KOʻZIM QAROGʻIDASAN, VATAN!

Bu yil Oʻzbekiston mustaqilligiga 26-yil toʻladi. Shu qisqagina vaqt ichida olam-olam oʻzgarishlar roʻy berdi,  qanchadan-qancha yuksalishlar boʻldi. Bu yuksalishlar hech shubhasiz, mamlakatimizning Birinchi Prezidenti I.A.Karimov nomi bilan bogʻliq. Bu inson har bir oʻgʻil-qiz uchun qaygʻurdi, boshini siladi, hech bir mamlakat farzandlaridan kam qilmadi. Mustaqillik farzandlariga, taʼlim jarayoniga katta eʼtibor qaratib, 12 yillik taʼlimni joriy etdi. Har yili oʻtkaziladigan anjumanlar, festivallar, ilmiy-maʼrifiy konferentsiyalar bilimimizni oshirib, tafakkurimizni kengaytirayotgani, bundan tashqari, yurtimizda sportga katta eʼtibor qaratilayotgani havasga loyiq.

Birgina 2016 yilda Braziliyaning Rio-de-Janeyro shahrida oʻtkazilgan XXXI yozgi olimpiada oʻyinlarida yurtimiz sportchilari erishgan yutuqlar yoshlarga gʻamxoʻrlikning amaliy isboti boʻldi.

Mamlakatimiz sportchilari gʻalaba qilgan paytda, bayrogʻimiz eng yuqoriga koʻtarilganda, madhiyamiz baralla yangraganda har bir oʻzbekistonlikning  yuragini kuchli hayajon va quvonch egalladi. Bular nafaqat sportchi-yoshlarimizning, balki butun oʻzbekistonliklarning yutugʻidir.

Hayotda, mehnatda, sport-u sanʼatda, ijodda alohida qobiliyatli qizlar uchun Zulfiya nomidagi davlat mukofoti taʼsis etilishining oʻzi eng oliy siylovdir. Chunki bunday mukofot hech bir mamlakat qizlari uchun joriy etilmagan.

Faqat bayramlar, tantanali kunlar, toʻ-yu bazmlar qilib, davron surayotgan xalqimizga hech qachon koʻz tegmasin!

Alloh bizga bogʻ desa, bogʻi bor, togʻ desa, togʻi bor, qirlarida bahor shivirlaydigan, sahar chogʻi bulbullar madhini oʻqib ado qilolmaydigan bir yurtni Vatan qilib bergan ekan, ming-ming shukrona bilan yashamogʻimiz kerak.

Hayotda shunday yashaylikki, ota-onamiz bizdan faxrlansin, bizni tarbiyalab, voyaga yetkazgani uchun rozi boʻlsin!

Azizlar, Vatan bizga nima berdi, deb emas, balki biz ona Oʻzbekistonimizga nima berdik, deb yonib yashaylik.

Men endigina maktabga ilk qadamimni qoʻyganimda, endigina Vatan muhabbatini his etganimda bir narsaga amin boʻldimki, mening Vatanimday mehribon yurt hech qayerda yoʻq! Men baxtli yurtning baxtiyor farzandiman.

Inobat ODILBOYeVA, Mangʻit Iqtisodiyot kolleji oʻquvchisi.

(Foto - http://uza.uz)