ТИЛИМИЗ – МУҚАДДАС БОЙЛИГИМИЗ
Ўзбек тилига давлат тили мақоми берилганига 31 йил тўлди. Шу вақт ичида тилимизни бойитиш, ривожлантириш, кенг истеъмолга киритиш, илмий ва бадиий соҳалардаги фаол қўлланилишини таъминлаш бўйича кўп ишлар амалга оширилди. Тарихан узоқ вақтдан бери таркиб топиб, шаклланиб келаётган тилимизга бугунги глобаллашув даврида фан-техника, илмий тафаккур ютуқлари туфайли янги сўзлар келиб қўшилмоқда. Тилшунослик олдида турган тилнинг софлигини сақлаш, тил бирликларининг ягона формасини тасдиқлаш ва қабул қилиш, яхлит ва барқарор тизим яратиш, илмий манбалардаги баҳсли ва қарама-қарши ҳолатларни ҳал қилиш каби масалалар ана шу жараён билан бирга муҳим аҳамият касб этиб бормоқда. Чет тилларига қаратилаётган эътибор ушбу тилларни ўрганиш, ўзлаштириш жараёнида ўз тилимизда аввалдан мавжуд бўлмаган сўз қурилиши, маънодош сўзлар, иборалар, гапларнинг синтактик жиҳатдан боғланиш хилма-хиллиги, нутқ тузиш, матн яратишнинг янги шакллари кириб келиши жиҳатидан қаралганда фойдалидир.
Ўз тилимиз бизга аждодлардан келаётган меросдир. Унда ноёб тарихий манбалар, шоир ва ёзувчиларимизнинг бадиий асарлари, ўлмас фикрлари, ифода этилган. Тилимизни муқаддас билиб, уни қанчалик кенг муомалага киритсак, оғзаки ва ёзма нутқда қўллаганда бузилишлардан сақласак, унга шунча фойда келтирган бўламиз. Зотан тил фаол қўллангани сайин ривожланиб бораверади.
Сирож ОЛИМОВ, 41-сонли мактабнинг она тили ва адабиёт фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
