15-сонли умумтаълим мактабида PISA–2025 синовлари ўтказилди
Мамлакатимизда таълим-тарбия тизимидаги ислоҳотлар дунё тажрибасига уйғун ва халқаро мезонларга таянган ҳолда изчил амалга оширилмоқда. Бу жараёнда таълим сифатини чуқур таҳлил қилиш ва уни такомиллаштиришда халқаро баҳолаш тизимлари алоҳида аҳамият касб этади. Ана шундай йирик тадқиқотлардан бири – PISA халқаро баҳолаш дастуридир.
Яқинда Амударё тумани Мактабгача ва мактаб таълими бўлими тасарруфидаги 15-сонли умумтаълим мактабида PISA–2025 халқаро баҳолаш тадқиқотининг синовлари ўтказилди. Синовда мазкур мактабнинг 15 ёшли, яъни 2009 йилда туғилган 42 нафар ўқувчиси қатнашди.
Тадбирда туман ҳокими Собир Хўжаметов, Қорақалпоғистон Республикаси Мактабгача ва мактаб таълими вазирлиги мутасаддилари, туман Мактабгача ва мактаб таълими бўлими бошлиғи Ялғаш Шомуротов ҳамда соҳанинг бошқа масъул ходимлари иштирок этди.
Туман ҳокими синов жараёнида иштирокчилар билан самимий суҳбатлашиб, келгуси муваффақиятларига тилакдошлик билдирди. Шунингдек, таълимда халқаро мезонларни жорий этишнинг аҳамияти, бу орқали олинадиган натижалар келажакда таълим тизимини ривожлантиришда муҳим асос бўлиб хизмат қилиши алоҳида таъкидланди.
Эътиборга молик жиҳат шундаки, PISA–2025 тадқиқотида иштирок этиш учун Қорақалпоғистон Республикаси бўйича 727 та умумтаълим мактаби орасидан фақатгина 11 та мактаб қуръа ташлаш орқали танлаб олинган. Танлов натижасига кўра, Амударё туманидаги 15-сонли умумтаълим мактаби мазкур халқаро баҳолаш синовида иштирок этиш ҳуқуқини қўлга киритди.
Маълумот ўрнида қайд этиш жоиз, мазкур тадқиқот Ўзбекистон Республикаси Мактабгача ва мактаб таълими вазирининг 2025 йил 28 август кунги “PISA–2025 халқаро баҳолашнинг асосий синов жараёнларини ўтказиш тўғрисида”ги тегишли буйруғи асосида ташкил этиляпти.
PISA — Иқтисодий ҳамкорлик ва тараққиёт ташкилоти томонидан ҳар уч йилда ўтказиладиган халқаро баҳолаш дастури бўлиб, унда ўқувчиларнинг фақатгина назарий билимлари эмас, балки ҳаётда учрайдиган муаммоларни таҳлил қилиш, ечим топиш, танқидий фикрлаш ва мулоқот қилиш каби функционал кўникмалари баҳоланади.
Ўзбекистонда мазкур тадқиқотда иштирок этаётган мактаблар тасодифийлик принципига асосан танлаб олинган бўлиб, улар сони 233 тани ташкил этди. Мактаблар мамлакат ҳудудларидаги урбанизация даражасига қараб 27 та гуруҳга бўлинган бўлиб, Президент мактаблари эса қўшимча алоҳида гуруҳ сифатида ажратилди.
PISA тадқиқоти нафақат ўқувчилар билим даражасини, балки миллий таълим тизимининг глобал ўзгаришларга қай даражада мослаша олишини баҳолайди. Шу жиҳатдан, ушбу синовларда мактаб ўқувчиларининг иштирокини таъминлаш орқали таълим сифатини ошириш, халқаро тажрибани ўрганиш ва илғор усулларни амалиётга жорий этиш имкони яратилади.
Ўқувчиларнинг функционал билим ва кўникмаларини ривожлантириш, халқаро мезонларга мослашиш — бу фақат таълим соҳасининг эмас, балки бутун мамлакат тараққиётининг муҳим устунидир.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
