“Янги Ўзбекистон” массиви — фаровон ҳаёт сари ишончли қадам

Бугунги кунда мамлакатимизда аҳолини муносиб уй-жой билан таъминлаш, яшаш шароитларини яхшилаш ва шаҳарсозлик маданиятини янги босқичга олиб чиқиш борасида кенг кўламли ислоҳотлар амалга оширилмоқда. Ана шундай эзгу ташаббусларнинг ёрқин намунаси Амударё тумани Дўстлик маҳалласи ҳудудида барпо этилаётган “Янги Ўзбекистон” массивидир.

Мазкур массив ҳудудида 2024-йилда 18,5 гектар майдонда жами 13 та кўп қаватли турар жой қурилиши бошланган эди. Қисқа вақт ичида жадаллик билан олиб борилган қурилиш ишлари натижасида 2025-йилга келиб ушбу уйларнинг 7 таси тўлиқ битказилиб, фойдаланишга топширилди. Айни пайтда қолган 6 та кўп қаватли турар жойларнинг қурилиш ишлари изчил давом этмоқда.

Бугун ушбу массивда юзлаб оилалар замонавий, қулай ва хавфсиз шароитга эга хонадонларда осойишта ҳаёт кечирмоқда. Янги барпо этилган уй-жойлар нафақат ташқи кўриниши, балки ички қулайликлари билан ҳам аҳоли талабларига тўлиқ жавоб бермоқда.

Хусусан, Йўлдашевлар оиласи учун 2026-йил унутилмас қувончлар билан бошланди. Ёш оила Президентимиз томонидан аҳолини уй-жой билан таъминлаш кўламини кенгайтириш, ижтимоий ҳимояни кучайтириш ҳамда ёш оилаларни қўллаб-қувватлаш мақсадида жорий этилган субсидиялар ажратиш тизими орқали “Янги Ўзбекистон” массивидан 3 хонали замонавий турар жой эгасига айланди. Бу эса давлат сиёсатининг инсон манфаатларига қаратилганини яна бир бор тасдиқлайди.

Қисқа муддат ичида қад ростлаган ушбу кўп қаватли турар жойлар аҳолининг кундалик эҳтиёжларини тўлиқ қондиришга мўлжалланган. Уйлар замонавий архитектура лойиҳалари асосида қурилган бўлиб, табиий газ, электр энергияси, ичимлик суви, канализация тармоқлари, шунингдек, ички йўллар ва инфратузилма билан тўлиқ таъминланган. Атроф-муҳит ободончилиги, болалар майдончалари ва яшил ҳудудлар ҳам аҳоли учун қулай яшаш муҳитини яратмоқда.

Алоҳида эътиборга молик жиҳати шундаки, қурилиш жараёнларига, асосан, маҳаллий қурувчи ташкилотлар жалб этилди. Бу эса нафақат сифатли қурилиш ишларини таъминлаш, балки ишсиз аҳолининг бандлигини таъминлаш, янги иш ўринлари яратиш имконини берди.

Келгусида ҳам бу борадаги ишлар изчил давом эттирилади. Жумладан, 2026-йилда “Янги Ўзбекистон” массиви таркибида яна 10 та кўп қаватли турар жой қурилиб, фойдаланишга топширилиши режалаштирилган.

Маълумот ўрнида таъкидлаш жоизки, Амударё туманида 2030-йилга қадар жами 49 та кўп қаватли турар жой қурилиши белгиланган бўлиб, бу минглаб оилалар учун янги ҳаёт, янги имкониятлар ва фаровон келажак демакдир.

“Янги Ўзбекистон” массиви — бу шунчаки уй-жой эмас, балки инсон қадрини улуғлаш, ижтимоий адолат ва барқарор тараққиёт сари ташланган муҳим қадамдир.

Чарос Арслонова, туман ҳокимлигининг Ахборот хизмати раҳбари.