КЎЗИМ ҚАРОҒИДАСАН, ВАТАН!
Бу йил Ўзбекистон мустақиллигига 26 йил тўлади. Шу қисқагина вақт ичида олам-олам ўзгаришлар рўй берди, қанчадан-қанча юксалишлар бўлди. Бу юксалишлар ҳеч шубҳасиз, мамлакатимизнинг Биринчи Президенти И.А.Каримов номи билан боғлиқ. Бу инсон ҳар бир ўғил-қиз учун қайғурди, бошини силади, ҳеч бир мамлакат фарзандларидан кам қилмади. Мустақиллик фарзандларига, таълим жараёнига катта эътибор қаратиб, 12 йиллик таълимни жорий этди. Ҳар йили ўтказиладиган анжуманлар, фестиваллар, илмий-маърифий конференциялар билимимизни ошириб, тафаккуримизни кенгайтираётгани, бундан ташқари, юртимизда спортга катта эътибор қаратилаётгани ҳавасга лойиқ.
Биргина 2016 йилда Бразилиянинг Рио-де-Жанейро шаҳрида ўтказилган XXXI ёзги олимпиада ўйинларида юртимиз спортчилари эришган ютуқлар ёшларга ғамхўрликнинг амалий исботи бўлди.
Мамлакатимиз спортчилари ғалаба қилган пайтда, байроғимиз энг юқорига кўтарилганда, мадҳиямиз баралла янграганда ҳар бир ўзбекистонликнинг юрагини кучли ҳаяжон ва қувонч эгаллади. Булар нафақат спортчи-ёшларимизнинг, балки бутун ўзбекистонликларнинг ютуғидир.
Ҳаётда, меҳнатда, спорт-у санъатда, ижодда алоҳида қобилиятли қизлар учун Зулфия номидаги давлат мукофоти таъсис этилишининг ўзи энг олий сийловдир. Чунки бундай мукофот ҳеч бир мамлакат қизлари учун жорий этилмаган.
Фақат байрамлар, тантанали кунлар, тў-ю базмлар қилиб, даврон сураётган халқимизга ҳеч қачон кўз тегмасин!
Аллоҳ бизга боғ деса, боғи бор, тоғ деса, тоғи бор, қирларида баҳор шивирлайдиган, саҳар чоғи булбуллар мадҳини ўқиб адо қилолмайдиган бир юртни Ватан қилиб берган экан, минг-минг шукрона билан яшамоғимиз керак.
Ҳаётда шундай яшайликки, ота-онамиз биздан фахрлансин, бизни тарбиялаб, вояга етказгани учун рози бўлсин!
Азизлар, Ватан бизга нима берди, деб эмас, балки биз она Ўзбекистонимизга нима бердик, деб ёниб яшайлик.
Мен эндигина мактабга илк қадамимни қўйганимда, эндигина Ватан муҳаббатини ҳис этганимда бир нарсага амин бўлдимки, менинг Ватанимдай меҳрибон юрт ҳеч қаерда йўқ! Мен бахтли юртнинг бахтиёр фарзандиман.
Инобат ОДИЛБОЕВА, Манғит Иқтисодиёт коллежи ўқувчиси.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
