ОНA ТИЛИМ СОФЛИГИ – МИЛЛАТ БАРҚАРОРЛИГИ
Тил софлигини сақлаш, адабий тил қоидалари бузилишининг олдини олиш, давлат тилини бойитиш, Ватан ва миллат тақдирига бефарқ бўлмаган ҳар бир инсоннинг бурчи ҳамда вазифасидир.
Ўзбекистон Республикаси Конституциясида давлат тилининг мақоми ҳуқуқий жиҳатдан мустаҳкамлаб қўйилган ва ўзбек тили мустақил давлатимизнинг байроғи, герби, мадҳияси қаторида турадиган қонун билан ҳимоя қилинадиган муқаддас давлат рамзига айланди.
Ватанимиз мустақиллигининг маънавий асосларини мустаҳкамлаш, халқимиз, аввало, ёш авлодни миллий қадриятларимизга муҳаббат ва садоқат руҳида тарбиялашда ўзбек тилининг аҳамияти тобора ортиб бормоқда. Шу кунларда мамлакатимизнинг барча ҳудудларида “Ўзбекистон Республикасининг “Давлат тили ҳақидаги” Қонуни қабул қилинганининг 31 йиллиги кенг нишонланмоқда.
Давлат тилини бойитиш, янада такомиллаштириш, тил маданиятини юксалтириш борасидаги саъй-ҳаракатларни кучайтириш фақат биз ўқитувчиларнинг эмас, балки миллат эртасини ўйлайдиган ҳар бир зиёлининг зиммасидаги масъулият, виждон амри эканини унутмаслигимиз керак. Ўзбек тилининг давлат тили сифатидаги нуфузи ва мавқеини тубдан ошириш мақсадида Президент Фармони қабул қилиниб, 21 октабрь – “Ўзбек тили байрами куни” деб эълон қилинди.
Шунингдек, Вазирлар Маҳкамаси тузилмасида давлат тилини ривожлантириш Департаменти ташкил этилди. Департаментнинг асосий вазифаларидан бири давлат тили тўғрисидаги қонун ҳужжатларига риоя этилиши устидан мониторингни амалга ошириш, ушбу соҳада жамоатчилик назоратини жорий этишдан иборат.
Президент Фармонига кўра, давлат тили ҳақидаги Қонуннинг янги таҳрири ишлаб чиқилиши, шунингдек, илмий асосланган янги сўз ва атамаларни расмий истеъмолга киритиш бўйича Aтамалар Комиссияси ташкил қилиниши кўзда тутилган.
Бунда атамалар асосан ўзбек тилида киритилишини истардим, чунки ҳозир ўзбек тилимизга ўзлашган сўзлар айнан инглиз, рус каби тилларида ишлатиляпти. Бу ҳолат адабий тил ривожига жиддий тўсиқдир. “Қайсики юртни йўқ қилмоқчи бўлсанг аввал унинг она тилини йўқ қил. Шунда у халқ ўз-ўзидан йўқолади”, дегувчи миллат ва тилимиз душманларига жуда қўл келиши аниқ. Шунинг учун ўзлигимиз рамзи бўлган она тилимизнинг софлигини сақлайлик. Президентимиз давлат тили софлигини сақлашга катта эътибор қаратмоқда. Демак, биз ҳар биримиз бунга ўз ҳиссамизни қўшишимиз керак. Хулоса қилиб айтганда, юртимиз тинч, осмонимиз мусаффо, Юртбошимиз омон бўлсин. Давлатимиз доимо равнақ топсин, фарзандларимиз замонавий технологияларни янада пухтароқ эгаллаб, бундан-да ақллироқ, зуккороқ, билимдонроқ бўлиб етишсин ва биздан кўра бахтлироқ яшасин! Жаҳонда ўзбек тили ва ўзбек элининг обрўси тобора ошиб бораверсин.
Муборак ХАЛИЛЛАЕВА, 1-сонли мактаб она тили ва адабиёт фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
