Туманимиздаги абитуриетлардан ДТМнинг синов тестлари олинди
Сўнгги йилларда давлат олий таълим муассасаларининг бакалавриат таълим йўналишларига қабул тест синовлари жараёни, кўпчилик эътироф этганидек, шаффоф ва адолатли ўтди. Бу, биринчи навбатда, ҳукуматимизнинг мазкур соҳада олиб бораётган сиёсати, ислоҳотларининг натижасидир. Давлатимизда ёшларнинг таълим олишлари йўлида жуда катта имконият ва имтиёзлар жорий қилинмоқда.
2019/2020 ўқув йилида давлат олий таълим муассасалари ва уларнинг филиалларига ўқишга қабул қилиш бўйича тест синовлари катта сиғимли биноларда ўтказилди. Биноларга шахсни идентификациялаш қурилмалари, видеокузатув мосламалари, биометрик ва мобиль алоқа тўлқинларини тўсувчи қурилмалар ўрнатилди, биноларда мўътадил ҳаво ҳарорати таъминланди.
Жорий 2020/2021 ўқув йили учун ўтказиладиган тест синовлари ҳам ҳар томонлама шаффоф, адолатли ўтказилиши учун тайёргарлик ишлари бошлаб юборилди.
Туманимиздаги барча абитуриентларнинг тест синовларига тайёргарликларини янада ошириш мақсадида 40-сонли умумтаълим мактабида туман ХТБ ва “Лидер” ўқув маркази билан ҳамкорликда ДТМ тестларини олиш тадбири ташкил этилди. Мазкур тадбирга ДТМ Қорақалпоғистон Республикаси бўлими ходимлари, хусусан, бўлим бошлиғи Музаффар Aбдуллаев ҳам ташриф буюрди. Тест синовлари жараёнига туманимиздаги жами 474 нафар абитуриентлар иштирок этиб, ўз билимларини синовдан ўтказиш имкониятига эга бўлдилар.
Алоҳида таъкидлаш керакки, таълим соҳасига оид олиб борилаётган долзарб ислоҳотларни тушунган ҳолда тарғиб қилиш, тўғри йўналтириш, халқнинг кенг қатлами, айниқса, ёшлар эътиборига етказиш энг асосий вазифалардан биридир. Ёшларимизнинг келажагини белгиловчи ушбу ислоҳотларни амалга ошириш учун улкан масъулият талаб этилади.
Айтиш жоизки, 2019 йилнинг 14 май куни Ўзбекистон Pеспубликаси Президентининг “Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида” қарори мазкур жараёндаги муносабатларни тартибга солишда муҳим ҳужжат бўлди.
Шунингдек, 2019 йил 19 декабрь куни тегишли вазирлик ва ташкилотларнинг таклиф ва тавсиялари асосида Ўзбекистон Pеспубликаси Таълим муассасаларига қабул қилиш бўйича Давлат комиссиясининг 11-сон Баёни билан таълим йўналишлари бўйича фанлар мажмуаси тасдиқланди.
Маълумки, аввалги йилларда тест синовлари 3 та фандан жами 90 та тест саволлари фанлар кетма-кетлиги бўйича 1.1, 2.1, 3.1 баллар билан баҳоланган бўлса, 2020/2021 ўқув йилидан бошлаб мазкур қоида бутунлай ўзгарди, шунингдек, барча тест синовлари топшириладиган таълим йўналишлари бўйича мажбурий фанлар қўшилди. Шу тариқа 5 та фандан тест синовлари топшириш белгиланди.
Бундай ўзгаришлар, табиийки, абитуриентлардан янада чуқурроқ илм сирларини эгаллашни талаб қилилиш билан бирга тайёргарлик жараёнларига катта масъулият билан ёндашишни талаб қилади.
Маълумот ўрнида айтиш жоизки, бугунги кунда ўтказилаётган диагностик тест синовлари олдинги йиллардагидан фарқ қилади. Энди ҳар бир фуқаро бу хизматдан фойдаланиш имкониятига эга. Бунинг учун абитуриент давлат тест марказининг сайтидан рўйхатдан ўтиб, тегишли фанлар бўйича бир ёки бир нечта тест топшириқларига буюртма қилиши мумкин.
Бу хизматлар абитуриент учун жуда аҳамиятли ҳисобланади. Яъни абитуриент тест топшириқларининг тузилиш формалари, қийинчилик даражаси, тест топшириқлари базаси билан ишлаганда вақтдан унимли фойдаланишни ўрганади. Абитуриент тест топшириқлари китоби ва жавоблар варақаси билан ишлашиш кўникмасига эга бўлади ва ўзни психологик жиҳатдан тайёрлаб боради.
Туманимиздаги абитуриентларга ўз билимларини синаш имконини берган мазку тест синовлари шаффоф тарзда ўтказилди. Мазкур жараённи ташкил қилган масъуллар эндиликда ҳар ойда бир марта абитуриентларга ушбу имкониятни яратиб беришни режалаштиришмоқда. Кейинги тест синови март ойининг 15-санасида ўтказилиши кутилмоқда.
Шу ўринда туманимиздаги барча Олий ўқув юртига кириб ўқиш истагида бўлган абитуриентларга омад ва муваффақиятлар тилаймиз.
Чарос Арслонова,
туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
