ЭЪТИБОР ВА РАҒБАТ УЛАРНИ АСТОЙДИЛ МЕҲНАТ ҚИЛИШГА УНДАМОҚДА
Мамлакатимизда амалга оширилаётган барча соҳалардаги ислоҳотлар, эришилаётган ютуқлар, янгиланишлар, ўзгаришлар замирида мўътабар касб эгалари – муаллимларнинг алоҳида ўрни бор. Боиси ушбу жараёнларни амалга ошираётган жамики инсонларни илм ўргатиб, тарбиялаб вояга етказган устоз-муаллимлардир. Кейинги вақтларда соҳага улкан эътибор қаратилаётгани узоқ йиллар гоҳ қурилишга гоҳ пахта яганаси, гоҳ терими, баъзан эса жазирама офтоб тиғида ободонлаштириш ишларига сафарбар этилиб келинган соҳа ходимларининг ўз касбига муносабати тубдан ўзгаришига олиб келди, меҳнати моддий ва маънавий қадрланаётгани, фаолиятига салбий таъсир кўрсатувчи тўсиқлар бартараф этилгани, ойлик маошлари оширилиб, ортиқча қоғозбозликка, мажлисбозликка чек қўйилаётгани уларни бугунги талаблар даражасида меҳнат қилишга ундамоқда.
Таълимдаги сифат ва самарадорлик педагоглар салоҳияти, маҳорати, тажрибасига боғлиқ эканлигини тўғри англаб, ишни шу асосда ташкил этишга интилаётган Тўлқин овулидаги 28-сонли умумтаълим мактаби ўқитувчилари янги – 2019-2020 ўқув йилини ўзгача руҳда бошлашди.
1983 йилда қурилиб, фойдаланишга топширилган мактаб биноси 2004 йилдан бери таъмирланмаган бўлса-да, кўриниши, сақланиши эътиборга арзийди. Муассаса аслида 320 ўқувчи ўрин қувватига эга бўлса-да, айни кунда 581 нафар овул фарзандлари таълим-тарбия олишмоқда. Уларга 23 та синфда икки сменада 58 нафар малакали муаллимлар сабоқ беришади.
Жорий ўқув йили учун барча ўқувчилар ижара асосида дарсликлар билан, 47 нафар 1 синфга қабул қилинганлар эса 12 турдаги ўқув предметлари жамланган қулай ва сифатли портфеллар билан таъминланди. 48 нафар кам таъминланган оилалар фарзандларига ўқув дарсликлари ижара пулисиз берилди.
Мактабда шинам ва барча қулайликларга эга кутубхона, спорт зали, ўқув-фан хоналари мавжуд.
Педагогик жамоа ўзларига яратилган имкониятлардан самарали фойдаланишга, ўқувчиларга дарс машғулотларини янги педагогик инновацион технологиялар асосида қизиқарли тарзда ўтишга, ўқувчиларнинг интеллектуал салоҳиятини юксалтиришга интилишмоқда. 2018-2019 ўқув йилида мактаб ўқувчилари Билимлар беллашувининг туман босқичида туман миқёсида 5 ўринни, умумий рейтингда эса 17 ўринни эгаллашди. Шунингдек, мактаб ўқувчиларидан тузилган баскетболчилар жамоаси турли нуфузли мусобақаларда қатнашиб, туман, Қорақалпоғистон босқичларида совринли ўринларни эгаллаб келишмоқда.
Таълим соҳасига, муаллим меҳнатига муносабат ўзгараётгани ҳар бир ўқитувчи фаолиятига ўзининг ижобий таъсирини ўтказмоқда. Ўқув йили бошида мактаб ўқитувчиларининг умумий йиғилиш ўтказилиб, Президентимизнинг жорий йил 23 август куни халқ таълими тизимини ривожлантириш, педагогларнинг малакасини ва жамиятдаги нуфузини ошириш, ёш авлод маънавиятини юксалтириш масалаларига бағишланган видеоселектор йиғилишида таъкидланган вазифалардан ўзларига тегишли хулосалар чиқариб олишди, таълимни бугунги талаблар даражасида ташкил этиш юзасидан ўзаро фикрлашиб, режалар белгилаб олишди. Албатта, бу режалар ўқув йили давомида оғишмай амалга оширилади. Шунингдек, мактаб кузатув Кенгаши ҳам бу борада фаоллик билан иш олиб бормоқда. Эндиликда жамоа муассасани тумандаги илғор мактаблар сафига қўшишга асойдил интилмоқда.
Ёшлар маънавиятини юксалтириш, бўш вақтларини мазмунли ташкил этиш борасида Юртбошимиз томонидан илгари сурилган бешта ташаббус ижросини таъминлаш юзасидан ташкил этилган ҳунармандчилик, чеварлик, ижодкорлик, компьютер саводхонлиги, тасвирий санъат ва мусиқа тўгаракларида дарсдан бўш вақтларида шуғулланаётган ўқувчи ёшларининг иқтидори таҳсинга лойиқ.
Мактабга биз ташриф буюрган кунимиз мактаб кутубхонасида шу ерда ишлаб нафақага чиққан фахрий ўқитувчилар ва ўқувчиларнинг китоб мутолаасига бағишланган давра суҳбати ўтказилаётган экан. Бунингдек хайрли ишлар келгусида ўзининг ижобий самараларини беришига ишонгимиз келади.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
