“ЁНҒИН ХАВФСИЗЛИГИ ОЙЛИГИ”: БАЙРАМ ОЛДИДАН ҲУШЁРЛИК ВА ТАЙЁРГАРЛИК СИНОВДАН ЎТКАЗИЛДИ

Йил якунланиб, барчамиз интиқиб кутадиган Янги йил байрами яқинлашгани сари юртимизда кўтаринки кайфият ҳукм сурмоқда. Хонадонлардаги шодиёналар, безатилган арчалар ва байрам тадбирлари, шубҳасиз, дилларга қувонч бағишлайди. Бироқ, бундай кунлар қувончи аввало, осойишталик ва хавфсизликка боғлиқ. Шу боис, Қорақалпоғистон Республикаси, хусусан, Амударё туманида байрам олдидан хавфсизлик чоралари кучайтирилган тартибда олиб борилмоқда.

Маълумки, қиш мавсумида иситиш мосламаларидан фойдаланишга бўлган эҳтиёжнинг ортиши, шунингдек, байрам кунларида пиротехника воситалари ва турли ёритгичлардан фойдаланиш ёнғин хавфини юзага келтириши мумкин. Ушбу омилларни инобатга олган ҳолда, Қорақалпоғистон Республикаси Фавқулодда вазиятларнинг олдини олиш ва уларни бартараф этиш бўйича ҳудудий комиссиясининг 2025 йил 28 ноябрдаги тегишли баёни ҳамда Амударё тумани ҳокимининг 2025 йил 29 ноябрдаги топшириғи ижросини таъминлаш мақсадида туманда 2025 йил 1 ноябрдан 30 декабрга қадар “Ёнғин хавфсизлиги ойлиги” эълон қилинган эди.

Айни кунларда мазкур ойлик доирасида туман ҳудудида фавқулодда вазиятларнинг олдини олишга қаратилган комплекс чора-тадбирлар амалга оширилмоқда. Яқинда Амударё тумани Фавқулодда вазиятлар бўлими ҳамда тумандаги бошқа мутасадди ташкилотлар ҳамкорлигида ўтказилган кенг кўламли ўқув-амалий машғулотлар ана шу тизимли ишларнинг узвий давоми бўлди.

Туманда жойлашган ҳарбий қисмлардан бирида ташкил этилган кўргазмали учрашув ҳарбий хизматчилар ва уларнинг оила аъзолари учун ҳақиқий маҳорат мактабига айланди. Тарғибот тадбирида нафақат ёнғин хавфсизлиги, балки қиш мавсумининг долзарб муаммоси бўлган ис газидан заҳарланишнинг олдини олиш, сифатсиз пиротехника воситаларидан фойдаланмаслик бўйича тушунтиришлар берилди.

Ҳарбий қисмда ўтказилган махсус-тактик ўқув машғулотларида ҳам асосий эътибор байрам тадбирлари ўтказиладиган аҳоли гавжум жойларда юзага келиши мумкин бўлган нохуш ҳолатларнинг олдини олишга қаратилди. Мутахассисларнинг таъкидлашича, фавқулодда вазиятларда инсон ҳаётини сақлаб қолишда "олтин соат" қоидаси ва ваҳимага тушмаслик муҳим аҳамиятга эга. Шу боис, машғулотлар давомида оммавий тадбирлар чоғида ёнғин содир бўлганда қандай ҳаракат қилиш, одамларни бинолардан хавфсиз эвакуация қилиш ҳамда жабрланганларга тезкор биринчи тиббий ёрдам кўрсатиш бўйича махсус йўриқномалар амалда синаб кўрилди.

Тадбир доирасида туман Фавқулодда вазиятлар бўлими ходимлари томонидан замонавий ёнғин ўчириш техникалари, махсус қутқарув асбоб-анжомлари кўргазмаси ташкил этилди. Мутахассислар техникаларнинг имкониятлари ҳақида батафсил маълумот бериб, уларни ишга тушириш жараёнларини намойиш этдилар.

Туманнинг бош арчаси ўрнатилган майдонда ҳам амалий машғулотлар ташкил қилинди. Турли сценарийлар, жумладан, "шартли ёнғин" ва "қутқарув операцияси" асосида ташкил этилган тактик машқларда масъул хизматларнинг ўзаро ҳамкорлиги, хабар бериш тизимининг тезкорлиги ва воқеа жойига етиб бориш вақти назоратдан ўтказилди. Жабрланганларга тез тиббий ёрдам кўрсатиш бўйича ҳам амалий кўникмалар синовдан ўтказилди. Бундай машқлар турли идора вакилларининг "соат механизми"дек аниқ ва мувофиқлашган ҳолда ишлашини таъминлашга хизмат қилади.

Ўқув машғулотлари давомида шартли равишда ҳосил қилинган олов ўчоғини бартараф этиш жараёнига ўт ўчирувчилар бевосита жалб қилинди. Иштирокчиларга бирламчи ўт ўчириш воситаларидан тўғри фойдаланиш, ёнғинни бошланғич палласида жиловлаш усуллари ўргатилди. Бундай кўникмалар ҳар бир фуқаро учун ҳаётий зарурат ҳисобланади. Шунингдек, байрам кунларида жамоат жойида безорилик, ўғирлик ҳаракатларини содир қилган шартли ҳуқуқбузар “Миллий гвардия”нинг қўриқлаш бўлими ходимлари томонидан қўлга олинди. Қолаверса, табиий газ ва электр энергияси таъминоти корхоналари ходимлари ҳам байрам кунларида фавқулодда ҳолатларнинг олдини олиш, энергия манбаларининг узлуксиз етказиб берилишини таъминлаш бўйича амалий машғулот ўтказдилар.

Амударё туманида давом этаётган “Ёнғин хавфсизлиги ойлиги” тадбирлари шунчаки ҳисобот учун эмас, балки аҳоли хавфсизлигини реал таъминлаш, фуқароларда фавқулодда вазиятларда тўғри ҳаракатланиш маданиятини шакллантиришга хизмат қилмоқда. Зеро, байрамлар тинчлик ва осойишталик билан файзлидир.