“Yangi Oʻzbekiston” massivi — farovon hayot sari ishonchli qadam

Bugungi kunda mamlakatimizda aholini munosib uy-joy bilan taʼminlash, yashash sharoitlarini yaxshilash va shaharsozlik madaniyatini yangi bosqichga olib chiqish borasida keng koʻlamli islohotlar amalga oshirilmoqda. Ana shunday ezgu tashabbuslarning yorqin namunasi Amudaryo tumani Doʻstlik mahallasi hududida barpo etilayotgan “Yangi Oʻzbekiston” massividir.

Mazkur massiv hududida 2024-yilda 18,5 gektar maydonda jami 13 ta koʻp qavatli turar joy qurilishi boshlangan edi. Qisqa vaqt ichida jadallik bilan olib borilgan qurilish ishlari natijasida 2025-yilga kelib ushbu uylarning 7 tasi toʻliq bitkazilib, foydalanishga topshirildi. Ayni paytda qolgan 6 ta koʻp qavatli turar joylarning qurilish ishlari izchil davom etmoqda.

Bugun ushbu massivda yuzlab oilalar zamonaviy, qulay va xavfsiz sharoitga ega xonadonlarda osoyishta hayot kechirmoqda. Yangi barpo etilgan uy-joylar nafaqat tashqi koʻrinishi, balki ichki qulayliklari bilan ham aholi talablariga toʻliq javob bermoqda.

Xususan, Yoʻldashevlar oilasi uchun 2026-yil unutilmas quvonchlar bilan boshlandi. Yosh oila Prezidentimiz tomonidan aholini uy-joy bilan taʼminlash koʻlamini kengaytirish, ijtimoiy himoyani kuchaytirish hamda yosh oilalarni qoʻllab-quvvatlash maqsadida joriy etilgan subsidiyalar ajratish tizimi orqali “Yangi Oʻzbekiston” massividan 3 xonali zamonaviy turar joy egasiga aylandi. Bu esa davlat siyosatining inson manfaatlariga qaratilganini yana bir bor tasdiqlaydi.

Qisqa muddat ichida qad rostlagan ushbu koʻp qavatli turar joylar aholining kundalik ehtiyojlarini toʻliq qondirishga moʻljallangan. Uylar zamonaviy arxitektura loyihalari asosida qurilgan boʻlib, tabiiy gaz, elektr energiyasi, ichimlik suvi, kanalizatsiya tarmoqlari, shuningdek, ichki yoʻllar va infratuzilma bilan toʻliq taʼminlangan. Atrof-muhit obodonchiligi, bolalar maydonchalari va yashil hududlar ham aholi uchun qulay yashash muhitini yaratmoqda.

Alohida eʼtiborga molik jihati shundaki, qurilish jarayonlariga, asosan, mahalliy quruvchi tashkilotlar jalb etildi. Bu esa nafaqat sifatli qurilish ishlarini taʼminlash, balki ishsiz aholining bandligini taʼminlash, yangi ish oʻrinlari yaratish imkonini berdi.

Kelgusida ham bu boradagi ishlar izchil davom ettiriladi. Jumladan, 2026-yilda “Yangi Oʻzbekiston” massivi tarkibida yana 10 ta koʻp qavatli turar joy qurilib, foydalanishga topshirilishi rejalashtirilgan.

Maʼlumot oʻrnida taʼkidlash joizki, Amudaryo tumanida 2030-yilga qadar jami 49 ta koʻp qavatli turar joy qurilishi belgilangan boʻlib, bu minglab oilalar uchun yangi hayot, yangi imkoniyatlar va farovon kelajak demakdir.

“Yangi Oʻzbekiston” massivi — bu shunchaki uy-joy emas, balki inson qadrini ulugʻlash, ijtimoiy adolat va barqaror taraqqiyot sari tashlangan muhim qadamdir.

Charos Arslonova, tuman hokimligining Axborot xizmati rahbari.