Oʻqituvchi va murabbiylar sharafi – yurt eʼtiborida

15-sentyabr kuni Prezidentimiz Shavkat Mirziyoyev Toshkent viloyatining Boʻstonliq tumanida taʼlim fidoyilari bilan uchrashdi. Oʻqituvchi va murabbiylar kuni arafasida tashkil etilgan ushbu muloqot nafaqat poytaxt, balki butun mamlakat miqyosida katta voqea sifatida tarixga muhrlandi.

Tadbir zamonaviy onlayn texnologiyalar yordamida tashkil qilindi. Mamlakatimizning barcha hududlaridan 40 mingdan ziyod pedagoglar birdamlik va faxr-iftixor tuygʻusi bilan muloqotni kuzatib bordilar. Ular orasida Amudaryo tumanidan ham bir guruh taʼlim sohasi jonkuyarlari tuman hokimligining faollar zalida yigʻilib, bevosita ishtirok etdilar.

Shu kuni taʼlim-tarbiya sohasida alohida sohada oʻzining yuqori natijalari bilan namuna boʻlayotgan qator oʻqituvchilar davlat mukofotlariga sazovor boʻlishdi. Bu esa oʻz navbatida minglab ustozlarni yanada fidokorona mehnat qilishga ruhlantirdi.

Ochiq muloqot yakunlangach, Amudaryo tumani hokimligi tomonidan pedagoglar uchun “Diamond” restoranida bayram dasturxoni yozildi. Milliy taomlar, shirinliklar bilan bezatilgan dasturxon atrofida ustozlar samimiy suhbatlar qurib, bayramona kayfiyatda diydorlashdilar.

Oʻqituvchilik — mashaqqatli, ammo sharafli kasb. Ustozlikning mashaqqatlari yengil emas. Har bir darsga alohida tayyorgarlik koʻrish, har bir bolaning qalbiga yoʻl topish, har bir savolga javob topish — bularning barchasi mehr va sabrni talab qiladi. Shu bilan birga, har bir jamiyatning kelajagi boʻlmish yosh avlod uning qoʻlida tarbiyalanadi, taʼlim oladi. Bugungi kunda esa ushbu sharafli kasb egalariga davlat darajasida ham munosabat tubdan oʻzgardi. Ustozlar nafaqat maʼnaviy hurmat, balki amaliy imtiyozlar va professional rivojlanish imkoniyatlari bilan taʼminlanmoqda.

Soʻnggi yillarda taʼlim tizimini tubdan takomillashtirishga qaratilgan chora-tadbirlar amalga oshirilmoqda. Prezident boshchiligida taʼlim sifatini oshirish, oʻqituvchilarni qayta tayyorlash va ularning malakasini muntazam oshirish tizimini kuchaytirish boʻyicha bir qator takliflar koʻrib chiqilmoqda. Masalan, maktab taʼlimi va oʻqituvchilar tayyorlash tizimini modernizatsiya qilish, malaka oshirish tizimini yangi bosqichga koʻtarish va ustozlarga moddiy ragʻbatlar joriy qilish choralariga alohida eʼtibor qaratilmoqda.

Bayram dasturida tuman Madaniyat boʻlimi xonandalari va sozandalari ijro etgan kuy-qoʻshiqlar, jonli ijrolar yigʻilganlarga bayramona ruh ulashdi. Dildan yangragan kuy-qoʻshiqlar tadbirga fayz bagʻishladi.

Darhaqiqat, oʻqituvchi va murabbiylarga boʻlgan bunday ehtirom xalqimizning asriy qadriyatlaridan biridir. Bugun taʼlim fidoyilari mamlakat taraqqiyotining bosh mezoni sifatida qadrlanmoqda. Chunki har bir muvaffaqiyatli inson, har bir yutuq ortida ustozning fidoyi mehnati, sabr-toqati va mehr-muhabbati mujassamdir.

Bugungi tadbir oʻqituvchi va murabbiylarning jamiyatdagi oʻrni naqadar ulugʻ va bebaho ekanini yana bir bor koʻrsatdi. Ustozlar ehtirom topgan yurtda taʼlim-tarbiya sifatining yuksalishi, yosh avlodning bilimli va komil insonlar boʻlib voyaga yetishi shubhasizdir.

Amudaryolik taʼlim fidoyilari ham ana shu ulugʻ yoʻlda hamjihatlik bilan mehnat qilishga, farzandlarimiz kelajagini porloq qilishga bel bogʻlaganlar.

Charos Arslonova, tuman hokimligining Axborot xizmati rahbari.