УСТОЗЛИК ШАРАФИ
Дунё иморатлари ичида энг улуғи мактаб бўлса, касблар ичида энг шарафлиси ўқитувчилик, мураббийликдир. Ҳа, бу фикрлар бежизга айтилмаган. Мактаб - ўқувчилар учун келажак пойдевори қуриладиган мўътабар маскандир. Ўша масканда ўқувчиларига бор меҳрини, қалб қўрини, бор билими-ю маҳоратини бахш этиб таълим бергувчи инсон бу - устоздир.
46-сонли мактабга ҳар кун эрталаб ишга келаётганимда жажжи болажонларнинг спорт майдончада машғулотларни зўр иштиёқ, қизиқиш билан бажараётганига, хурсандчилигига гувоҳ бўламан. Сабаби жисмоний тарбия фанининг назарий ва амалий билимларини устоз Гулмон ака Қурбонов улар учун қизиқарли тарзда ўргатади.
Беихтиёр болалигим, ўқувчилик дамларим эсимга тушади. Ҳали ҳамон эсимда, жисмоний тарбия дарсини роса интиқ бўлиб кутар, ҳатто соғинар эдик. Бунга сабаб Гулмон ака Қурбонов қизиқарли, турли метод, янги усуллардан фойдаланиб, қизиқтириб, машғулотлар ўтказар эди. Буни қарангки, устозларимнинг пухта сабоғини олиб, йиллар ўтиб, мен ҳам шу муқаддас масканда она тили ва адабиёт фани ўқитувчиси бўлиб, устоз билан ёнма-ён ёш авлодга сабоқ бермоқдаман.
Гулмон ака Қурбонов 1986-1988 йилларда ўзининг дастлабки фаолиятни 23-сонли мактабда бошлаган, чақириққа қадар бошланғич тайёргарлик, жисмоний тарбия фани ўқитувчиси бўлиб 1988-1999-йилларда 37-сонли мактабда, 1999-2002-йилларда туман Халқ таълими бўлимида методист, 2002-2012-йилларда 46-сонли мактабда ўқув ишлари бўйича директор ўринбосари, 2012-2013-йилларда мактаб директори лавозимларида ишлаб, ёш авлодга таълим-тарбия бериб келди. Шу йиллар давомида ўз касбига сидқидилдан, виждонан ёндашган устоз 2015 йили Қорақалпоғистон Республикаси Халқ таълими аълочиси кўкрак нишони билан тақдирланди.
Устознинг ҳаёти ҳар томонлама ибратли. Айни дамда иш жараёнимда ҳам у кишидан касб маҳорати, билим, кўникма, малакаларни ўргандим. Табиатан болажон, фидойи устоз билан ишлаётганимдан фахрланаман. Дарҳақиқат, 46-сонли мактабда ўз касбининг фидойиси бўлган устозлар жуда кўп. Бугунги кунда ишлайман, ўз маҳоратимни кўрсатаман, деган инсонга барча шароитлар, имкониятлар етарли.
Ҳозирда мактабимизда таҳсил олаётган 692 нафар ўқувчига 60 нафар малакали педагоглар таълим-тарбия бермоқдалар. 54 та фан, 6 та спорт тўгараги мунтазам фаолият кўрсатмоқда. Шуларнинг ичида спорт тўгарагига ўқувчиларнинг қизиқиши ўзгача. Шу ўринда устознинг ютуқларини санаб ўтмоқни жоиз топдим. Яқиндагина туманимизда ўтказилган “Умид ниҳоллари” мусобақасининг туман босқичида 4-синф ўқувчиси Б.Норимматов шашка бўйича 2-ўринни, 8-синф ўқувчиси А.Ражабов шахмат бўйича 1-ўринни эгаллади. 10 январь куни ўғил болалар ўртасида ўтказилган енгил атлетика бўйича мусобақаларда узунликка сакраш бўйича 4-синф ўқувчиси Б.Норимматов 1-ўринни, 1-4-синфлар қизлари ўртасида тўпни нишонга отиш бўйича 4-синф ўқувчиси Д.Бозорбоева 3-ўринни, 9-11-синфлар қизлари ўртасида 800 метрга югуриш бўйича 9-синф ўқувчиси Н.Йўлдошева 3-ўринни, ўғил болалар ўртасида 1500 метрга югуриш бўйича 10-синф ўқувчиси Д.Ярашбоев 2-ўринни эгаллади. 82-мактабда спортнинг бадиий гимнастика тури бўйича ўтказилган мусобақада 5-синф ўқувчиси З.Сафарбоева 3-ўринни эгаллади.
Бундай юксак натижа изланувчан устозга ва бутун мактаб жамоасига фахр, ифтихор бахш этади. Бу каби натижалар қўлга киритилишида устознинг тинимсиз меҳнати, билими, тажрибаси мужассам. Гулмон ака Қурбонов ўз ҳаёти мазмунини эзгуликда, таълим-тарбия беришда деб билган, касбидан обрў-эътибор топган устозлардан бири. Зеро устоз, деган шарафга муяссар бўлишнинг ўзи улкан бахт.
Гулхумор ШОМУРОДОВА,
46-сонли мактабнинг она тили ва адабиёт фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
