийди.

Шоирага издош бўлишни ҳавас қилмаган, ундаги матонат ва жасоратни ўзида мужассам этишга ҳаракат қилмаган қизлар жуда кам топилса керак. Динора ҳам бундан мустасно эмас. У жорий йилда Зулфия номидаги Давлат мукофоти учун номзодларни саралаш босқичларидан муваффақиятли ўтди ва мамлакат босқичида қатнашган туманимиз илк вакилаларидан бири бўлди.

– Бу ютуғим менга яна ҳам ўзгача масъулият бағишлайди, – дейди Динора – Мен ўқишда ҳам, ижодда ҳам Зулфия ижодидан ўзимга куч оламан.

Илм ва ижод сари дадил интилаётган тенгдошим Динора Каримбоевага келгусида ҳам муваффақиятлар ёр бўлаверсин, деб қоламан.

Севара ИСМОИЛОВА, Амударё академик лицейи ўқувчиси.