Ўқитувчи ва мураббийлар шарафи – юрт эътиборида
15 сентябрь куни Президентимиз Шавкат Мирзиёев Тошкент вилоятининг Бўстонлиқ туманида таълим фидойилари билан учрашди. Ўқитувчи ва мураббийлар куни арафасида ташкил этилган ушбу мулоқот нафақат пойтахт, балки бутун мамлакат миқёсида катта воқеа сифатида тарихга муҳрланди.
Тадбир замонавий онлайн технологиялар ёрдамида ташкил қилинди. Мамлакатимизнинг барча ҳудудларидан 40 мингдан зиёд педагоглар бирдамлик ва фахр-ифтихор туйғуси билан мулоқотни кузатиб бордилар. Улар орасида Амударё туманидан ҳам бир гуруҳ таълим соҳаси жонкуярлари туман ҳокимлигининг фаоллар залида йиғилиб, бевосита иштирок этдилар.
Шу куни таълим-тарбия соҳасида алоҳида соҳада ўзининг юқори натижалари билан намуна бўлаётган қатор ўқитувчилар давлат мукофотларига сазовор бўлишди. Бу эса ўз навбатида минглаб устозларни янада фидокорона меҳнат қилишга руҳлантирди.
Очиқ мулоқот якунлангач, Амударё тумани ҳокимлиги томонидан педагоглар учун “Diamond” ресторанида байрам дастурхони ёзилди. Миллий таомлар, ширинликлар билан безатилган дастурхон атрофида устозлар самимий суҳбатлар қуриб, байрамона кайфиятда дийдорлашдилар.
Ўқитувчилик — машаққатли, аммо шарафли касб. Устозликнинг машаққатлари енгил эмас. Ҳар бир дарсга алоҳида тайёргарлик кўриш, ҳар бир боланинг қалбига йўл топиш, ҳар бир саволга жавоб топиш — буларнинг барчаси меҳр ва сабрни талаб қилади. Шу билан бирга, ҳар бир жамиятнинг келажаги бўлмиш ёш авлод унинг қўлида тарбияланади, таълим олади. Бугунги кунда эса ушбу шарафли касб эгаларига давлат даражасида ҳам муносабат тубдан ўзгарди. Устозлар нафақат маънавий ҳурмат, балки амалий имтиёзлар ва профессионал ривожланиш имкониятлари билан таъминланмоқда.
Сўнгги йилларда таълим тизимини тубдан такомиллаштиришга қаратилган чора-тадбирлар амалга оширилмоқда. Президент бошчилигида таълим сифатини ошириш, ўқитувчиларни қайта тайёрлаш ва уларнинг малакасини мунтазам ошириш тизимини кучайтириш бўйича бир қатор таклифлар кўриб чиқилмоқда. Масалан, мактаб таълими ва ўқитувчилар тайёрлаш тизимини модернизация қилиш, малака ошириш тизимини янги босқичга кўтариш ва устозларга моддий рағбатлар жорий қилиш чораларига алоҳида эътибор қаратилмоқда.
Байрам дастурида туман Маданият бўлими хонандалари ва созандалари ижро этган куй-қўшиқлар, жонли ижролар йиғилганларга байрамона руҳ улашди. Дилдан янграган куй-қўшиқлар тадбирга файз бағишлади.
Дарҳақиқат, ўқитувчи ва мураббийларга бўлган бундай эҳтиром халқимизнинг асрий қадриятларидан биридир. Бугун таълим фидойилари мамлакат тараққиётининг бош мезони сифатида қадрланмоқда. Чунки ҳар бир муваффақиятли инсон, ҳар бир ютуқ ортида устознинг фидойи меҳнати, сабр-тоқати ва меҳр-муҳаббати мужассамдир.
Бугунги тадбир ўқитувчи ва мураббийларнинг жамиятдаги ўрни нақадар улуғ ва бебаҳо эканини яна бир бор кўрсатди. Устозлар эҳтиром топган юртда таълим-тарбия сифатининг юксалиши, ёш авлоднинг билимли ва комил инсонлар бўлиб вояга етиши шубҳасиздир.
Амударёлик таълим фидойилари ҳам ана шу улуғ йўлда ҳамжиҳатлик билан меҳнат қилишга, фарзандларимиз келажагини порлоқ қилишга бел боғлаганлар.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
