EʼTIBOR VA RAGʻBAT ULARNI ASTOYDIL MEHNAT QILIShGA UNDAMOQDA

Mamlakatimizda amalga oshirilayotgan barcha sohalardagi islohotlar, erishilayotgan yutuqlar, yangilanishlar, oʻzgarishlar zamirida moʻʼtabar kasb egalari – muallimlarning alohida oʻrni bor. Boisi ushbu jarayonlarni amalga oshirayotgan jamiki insonlarni ilm oʻrgatib, tarbiyalab voyaga yetkazgan ustoz-muallimlardir. Keyingi vaqtlarda sohaga ulkan eʼtibor qaratilayotgani uzoq yillar goh qurilishga goh paxta yaganasi, goh terimi, baʼzan esa jazirama oftob tigʻida obodonlashtirish ishlariga safarbar etilib kelingan soha xodimlarining oʻz kasbiga munosabati tubdan oʻzgarishiga olib keldi, mehnati moddiy va maʼnaviy qadrlanayotgani, faoliyatiga salbiy taʼsir koʻrsatuvchi toʻsiqlar bartaraf etilgani, oylik maoshlari oshirilib, ortiqcha qogʻozbozlikka, majlisbozlikka chek qoʻyilayotgani ularni bugungi talablar darajasida mehnat qilishga undamoqda.

Taʼlimdagi sifat va samaradorlik pedagoglar salohiyati, mahorati, tajribasiga bogʻliq ekanligini toʻgʻri anglab, ishni shu asosda tashkil etishga intilayotgan Toʻlqin ovulidagi 28-sonli umumtaʼlim maktabi oʻqituvchilari yangi – 2019-2020 oʻquv yilini oʻzgacha ruhda boshlashdi.

1983-yilda qurilib, foydalanishga topshirilgan maktab binosi 2004-yildan beri taʼmirlanmagan boʻlsa-da, koʻrinishi, saqlanishi eʼtiborga arziydi. Muassasa aslida 320 oʻquvchi oʻrin quvvatiga ega boʻlsa-da, ayni kunda 581 nafar ovul farzandlari taʼlim-tarbiya olishmoqda. Ularga 23 ta sinfda ikki smenada 58 nafar malakali muallimlar saboq berishadi.

Joriy oʻquv yili uchun barcha oʻquvchilar ijara asosida darsliklar bilan, 47 nafar 1-sinfga qabul qilinganlar esa 12 turdagi oʻquv predmetlari jamlangan qulay va sifatli portfellar bilan taʼminlandi. 48 nafar kam taʼminlangan oilalar farzandlariga oʻquv darsliklari ijara pulisiz berildi.

Maktabda shinam va barcha qulayliklarga ega kutubxona, sport zali, oʻquv-fan xonalari mavjud.

Pedagogik jamoa oʻzlariga yaratilgan imkoniyatlardan samarali  foydalanishga, oʻquvchilarga dars mashgʻulotlarini yangi pedagogik innovatsion texnologiyalar asosida qiziqarli tarzda oʻtishga, oʻquvchilarning intellektual salohiyatini yuksaltirishga intilishmoqda. 2018-2019 oʻquv yilida maktab oʻquvchilari Bilimlar bellashuvining tuman bosqichida tuman miqyosida 5-oʻrinni, umumiy reytingda esa 17-oʻrinni egallashdi. Shuningdek, maktab oʻquvchilaridan tuzilgan basketbolchilar jamoasi turli nufuzli musobaqalarda qatnashib, tuman, Qoraqalpogʻiston bosqichlarida sovrinli oʻrinlarni egallab kelishmoqda.

Taʼlim sohasiga, muallim mehnatiga munosabat oʻzgarayotgani har bir oʻqituvchi faoliyatiga oʻzining ijobiy taʼsirini oʻtkazmoqda. Oʻquv yili boshida maktab oʻqituvchilarining umumiy yigʻilish oʻtkazilib, Prezidentimizning joriy yil 23-avgust kuni xalq  taʼlimi tizimini rivojlantirish, pedagoglarning malakasini va jamiyatdagi nufuzini oshirish, yosh avlod maʼnaviyatini yuksaltirish masalalariga bagʻishlangan videoselektor yigʻilishida taʼkidlangan vazifalardan oʻzlariga tegishli xulosalar chiqarib olishdi, taʼlimni bugungi talablar darajasida tashkil etish yuzasidan oʻzaro fikrlashib, rejalar belgilab olishdi. Albatta, bu rejalar oʻquv yili davomida ogʻishmay amalga oshiriladi. Shuningdek, maktab kuzatuv Kengashi ham bu borada faollik bilan ish olib bormoqda. Endilikda jamoa muassasani tumandagi ilgʻor maktablar safiga qoʻshishga asoydil intilmoqda.

Yoshlar maʼnaviyatini yuksaltirish, boʻsh vaqtlarini mazmunli tashkil etish borasida Yurtboshimiz tomonidan ilgari surilgan beshta tashabbus ijrosini taʼminlash yuzasidan tashkil etilgan hunarmandchilik, chevarlik, ijodkorlik, kompyuter savodxonligi, tasviriy sanʼat va musiqa toʻgaraklarida darsdan boʻsh vaqtlarida shugʻullanayotgan oʻquvchi yoshlarining iqtidori tahsinga loyiq.

Maktabga biz tashrif buyurgan kunimiz maktab kutubxonasida shu yerda ishlab nafaqaga chiqqan faxriy oʻqituvchilar va oʻquvchilarning kitob mutolaasiga bagʻishlangan davra suhbati oʻtkazilayotgan ekan. Buningdek xayrli ishlar kelgusida oʻzining ijobiy samaralarini berishiga ishongimiz keladi.

O.RAJABOVA.